Read Tombulu Ibrani 11 Bible Online

Ibrani 11 - Tombulu bible

Ibrani 11

¹Um pa'émanen én téntii: totoz ing kata'uanta sa péléng am pahéré'anta wia si Opo Empung éng kailekanta, zozo' in zéi'kampé' pahilekentala taan totoz ing kata'uanta ni kita é lamakailek niitu.

²Pahpaan i ma'éman, sé nimaopo né tou Israel én ikapaaz ni Opo Empung.

³ Pahpaan i ma'éman, ni kita é makatulap ung kaayahan ém winangun mengiité u Nuwu' ni Opo Empung. Niitumo, péléng am pahilekenta ém winanguné im wana an zéi'kan kailekan.

⁴ Pahpaan i ma'éman, si Habel niméhé u raragés wia si Opo Empung u lumouspé'mé ung kawangunan u méiragés ni Kain. Karia in téntu si Opo Empung kimua ni sia én ulit pahpaan u méiragésna én ikapaaz ni Opo Empung. Niitumo, zozo' nimatémoma taan ni sia én toro maéndo kékéréanta tumoro um pa'émanenna.

⁵ Pahpaan i ma'éman, si Henokh zéi'kan nimendané um patéan wo ni sia ém winénéta ni Opo Empung mangé witi kasendukan, niitumo zéi'kan siapa si nimilek ni sia. Wo puunala sia im winénéta mangé witi kasendukan, si Opo Empung éng kimua i ni sia én ikapaaz-Na.

⁶Niitumo, zéi'kan mamuali si tou in ikapaaz ni Opo Empung sa zéi'kan ma'éman wia ni Sia. Pahpaan séi si paaz méyé wia si Opo Empung, totoz pa'émanenna i si Opo Empung én uli-ulit im wia, wo totoz pa'émanenna i ni Sia si mahwéhé um wawaér wia si tou uli-ulit mahtututu' i mahragés wia ni Sia.

⁷ Pahpaan i ma'éman, si Nuh nimangun u londéi totoz tua'na in tumulung ni sia wo sé sana awuna. Karia in téntu, ni sia nimapailek i ni sia én uli-ulit ma'éman wia si Opo Empung, taan sé tou walina wia ung kaayahan é simingkéla' pahpaan soo ma'éman u méikua ni Opo Empung itii. Niitumo, si Nuh éng kinua ni Opo Empung in tou ulit mengiit um pa'émanenna.

⁸ Pahpaan i ma'éman, si Abraham é mahtali-talinga un ipahkua ni Opo Empung wia ni sia. I ni sia tinawah i mangé witi tampa u maéndo anuna, ni sia nimangé zozo' in zéi'kampé' kata'uanna wisa un angéanna itii.

⁹ Pahpaan i ma'éman, si Abraham é mahento' witi tampa méitaaz itii in tou limepuh umané wo im witu ni sia é mahento' uman witu un ténda. Téntu kangkasii si Ishak wo si Yakub, nimakailek un taaz masuat karia u méitaaz wia si Abraham.

¹⁰Pahpaan si Abraham uli-ulit ma'éman i ni sia é milek um wanua tua'na u makato'tolan enté', u niimeko wo winangun ni Opo Empung, niitumo ni sia é ma'ento' karia in zéi'kan mahzua-zua genang i makailek um wanua tua'na itii.

¹¹ Pahpaan i ma'éman, zozo' si Abraham én tu'amo wo si Sara ém pesel, si Abraham ém winéhanpé'mé ketez i makaileké suzu im wia si Sara pahpaan si Abraham én totoz ma'éman i si Opo Empung én zéi'kan maliuz u méitaaz-Na.

¹² Niitumo, zozo' si Abraham tu'amo tanu i nimatémo, taan ni sia é nimakaileké sé suzu totoz lakez, tanumokan sé tototi'en witi langit wo an eris witi tembir un tasik, un zéi'kan karékénan ung kalakezna.

¹³ Péléng sé tou sé taré isiritakuma itii én totoz ma'éman makaz i nimaté. A méitaaz ni Opo Empung itii én zéi'kampé' lekep ing kinailekan néra i menou-nou, taan niitu ém pahileken wo pahkapéien nérama, wo ni séra kangkasii é mahkua i ni séra é limepuh umané wo zéi'kan mauréma i mento' wia ung kaayahan kenu.

¹⁴Ni séra sé kimua i limepuh umané im wia ung kaayahan kenu én tumuzu'mé i ni séra én totoz malelo i menéro un tana' u maéndo anu néra.

¹⁵Sa séra megena-genang uman un tana' mémoitula'u néramé itii, ni séra én toro uman i mawurima witi tana' itii pahpaan lakez un oras néra i mawuri witu.

¹⁶Taan in tarékan, ni séra é lumelo un tana' u lumouspé'mé ung kawangunanna, niitu un tana' witi kasendukan. Niitumo si Opo Empung én zéi'kan maizang im pahkuan néra in Opo Empung néra, pahpaan si Opo Empung é nimimeko um wanua tua'na esa wia ni séra.

¹⁷ Pahpaan i ma'éman, si Abraham im pema'wa'en ni Opo Empung é niméhé si Ishak in iragés wia ni Sia. Si Abraham si nimakailekola u méitaaz ni Opo Empung itii ém paaz i méhé si Ishak si oki'na si esa uman in iragés,

¹⁸ zozo' si Opo Empung éng kimuamo wia si Abraham in téntii, “Im wia si oki'mu si Ishak, ni ko é makailek suzu, tanu u méitaaz-Ku wia ni ko.”

¹⁹Pahpaan im witu ung genang ni Abraham i si Opo Empung ém wéwéhan kawasa in tumou sumaup sé tou nimatémo. Niitumo, si Ishak én tanu ing kinailekané sumaup ni Abraham im witu um patéan.

²⁰ Pahpaan i ma'éman, si Ishak niméhé ung kamang wia si Yakub wo si Esau u mamualimokan in tumondong.

²¹ Pahpaan i ma'éman, si Yakub ing kalekepano é niméhéma ung kamang wia sé oki' ni Yusuf, a sia lumooz wo sumigi' si Opo Empung karia in timanéila witu un titionan un tekenna.

²² Pahpaan i ma'éman, si Yusuf ing kalekepano, ni sia éng kimua i sé tou Israel én iondolé im witi Mesir. Ni sia kasii éng kimuama tumoro u léwo'zéi' im wangunen néra wana an zuhina.

²³ Pahpaan i ma'éman, sé tu'a ni Musa é nimuni ni sia teluna loloho'en rengan i nimatoumé pahpaan si oki' néra itii ém wangunokan wo ni séra én zéi'kan maindé' i sumaru um perénta ni kolano né Mesir.[20]

²⁴ Pahpaan i ma'éman, si Musa i nimatu'amé é soo ing kuan oki' ni wéwéné oki' ni Firaun.

²⁵Un ikapaazpé' ni Musa é mazézéha karia né tou ni Opo Empung taan menou-nou i mahpaa-paaz zéi'kan mauréma karia i mahsingkéla'.

²⁶Witu ung genang ni Musa, tawimo sia séro'an pahpaan si Kristus, taan makailek péléng a sangkum witi Mesir. Pahpaan pahéré'ennala um wawaér iwéhémé ni Opo Empung wia ni sia é lumouspé'mé a sangkum witi Mesir.

²⁷ Pahpaan i ma'éman, si Musa timula'uma un tana' Mesir. Ni sia i nimangé én zéi'kan maindé' un upi' ni kolano né Mesir taan pahpaan ni sia én tanu mahilekoma si Opo Empung si zéi'kan kailekan itii.

²⁸ Pahpaan i ma'éman, si Musa nimatu sé tou Israel i lumé'os un endo wangko' um pahkuan Paskah wo mahpikpika un zaha' wana am pepenet am walé né tou Israel, wo am walé itii én talezen umana ni malaekat um patéan si mahwunu' sé koki' tu'a.

²⁹ Pahpaan i ma'éman, sé tou Israel limewet un Tasik Rangdang tanumokan limeweta ung katanaan, taan sé tou Mesir é nimaté méikatenem i ni séra nima'wa' i lumewet witu.

³⁰ Pahpaan i ma'éman, sé tou Israel éng kimemu u réhén mésel rakék witi Yerikho, kumawusa um pituna endo ni séra i limiklik niitu.

³¹Pahpaan i ma'éman, si Rahab si wéwéné samek itii én zéi'kan winunu' mahwali-wali karia né tou zéi'kan mahtali-talinga si Opo Empung, pahpaan sinungkulna lé'os sé tou Israel sé mémahtata'u um witi wanua tua'na itii.

³² Lakezpé' sé toro isiritakuma taan un orasku én toyo' uman i sumirita tumoro si Gideon, si Barak, si Simson, si Yefta, si Daud, si Samuel wo sé nabi,

³³sé pahpaan i ma'éman, kimala ang kakolanoan walina, mahwangun an ulit, makailek a méitaaz ni Opo Empung wo mangun a sumah né singa zéi'mo ikanganga.

³⁴ Im wia ni séra wéwéhan kasii sé simewuma witu un api totoz tua'na, sé méikapilot im wia sé tou munu' ni séra karia am pisou, sé zéi'kan enté' taan winangun i maenté' wo si winangun i maenté' im wana am pahkoro'an a mangun sé suraro né tahsasana wanua walina timingkas.

³⁵ Pahpaan i ma'éman, sé woopira wéwéné é nimakailek sumaup sé tou ikararaaté néra sé nimatémo pahpaan méitou sumaup ni Opo Empung im wia sé nimaté. Taan wéwéhan kasii sé pahpaan i ma'éman, nimazézéha makaz nimaté pahpaan ni séra soo ipilot sa totoz kumana' i ma'éman wia si Opo Empung. Wo in tumondong i ni séra itou sumaup ni Opo Empung é makailek ung katou-touan lumouspé'mé ung kawangunan ung katou-touan im puuna.

³⁶ Wéwéhan kasii sé pahséro'an wo pa'uliten im pahsaboken, niapus karia u ranté wo méiuntep bui.

³⁷ Im wia ni séra kasii ém wéwéhan sé winerit karia am watu makaz nimaté, sé sinoyou pinahzua wo winunu' karia um pisou. Wéwéhan kasii sé tou ung katou-touan néra éng karaaténokané, ni séra ém wayaan uman kaangéan kimarai uman ung kulit ni domba wo ung kulit ni kambing, zéi'kan siapa apa, pahwangunan né tou léwo' kiit um paaz néra makaz i nimasusa wo pahzézéhan.

³⁸Sé tou tanu niitu én tahlous wangun i memia-mia ung kaayahan kenu. Ni séra wayaan uman kaangéan, wana ang kapelasan wo wana ang kentur, wana an tuleng wo wana a selat ang kentur.

³⁹Ni séra péléng én ikapaaz ni Opo Empung pahpaan um pa'émanen néra. Zozo' ni séra zéi'kan nimakaileka a méitaaz ni Opo Empung wia ni séra.

⁴⁰Pahpaan si Opo Empung éng gimenang u lumouspé'mé ung kawangunan niitu wia ni kita. Ung ginenang-Na, péléng a méitaaz-Na wia ni séra én zéi'kan malekep sa zéi'kan mahwali-wali kariata.