Read Tombulu Ibrani 4 Bible Online

Ibrani 4 - Tombulu bible

Ibrani 4

¹Zozo' un taaz ni Opo Empung i muntep witi tampa makanaan-Na én zéi'kampé' méikana', taan mile-ilek wo tia' im wia ni kamu ém wéwéhan si pahgenangela in ikatula'u wo zéi'kan mata'u muntep witi tampa makanaan itii.

²Tanu ni kita ém pinapata'uan u nuwu' makapaazen, téntu kangkasii sé nimaopota ém pinapata'uano u nuwu' makapaazen, taan u nuwu' tinalinga néramo itii én zéi'kan siapa torona im wia ni séra, pahpaan ni séra én zéi'kan ma'éman u nuwu' itii.

³ Pahpaan ni kita sé ma'éman é mamuntep witu un tampa makanaan, tanu u méikua ni Opo Empung in téntii, “Pahpaan in totoz maupi' ni Aku é mahtiwa', ‘Ni séra én zéi'kan ikauntep witu un tampa makanaan ing kumana' karia-Ku.’ ” Ni Sia éng kimua in téntu zozo' un tampa itii é méisampet-Namola i niimek-Na rengané ung kaayahan kenu im winangun.

⁴ Kata'uantamo u niimek ni Opo Empung é méisampet-Namola, pahpaan witu um Pinantik Lenas, tumoro un endo kapitu é méipantik téntii, “Si Opo Empung éng kimana' witu un endo kapitu[5] im wana péléng am paayangen-Na.”

⁵ Witu um Pinantik Lenas é méipantik kangkasii in téntii, “Ni séra én zéi'kan ikauntep witu un tampa makanaan ing kumana' karia-Ku.”

⁶Pahpaano niitu, mémoikatuzu'mé im wéwéhan sé woopira sé maikauntep witu un tampa makanaan itii. Taan wia sé nimaopota sé puuna timalinga u nuwu' makapaazen[6] itii, zéi'kan nimuntep witu un tampa makanaan itii, pahpaan ni séra é soo mahtali-talinga wia si Opo Empung.

⁷ Pahpaano niitu tinotoz-Namo kasii un endo walina, niitumo un “endo kenu”. Wana an ta'un timondongé méikua ni Opo Empung mengiité si Daud witu um Pinantik Lenas[7] in téntii, “Witu un endo kenu, sa kamu tumalinga u Nuwu' ni Opo Empung, tia' ipahketéh un até niou!”

⁸ Pahpaan, sa si Yosua nimahwalimoma sé tou Israel i muntep witu un tampa pahkanaan itii, tantumo si Opo Empung én zéi'kan kumua wia si Daud in tumondong tumoro un endo walina.

⁹Niitumo, wia sé tou ni Opo Empung ém wéwéhampé' u sana endo méiwéhé ni Opo Empung ing kumana' tanu ni Sia ing kimana' witu un endo kapitu.

¹⁰ Pahpaan séi uman sé nimuntepo witi tampa u makanaan-Na itii, ni sia éng kimana'mo im wana péléng am paayangenna, tanu si Opo Empung ing kimana' wana am paayangen-Na.

¹¹Niitumo, tawimo kita mahtututu'la i muntep witi tampa pahkanaan itii, wo zéi'kan siapa zozo' in esa si zéi'kan méikauntep witi tampa pahkanaan itii pahpaan mahkiit uman am pahwangunen né tou zéi'kan mahtali-talinga si Opo Empung.

¹²Pahpaan u Nuwu' ni Opo Empung é mahwéhé ung katou-touan wo mahkawasa wo totoz tewel, lumousé um pisou tewel zua masaru, sa iwetuma én toro muntep makaz witu un tampa totoz lalem taka-takazan un asengan wo si roh én toro matampasan, téntu kangkasii am wukuna an zuhi wo am witu un untep an zuhi én toro matampasan. U Nuwu' itii kangkasii é makawawa in tumotoz ulit kaapa zéi'kan am witu ung genang né tou wo am paaz un até ni tou.

¹³Zozo' in esa én zéi'kan siapa sé winangun-Na sé méikawuni im witu u sinaru-Na. Pahpaan péléng am péléng éng kaile-ilekan-Na, niitumo ni kita péléng é léwo'zéi' makaulit wo mengali am wua'na am pemuali-mualinta witu u sinaru-Na.

¹⁴Pahpaan kita in tarékan é makaanumo si Walian Totoz Wangko', si nimangémomé witi kasendukan, si Yesus, si Oki' ni Opo Empung, niitumo tio-tionan um pa'émanenta.

¹⁵Pahpaan si Yesus, si Walian Wangko'ta én toro kangkasii mendan an zéi'kan enté'ta. Ni Sia ém pinema'wa'mo i ni Sia wia ung kaayahan tanu am pahpendanenta in tarékan, taan ni Sia én zéi'kan nimahwangunla a singkéla'.

¹⁶Niitumo, tia'mo kita maindé' i rumété wia si Opo Empung si rimumez witu u rurumezan-Na ing Kolano. Pahpaan i ni kita mangé witu u sinaru-Na, si Opo Empung é rumaraaté ni kita, zéi'kan mengiit un zéi'kan enté' wia ni kita, taan mengiit ung kalé'osan-Na. Si Opo Empung én tumambéré ang kamang wo menté' ni kita, wo kita tulungen-Na witu un oras ni kita i mekitulung.