Read Tombulu Ibrani 6 Bible Online

Ibrani 6 - Tombulu bible

Ibrani 6

¹Niitumo, méyémo kita méra i mahtata'u an tutuzu' a lumouspé'mé an tutuzu' kataré-taré u nimaéndo to'tolan tumoro um pa'émanen wia si Kristus, wo um pa'émanenta éng kalutu'na. Tia'mo mawuri sumaup wana an tutuzu' kataré-taré tumoro un tumula'ula am pemangu-mangunen an zéi'kan siapa torona wo kasii an tutuzu' tumoro kura i ma'éman si Opo Empung.

²Téntu kangkasii ni kita é léwo'zéi' i méramé im wana an tutuzu' kataré-taré a nimaéndo to'tolan tumoro u mahsarani[9], u mezezeta' u lengen[10] i méhé ung kamang wia sé tou, sé nimaté in itou sumaup ni Opo Empung wo tumoro un ukuman makaz ing kauré-uré.

³Niitumo, ni kai mengalé-ngaléi in énéané ni Opo Empung wo kita mahtata'u an tutuzu' a lumouspé'mé an tutuzu' kataré-taré i mangun um pa'émanenta ing kaenté'na.

⁴Pahpaan sé tou nima'émanomé wo nimé'annomé ung kamang ni Opo Empung wo sé nimakaileko ung kawasa ni Roh Lenas taan soomo ma'éman, ni séra én zéi'kan mamuali im werun sumaup.

⁵Ni séra kangkasii é nimé'annomé u lé'osna u Nuwu' ni Opo Empung wo nimé'annomé ang kawasa-Na, a mamualimokan i nimawerumoma ung kaayahan,

⁶taan maapuma niitu, ni séra soomo ma'éman, zéi'kan mamuali im werun sumaup in tumula'u a singkéla'. Ni séra én tanu simalip sumaup si Oki' ni Opo Empung wo mahséro' wia ni Sia witu u sinaru né tou lakez.

⁷Pahpaan un tana' mahsepsepa un zano uzan u sekezé mahtumpama witu um wawona é mangun an tinanem witu un tana' itii marembuz wo an tinanem itii wéwéhan torona wia sé timanem niitu, un tana' itii éng kinamang ni Opo Empung.

⁸ Taan sa un tana' itii én tinouan umané ang kuhun wo an zukut menulah, un tana' itii én zéi'kan siapa torona. Un tana' itii ém wéhan ni Opo Empung un epa' wo ing kamurian ém pakala'ungen.

⁹Katuari-katuari ikararaatéku, zozo' in téntu un ipahkua naima tumoro ni kamu, taan totoz ing kata'uan nai i ni kamu én zéi'kan tanu un tana' winéhan ni Opo Empung un epa'. Kata'uan nai ni kamu é makailek a lumouspé'mé ung kawangunan niitu. Niitu éng kamang kailekan né tou méipiloté im witu un ukuman wana a singkéla'.

¹⁰Pahpaan si Opo Empung én zéi'kan mahsanaweka, niitumo ni Sia én zéi'kan maliuz am pahpaayangen niou wo u raraatéan niou wia ni Sia u méipapailek niou karia i mahsawang sé tou-Na. Niitu ém pinahwangun niouomé rengané im puuna makaz in tarékan.

¹¹Taan un ikapaaz nai, ni kamu si esa wo si esa én uli-ulit i mahraa-raatéan makaz ni kamu ing kalekepala, wo am pengéré-ngéré'en niou é makailekan niou.

¹²Kasoo nai ni kamu i maéndo tou sé soo kumura. Taan ikapaaz nai ni kamu menou-nou tanu sé tou nimakailek u méitaaz ni Opo Empung pahpaan ni séra é ma'éman ni Sia wo pahpaan ung kaezenan néra.

¹³Si Opo Empung i niméhé un taaz-Na wia si Abraham, ni Sia é mahtiwa' karia u ngaran-Na in esa pahpaan zéi'kan siapa si lumousé ni Sia.

¹⁴ Kuan-Na, “Ni ko éng kamangeng-Ku wo mangun sé suzumu totoz malakez.”

¹⁵Si Abraham én totoz ezen i ma'ento' un taaz itii. Niitumo ni sia nimakailek u méitaaz ni Opo Empung wia ni sia.

¹⁶Sé tou i mahtiwa' éng karia u ngaran ni lumousé ni séra wo u ngaran pahpakén i mahtiwa' itii é menté' a méikuana ing kumana' am pahzéi-zéi'an.

¹⁷Niitumo, si Opo Empung én timiwa' i menté' un taaz-Na. Kapaaz-Na sé tou sé lamakailek un taaz-Na én uli-ulit mata'u i si Opo Empung é mangun a méitaaz-Na.

¹⁸Si Opo Empung én zéi'kan mamuali in tumowo witu u méitaaz wo un tiwa'-Na. Un zua kenu én zéi'kan mamuali i mawalina, pahpaano niitu kita sé mekikelung wia ni Sia én toro maenté' wo totoz ma'éman witu um pahéré'anta.

¹⁹ Si pahéré'anta é si Yesus. Ni Sia én tanumokan un jangkar enté' wo méikateptep, pahpaan ni Sia mahenté' um pa'émanenta. Si Yesus nimahpuunamoma i nimangé witu muri u roko' aapé' witi tampa lenas i rumété si Opo Empung in tumubus a singkéla'ta.

²⁰ Si Yesus si kataré-taré nimuntep witu un tampa itii wo nimuka u lalan wia ni kita wo toro muntep witu. Pahpaano niitu, ni Sia é nimaéndomo Walian Wangko' makaz ing kauré-uré mengiit ung katou-touan wo um pakahpaayang ni Melkisedek im puuna.