Read Tombulu Titus 3 Bible Online

Titus 3 - Tombulu bible

Titus 3

¹Titus, ipapagenangmula wia sé jamaat wo séra mahsigi-sigi' wia sé pemerénta wo sé mahkawasa. Ni séra kasii é léwo'zéi' i mahtali-talinga wo paaz i maayang péléng am papaayangen wangun.

²Ni séra kasii én zéi'kan toro mahtawuruk, zéi'kan toro mahéndo-éndoan. Ni séra é léwo'zéi' in eluz uman wo roros até wia péléng sé tou.

³Pahpaan im puuna ni kita kangkasii é menou-nou witu ung kalemouan: zéi'kan mahtali-talinga, méikalulu, nimaéndo ata wana a lelo léwo' un awak wo a makapaazen meléwo' un tou, menou-nou mahwangun a léwo'an wo téutéu, ikazi'zis né tou wo mahzizi'zisan.

⁴Taan i mémoikatuzu'mé u lé'os ni Opo Empung, si Milot ni kita im witu un ukuman wana a singkéla', wo u raraatéan-Na wia sé tou,

⁵in toro niitu ni Sia é nimiloto ni kita im witu un ukuman wana a singkéla'ta. Ni kita méipilot-Na zéi'kan pahpaan an ulit winangunta, taan pahpaan u raraatéan-Na. Ni Sia nimilot ni kita mengiité si Roh Lenas si zéi'kan siapa akazna, si nimeresi un atéta wo niméhé wia ni kita ung katou-touan weru,

⁶wo si Roh Lenas si zéi'kan siapa akazna itii é mémoiwéhémé ni Opo Empung wia ni kita mengiité si Yesus Kristus si Nimilot ni kita im witu un ukuman wana a singkéla'ta.

⁷Karia in téntu, ni kita in tou sé niéndo ulit pahpaan ung kamang méitambér-Na, toro makailek ung katou-touan makaz ing kauré-uré tanu um pengéré-ngéré'enta.

⁸Péléng a méikuakuma kenu én ulit wo kapaazku péléng niitu én uli-ulit ikuala, wo sé tou ma'émano wia si Opo Empung én uli-ulit mahtututu' i mahpaayang am paayangen wangun. Nianamo a lé'os wo wéwéhan torona wia sé tou.

⁹Taan tia' mahkii-kiit i mahzéi-zéi'an wana an zéi'kan siapa torona, mahzéi-zéi'an tumoro sé nimaopo, mahéndo-éndoan wo mahkoro' tumoro un ukum Torat. Pahpaan niana péléng én zéi'kan siapa torona wo za'i-za'i pelando-landoian.

¹⁰Si tou mahkayo' sé jamaat, totoz i séro'ennula makasa kaapa makazua, taan sa sia soo tumalinga tia'mo mahkari-karia ni sia.

¹¹Pahpaan kata'uannumo, sa si tou tanu ni sia én uli-ulit méikalulu wo karia a singkéla' pahwangunenna, ni sia nimukum un touna in esa.

¹² I ni aku nimatumoma si Artemas kaapa si Tikhikus i mangé wia ni ko, mahtututu'mé ko i mereweké méyé wia ni aku wia Nikopolis, pahpaan ni aku én timotozola i mento' wia'i kauré un oras un zaté.

¹³ Uli-ulit im pahsawangan kasiila si Zenas, si tulap an ukum wo si Apolos, wo sa séra lumampang, péléng am pemandungen néra ém wutul.

¹⁴Wo sé touta kangkasii é léwo'zéi' mahtata'ula i mahpaayang am paayangen wangun i mahwuwutul am pemandungen néra i mendo-endo, wo ung katou-touan néra ém wéwéhan un torona.

¹⁵Péléng sé tou memali-mali kariaku im wia'i é mapaayoma u sigi' néra wia ni ko. Wo ipapaayopé' kasiila u sigi'ku wia sé tou rumaraaté ni kai witu um pa'émanen wia si Yesus. Mengalé-ngaléi uman ung kamang tatambér ni Opo Empung é menaté-natér ni kamu péléng.