Read Tombulu Titus 1 Bible Online

Titus 1 - Tombulu bible

Titus 1

¹Um pinantik kenu ém wia ni aku Paulus a mangé, ata ni Opo Empung wo aatu ni Yesus Kristus. Ni aku é méiatu in tumuzu' sé tou pinéléng ni Opo Empung wo um pa'émanen néra é maenté', wo kasii séra toro mata'u tumoro an tutuzu' ulit am pengingilekenta im wana am peraragésanta wia si Opo Empung.

²An tutuzu' ulit itii én ipahtuzu' nai pahpaan ni kita mahéré'la i makailek ung katou-touan makaz ing kauré-uré. Ung katou-touan makaz ing kauré-uré itii é mémoitaaza ni Opo Empung si zéi'kan mahtowo, rengan ung kaayahan im winangun.

³Im witu un oras tinotoz-Na, ni Sia nimapaileko u Nuwu'-Na mengiité u Nuwu' Lé'os tumoro si Yesus u méitarawésa in iwoka'ku mengiit um perénta ni Opo Empung, si nimilot ni kita im witu un ukuman wana a singkéla'.

⁴ Titus, ni ko én tanumokan oki'ku in esa pahpaan ni kita zua é ma'éman wia si Kristus Yesus. Mengalé-ngaléi uman ung kamang tatambér wo ung kaluasan witu un até, um wia si Opo Empung Ama'ta wo si Yesus Kristus, si Nimilot ni kita im witu un ukuman wana a singkéla' é menaté-natér ni kamu.

⁵Titus, ni ko é méitula'ukumé witi katanaan Kreta, wo ko toro mimekla an zéi'kampé' niimek, wo tumotoz sé penatua wana am wanua tua'na, mengiit a méikuakumo wia ni ko.

⁶ Si tou maéndo penatua é léwo'zéi' in zéi'kan siapa pahséro'an, si mahayona én esa uman, sé oki'na é ma'éman wia si Yesus wo zéi'kan pahtawuruken né tou pahpaan zéi'kan ipahkua-kua i sangaya kaapa menou-nou zéi'kan kaimekan.

⁷Si tonaas né jamaat é mahimek um walé ni Opo Empung, niitumo ni sia é léwo'zéi' in zéi'kan siapa pahséro'an, zéi'kan wera', zéi'kan raranguan, zéi'kan matetewelen, zéi'kan tangkoro'en wo zéi'kan uman megena-genang an zoit,

⁸taan paaz sumungkul sé tou i mento' witi waléna, paaz péléng am wangun wo lé'os, tulap, zéi'kan mahsanaweka, mahkiit um paaz ni Opo Empung, makaezen wana a lelo,

⁹uli-ulit mahkiit an tutuzu' kaulitan. Karia in téntu ni sia é makawawa i mahsésa karia an tutuzu' mengiité ang kaulitan wo makawawa i mangun sé tou sé mahsasaru uman an tutuzu' kaulitan, i ma'éman an tutuzu' itii.

¹⁰Pahpaan in tarékan im wia sé jamaat é lakezo sé mahsasarumokan, kataré-taré é sé im wia sé tou Yahudi sé ma'émano taan mahkiitpé' an tinotoz im pahsunaten. Ni séra menuwu-nuwu' an towo i mahlululu sé tou.

¹¹A sumah né tou tanu ni séra é léwo'zéi' im pekipenes, pahpaan lakez sé sana awu pahkayo'en néra karia an tutuzu' towo, makaz am pahkailekan néramé é lakez taan karia in zéi'kan wangun.

¹²Wéwéhan si tou tulap si pahkuan néra i nabi, si tou witi Kreta itiikan é nimahkuamoma in téntii, “Sé tou Kreta én tantowo, tanu si meneza' tou, si sorem wo soo mawendu.”

¹³Un ipahkua ni nabi itii én ulit. Niitumo, totoz ing kaupi'ala séra wo séra mazéi' i ma'éman an tutuzu' zéi'kan ulit,

¹⁴wo kasii zéi'mo mahkii-kiit a sirita towo né tou Yahudi wo am perénta né tou sé timamburimola witu ung kaulitan.

¹⁵Wia sé tou ung katou-touan néra ém weresi, péléng am wia ni sia ém weresi, taan wia sé tou makati'tiren wo sé tou zéi'kan ma'éman, zéi'kan siapa zozo' in esa um weresi. Pahpaan ung genang wo un até néra é makazi'zisen.

¹⁶Ni séra é mahkua i mata'u si Opo Empung, taan im wana am pemangu-mangunen néra, ni séra é mahkélong ni Sia. Sé tou itii én totoz makazi'zisen, zéi'kan mahtali-talinga wo zéi'mo makawawa i mangun am wangun.