Read Tombulu Ibrani 13 Bible Online

Ibrani 13 - Tombulu bible

Ibrani 13

¹Katuari-katuari, tia'mo kumana' i mahraa-raatéan si esa wo si esa.

² Tia'mo mahzua-zua genang i sumungkul sé tou mangémé witi walé niou. Pahpaan karia i nimangun un téntu, wéwéhan sé woopira tou, zéi'kan kata'uan néra i ni séra é simungkulola sé malaekat witi walé néra.

³Pahgenangela sé tou witi bui tanumokan ni kamu ém binui karia néra. Pahgenangen kasiila sé tou pahzézéhan tanumokan ni kamu ém pahzézéhan tanu ni séra.

⁴Péléng sé tou é léwo'zéi' i mahsigi'la u mahkawéng wo tia' ung kokolo'an maéndo tampa pahsamekan, pahpaan si Opo Empung é mukum sé samek wo sé tou sangaya.[23]

⁵ Tia' megena-genang uman an zoit wo mahpaa-paazola karia un apa uman um wiamo ni kamu. Pahpaan si Opo Empung éng kimua téntii, “Ni ko én zéi'kan iwaya-Ku wo ni ko én zéi'kan kawisa itula'u-Ku.”

⁶ Pahpaan ni kita én zéi'kan kawisa méiwaya ni Opo Empung, niitumo, ni kita ém wuaya i mahkua, “Si Opo Empung si Tumutulungku. Ni aku én zéi'kan maindé'. Apa un toro wangunen né tou wia ni aku?”

⁷Genangen nioula sé tonaas niou im puuna sé nimahwoka'momé u Nuwu' ni Opo Empung wia ni kamu. Wéhan nioula genang kura ung katou-touan néra makaz ni séra i nimaté wo kéréala um pa'émanen néra.

⁸Si Yesus Kristus én zéi'kan nimahwali-walinala, rengané im puuna, in tarékan makaz ing kauré-uré.

⁹Tia' kamu mahkiit péléng an tutuzu' a nimahwali-walinaan an zéi'kan siapa kaulitan mengiit u Nuwu' Lé'os tumoro si Yesus, an ipahtuzu' né tou walina an toro mangun ni kamu ikalulu. Un atéta é léwo'zéi' nienté' karia ung kamang méitambér ni Opo Empung, pahpaan niitumo um wangun, zéi'kan karia an tinotoz tumoro ang kakanen an zéi'kan siapa torona im wia ni séra sé mahkiit niitu.

¹⁰In tarékan ni kita ém wéwéhano un tampa pahragésan wo sé mahpaayang witi ténda ni Opo Empung sé mahkiit un ukum Torat im puuna, zéi'kan mata'u kuman a méiragés witu un tampa pahragésan itii.

¹¹ Si Walian Wangko' é mengangalima un zaha' né tatamun witi tampa Totoz Lenas in iragés zuméi' a singkéla' wo an awak né tatamun ém pahtunun witi ondol un tampa rinendaian néra an ténda.

¹²Tanu sé tatamun ém pahtunun witi ondol tampa rinendaian né tou Israel an ténda, si Yesus kangkasii é nimazézéha witi ondolé u Yerusalem i lumenas sé tou-Na karia un zaha'-Na in esa.

¹³Pahpaan si Yesus é nimazézéha witi ondolé u Yerusalem, niitumo méyémo kita mangé wia ni Sia witi ondolé un tampa rinendaian an ténda wo mendan an zézéha tanu um pinendan-Namé.

¹⁴Pahpaan im wia ung kaayahan kenu ni kita én zéi'kan siapa um wanua tua'na um pahento'an makaz ing kauré-uré, taan ni kita é mahpenéro um wanua tua'na ento'anta in tumondong witi kasendukan.

¹⁵Mengiité si Yesus kita mahlooz si Opo Empung. Niitumo, méyémo kita kumua u makasé wia si Opo Empung wo u loloozta itii é maéndo tanu u raragésta wia si Opo Empung. Si Opo Empung én totoz paaz a raragés tanu niitu.

¹⁶Tia' kamu maliuz i mangun a lé'os wo mahsawangla wia sé léwo'zéi' i sawangan, pahpaan am wangun pahlé'osenta wo a sasawangta wia sé tou é raragésta wia si Opo Empung. Si Opo Empung én totoz paaz a raragés tanu niitu.

¹⁷Pahtali-talingala sé tonaas niou wo mahkii-kiitla ni séra, pahpaan si Opo Empung si niméhé um paayangen wia ni séra in tuméiz um pa'émanen niou in tou mahwangun a méiatu ni Opo Empung. Karia in téntu, ni séra i mahtéiz um pa'émanen niou éng karia i mahpaa-paaz, zéi'kan karia i mema'o-ma'os. Pahpaan sa séra mema'o-ma'os, um pahpaayangen néra én zéi'kan siapa torona im wia ni kamu.

¹⁸Tia' mazéi' i mahpengaléi tumoro ni kai pahpaan totoz kata'uan nai ung genang lé'os nai ém weresi. Pahpaan im wana am péléng ni kai é mahtututu' i menou-nou mahwangun a lé'os.

¹⁹Lumousé niitu, wuntul ni kamu totoz im pahaléiengkuma, ipengaléié ni aku wo si Opo Empung é rengan i matuma ni aku mawurima wia ni kamu.

²⁰In tarékan si Opo Empung si mahwéhémé ung kaluasan witu un até én timoumomé sumaup si Yesus im wia sé nimaté. Si Yesus si Mahpiarata ém winangun ni Opo Empung i maéndo menanatér sé tou-Na, si totoz wangko', tanu si memimiara sé domba, si totoz pahsigi'en. Wo un zaha'-Na é nimangun um pinataazan ni Opo Empung karia né tou makaz ing kauré-uré.

²¹Mengalé-ngaléi uman si Opo Empung é sumawang ni kamu i mangun péléng am wangun mengiit un ikapaaz-Na, wo maayang witu ung katou-touanta i mangun ni Sia mahpaa-paaz, mengiité si Yesus Kristus. Wia si Kristus uman u sigi' wo looz makaz ing kauré-uré! Amin.

²²Katuari-katuari, ni aku é sumésama wia ni kamu, zozo' um pinantikku kenu ém potot uman. Mengalé-ngaléi uman ni kamu é sumungkul um pinantik kenu karia i mahpaa-paaz.

²³Kata'uan nioula, si Timotius, si katuarita esa pa'émanen é méiondoloma im witi bui. Sa sia reweké i méyé wia ni aku, taré kai mahwalima mangé wia ni kamu.

²⁴Ipapaayopé'la u sigi'ku wia péléng sé tonaas niou wo wia péléng sé tou linenas ni Opo Empung. Sé katuari esa pa'émanen sé wia Italia é mapaayoma u sigi' wia ni kamu.

²⁵Mengalé-ngaléi uman ung kamang tatambér ni Opo Empung é menaté-natér ni kamu péléng.