Read Tombulu Ibrani 10 Bible Online

Ibrani 10 - Tombulu bible

Ibrani 10

¹A méipantik witu un ukum Torat én tanumokan um wangun u mahéyé taan zéi'kan totoz masuat karia un ulitna um wangun itii. Sa ikiit un ukum Torat, sekez in ta'un, sé tou paaz marumété wia si Opo Empung é léwo'zéi' i mahalima sé tatamun kinerizo in iragés, taan un ukum Torat itii én zéi'kan mamuali i mangun sé tou maéndo zéi'kan siapa pahséro'an.

²Pahpaan sa sé tou paaz méyé rumété wia si Opo Empung én uli-ulit wineresimo im wana a singkéla' makaz ing kauré-uré pahpaan nimakasamoma i niméhéma u raragés, ni séra én zéi'mo mahgenangla i simingkéla'pé' wo ni séra én zéi'mo menau-naup i mahali sé tatamun in iragés.

³Taan u mengangali sé tatamun sekez in ta'un itii u nimapa genang uman taréma wia ni séra i ni séra én tou mahsingkéla'pé'.

⁴Pahpaan zéi'kan mamuali un zaha' ni sapi tuama wo un zaha' ni kambing tuama in zuméi' a singkéla' né tou.

⁵ Niitumo, i si Kristus niméyé wia ung kaayahan kenu, ni Sia éng kimua wia si Opo Empung, “Sé tatamun sé kinerizo[15] wo a raragés walina[16] éng kasoo-Mu taan niimek-Mumo un awak-Ku i maéndo raragés.

⁶Sé tatamun pahtunun[17] wo sé tatamun kinerizo in zuméi' a singkéla' éng kasoo-Mu.

⁷A ni Aku kumua, ‘O Opo Empung-Ku, ni Aku méyé i mangun un ikapaaz-Mu, tanu u méikapantik tumoro ni Aku witu um Pinantik Lenas.’ ”

⁸Witu um Pinantik kataré, si Kristus éng kimua, “Sé tatamun kinerizo wo a raragés walina, sé tatamun pahtunun wo sé tatamun kinerizo in zuméi' a singkéla' én zéi'kan wangun wia ni Ko wo kasoo-Mu”, zozo' am pahragés itii ém pahwangunen tanu u méipantik witu ung kitap Torat.

⁹Si Kristus kangkasii éng kimua in téntii, “Uli-ulit ikua-Kuma, o Opo Empung, ni Aku i niméyé é mangun an ikapaaz-Mu.” Niitumo, an tinotoz i mahragés ing kataré é méikana' ni Kristus wo sinawelan karia i nimayo un tou-Na in esa.

¹⁰Pahpaan un ikapaaz ni Opo Empung itiimo, ni kita maéndo tou linenas-Na, i si Yesus Kristus nimayo un tou-Na makasa uman makaz ing kauré-uré i meresi a singkéla' né tou.

¹¹ Sekez in endo péléng sé walian é mahpaayang am paayangen néra wo menau-naup mahkeriz sé tatamun sé masuat in iragés. Taan un ipahragés néra én zéi'kan mamuali in zuméi' a singkéla'.

¹² Taan si Kristus makasa uman nimayo un tou-Na i maéndo raragés makaz ing kauré-uré, in zuméi' a singkéla' né tou, a Sia marumumez witu ung kakan ni Opo Empung.

¹³In tarékan ni Sia é ma'ento'mokan un orasna i sé kakoro'-Na maéndo léléékan un a'é-Na.

¹⁴Pahpaan si Yesus Kristus nimaté makasa uman makaz ing kauré-uré i maéndo raragés, ni Sia nimangun sé tou nimaweresi im wana a singkéla', a séra maéndo tou linenas ni Opo Empung.[18]

¹⁵Tumoro si Yesus Kristus nimaté makasa uman makaz ing kauré-uré i maéndo raragés, si Roh Lenas é mahkua tumoro ung kata'uan-Na wia ni kita mengiit u méikua ni Opo Empung,

¹⁶ “Niiamo um pinataazan um wanguneng-Ku karia néra in endo tumondong,” si Opo Empung kimua kasii, “An ukum-Ku én iwéhé-Ku witu un até néra wo mantik niitu witu ung genang néra,

¹⁷wo ni Aku én zéi'mo megena-genang a singkéla' wo ang kasumalaan néra.”

¹⁸Niitumo, sa péléng a singkéla' wo ang kasumalaan é niampungano, sé tatamun sé kineriz in ipahragés in zuméi' a singkéla' én zéi'mo siapa torona.

¹⁹Niitumo katuari-katuari, pahpaan un zaha' ni Yesus é méikasaroi in zuméi' a singkéla'ta, in tarékan ni kita én zéi'mo maindé' i muntep witi Tampa Totoz Lenas.[19]

²⁰I si Yesus nimayoma un tou-Na i nimaté pahpaan ni kita, ni Sia é nimukamoma u lalan weru wo kita toro makailek ung katou-touan makaz ing kauré-uré. Un awak ni Yesus én tanu u roko' aapé' witu un unez un Tampa Lenas wo un Tampa Totoz Lenas.

²¹Si Yesus ém Walian Wangko'ta si maéndo tonaas witi Walé ni Opo Empung.

²² Niitumo, méyémo kita rumété si Opo Empung karia ung genang lé'os wo uli-ulit ma'éman uman wia ni Sia. Pahpaan tanumokan im pinikpikana un zaha' in zuméi' a singkéla', a léwo'an witu un atéta ém wineresimoma ni Yesus wo un awakta én tanu wino'asano karia un zano totoz weresi wo kita toro rumété wia si Opo Empung.

²³Méyémo kita enté' i mahéré' wo zéi'kan mahzua-zua genang witu um pa'émanenta wia si Yesus, pahpaan si Opo Empung én zéi'kan maliuz i mangun a méitaaz-Na.

²⁴Méyémo kita mahwéha-wéhan genang wia si esa wo si esa, wo kita toro mahsawa-sawangan i rumaraaté sé kasuat tou wo mahwangun a lé'os.

²⁵Tia' kita mahzou' im wana am pahréwokan mahwali-wali i mahragés wia si Opo Empung tanu ung kinanaram né tou walina, taan tawimo kita mahsésésaan am wangun pahpaan un endo si Yesus i mawurimé sumaup éng kaleleznamo.

²⁶Pahpaan sa kita mata'umo an ulit tumoro si Yesus Kristus taan ni kita mahtututu'pé' i memua-muali a singkéla', zéi'mo siapa un iragés in zuméi' a siningkéla'ta itii.

²⁷ Sa téntu, ni kita én akazokan i ma'ento' un ukuman makaindé'en wo u layasna un api totoz wuaya u luma'ung makaz i maapu péléng sé tou mahsaru si Opo Empung.

²⁸ Sa wéwéhan si soo mangun un ukum ni Musa wo wéwéhan sé tou zua kaapa telu kimua a niilek néra tumoro a sinala' ni tou itii im witu un ukum ni Musa, si tou itii én ukumen im wunu'en, zéi'kan siapa ampungan.

²⁹ Tantumo lumouspé'mé ung kawutezna un ukuman wia si tou mahséro' wia si Oki' ni Opo Empung wo mahgenangla un zaha' ni Yesus Kristus u lumenas sé tou én zéi'kan siapa torona wo mahséro' wia si Roh si mahtambéré ang kamang.

³⁰ Pahpaan si Opo Empung si kata'uanta éng kimua, “Ni Aku uman si toro maér wana a léwo'an né tou, pahpaan ni Aku uman si toro méhé un ukuman.” Wo kasii, “Si Opo Empung én tumotoz ulit kaapa zéi'kan am pahwangunen né tou-Na.”

³¹Totoz makaindé'en sa kita ukumen ni Opo Empung si menou-nou.

³²Taan gena-genangen kura ni kamu im puuna i ni kamu taré ma'émanla wia si Yesus. In toro niitu, lakez an zézéha pinendan nioué, taan ni kamu uli-ulit enté' im wana an zézéha.

³³Wéwéhan orasna i ni kamu pahséro'an wo pahzézéhan witu u sinaru né tou lakez. Wéwéhan kasii un orasna ni kamu mendan an zézéha itii tanu an zézéha pahpendanen né katuari esa pa'émanen.

³⁴Im wéwéhan sé tou niukum méiuntep bui, ni kamu é nimendan an zézéha karia néra wo zozo' a sangkum niou éng kinahata né tou walina, taan ni kamu é mahpaa-paaz pahpaan kata'uan niou ni kamu é makasangkum u lumouspé'mé niitu u méiwéhémé ni Opo Empung un zéi'kan maléwo' makaz ing kauré-uré.

³⁵Niitumo, tia'mo ipahtutula'u um pa'émanen niou pahpaan um wawaérna én totoz wangko'.

³⁶Ni kamu én tia' mahkana' i ma'éman zozo' im pahzézéhan, wo ni kamu makailek u méitaaz ni Opo Empung pahpaan nimakawangunola an ikapaaz-Na.

³⁷ Pahpaan witu um Pinantik Lenas é méipantik téntii, “Zéi'mo uré, si méyé itii é méyémo, ni Sia i méyé én zéi'kan ikaurémé.

³⁸Taan si tou-Ku si ulit é menou-nou pahpaan ma'éman. Wo sa sia timula'umoma ni Aku, si tou itii én zéi'kan wangun wia ni Aku.”

³⁹Ni kita én zéi'kan tanu sé tou timula'umoma ni Sia wo lamaléwo', taan ni kita én tou ma'éman wo maipilot im witu un ukuman wana a singkéla'.