Read Tombulu Yakobus 1 Bible Online

Yakobus 1 - Tombulu bible

Yakobus 1

¹ U sigi'ku Yakobus, si ata ni Opo Empung wo ni Yesus Kristus si Mahpiara. Um pinantik kenu iwéhé wia sé mapulu' wo zua suzu ni Israel sé ma'émano wia si Kristus sé wana a séséngkotan.

²Katuari-katuariku, mahpaa-paazola zozo' lakez am pema'wa'en pahpendanen niou.

³Pahpaan kata'uan niouo, sa am pema'wa'an witu um pa'émanen niou itii é mangun ni kamu in ezen.

⁴Tia' mazéi' i ma'éman zozo' lakez am pema'wa'en makaz ung kaezenan niou uli-ulit malekep, wo ni kamu lekep wo wutul im wana am péléng.

⁵Taan sa im wia ni kamu ém wéwéhan si zéi'kan tahlous tulap, ni sia é léwo'zéi' i mahaléila ung katulapan itii wia si Opo Empung, tantumo niitu én iwéhé ni Opo Empung wia ni sia. Si Opo Empung é meripu' umané i mahwéhé niitu wia péléng sé tou wo zéi'mo megena-genang niitu.

⁶Taan sa sia mahaléi niitu é léwo'zéi' karia um pa'émanen wo zéi'kan mahzua-zua genang. Pahpaan si tou mahzua-zua genang éng kasuat u sempa' witi tasik, um pemolé-moléi uman u reges wayaan ung kasaruan.

⁷Si tou mahzua-zua genang én tia' mahgenangla im wéwéhan ung kailekannamé wia si Opo Empung,

⁸pahpaan si tou tanu niitu ung katou-touanna én zéi'kan méikatantu.

⁹Si katuari esa pa'émanen zéi'kan siapa apa, ni sia é léwo'zéi' i mahpaa-paaz sa sia irakék ni Opo Empung,

¹⁰ wo si tou wa'ilan é léwo'zéi' i mahpaa-paaz kangkasii sa sia iperorosla ni Opo Empung. Ni sia é mazéi' tanu am wungana an zukut u rewek uman maweles.

¹¹Pahpaan i si endo sumena'mé karia u seritna un totoz pasu' nimangun an zukut itii maweles, makaz am wungana é nimagogo wo ung kawangunana é nimazéi'ma. Téntu kangkasii si tou wa'ilan, ni sia é maté karegas ni sia i mahlalakez an zoitna.

¹²Mahpaa-paazola si tou ezen im wana am pema'wa'en, pahpaan sa sia ezen, ni sia é makailek ung kukulu[1], ung katou-touan makaz ing kauré-uré u mémoitaaz ni Opo Empung wia sé tou rumaraaté ni Sia.

¹³Sa wéwéhan si pahwa'wa'en, ni sia én tia' mahkua in téntii, “Ni aku éng karegas im pahwa'wa'en ni Opo Empung!” Pahpaan si Opo Empung én zéi'kan mata'u wa'wa'en ni léwo', wo zozo' in esa én zéi'kan siapa sé pahwa'wa'en-Na.

¹⁴Taan si tou, si esa wo si esa ém pahwa'wa'en u lelo léwo'na in esa, pahpaan ni sia é nienou wo méikapaan witu u lelo léwo'na itii.

¹⁵Sa u lelo léwo'na itii éng kiniitannala, niitu é mua'mé u singkéla'. Sa u singkéla' itii lekepo, niitu é mua'mé um patéan.

¹⁶Katuari-katuari ikararaatéku. Tia' kamu ikalulu!

¹⁷Péléng am pahkailekanta am wangun wo an zéi'kan siapa pahséro'an ém witi kasendukan a méyé, pahtumpamé ni Ama' si mahwanguné péléng a mahsena' witi langit a satorona é marimbengbenga. Taan ni Sia én zéi'kan tanu niitu, ni Sia én zéi'kan mahwali-walinala wo u lé'os-Na én zéi'kan mazéi-zéi'la.

¹⁸Witu um paaz-Na in esa, ni Sia nimangun ni kita nimaéndo oki'-Na mengiité u nuwu' kaulitan. Winangun-Na téntu wo kita maéndo wua'na kataré im wana am winangun-Na.

¹⁹Katuari-katuari ikararaatéku, totoz wéhanla genang ang kenu: Péléng sé tou é léwo'zéi' rewek i mahtalinga taan tia' tahlous rewek i mahnuwu' wo tia' rewek maupi'.

²⁰Pahpaan sa si tou maupi', ni sia én zéi'kan mahwangun an ulit ang kapaaz ni Opo Empung.

²¹Niitumo, itia'la péléng a makazi'zisen wo a léwo' totoz lakez am pemangu-mangunen niou. Wo sungkulela u nuwu' ni Opo Empung u mémoiwéhé witu un até niou karia u roros até. Pahpaan u nuwu' itii ém wéwéhan kawasa i milot ni kamu im witu un ukuman wana a singkéla'.

²²Ni kamu é léwo'zéi' i mahwangunla u nuwu' ni Opo Empung, zéi'kan uman mahtalinga niitu. Pahpaan sa zéi'kan téntu, ni kamu é mahtowomo witu un tou niou in esa.

²³Pahpaan sa si tou é mahtalinga uman u nuwu' ni Opo Empung taan zéi'kan mahwangun niitu, ni sia én tanu si tou mahilek ung giona witu u lélénoan.

²⁴Ni sia nimileka ung giona a sia mangé, a rengan kaliuzanala kura ung giona.

²⁵Taan si tou uli-ulit mahtata'u un ukum ni Opo Empung u lekep, u nimilot ni kita im witu un ukuman wana a singkéla', wo zéi'kan uman mahtalinga a maliuza taan uli-ulit mahwangun niitu, si tou itii é mahpaa-paaz pahpaan am pahwangunenna itii.

²⁶Sa si tou mahgenangla i ni sia é mahragés wia si Opo Empung, taan zéi'kan makaimek u lila'na, ni sia é mahtowomo witu un touna in esa. U raragésna wia si Opo Empung én zéi'kan siapa torona.

²⁷Un uli-ulit mahragés wo zéi'kan siapa um pahséro'an witu u sinaru ni Opo Empung, Ama'ta é mahileké sé zéi'mo siapa tu'a wo sé wéwéné mahesa-esamokan im wana ang kasusaan néra. Téntu kangkasii ni kamu, mile-ilekla én taa kamu ikakiitla i mahwangun a léwo'an wia ung kaayahan.