Read Tombulu Yakobus 2 Bible Online

Yakobus 2 - Tombulu bible

Yakobus 2

¹Katuari-katuariku, ni kita in tou ma'éman wia si Yesus Kristus Mahpiarata si pahsigi'en wo pahloozen én tia' meméléng tou.

²Pahpaan, sa wéwéhan si kimarai ung karai totoz wangun wo u sisim mas, wo wéwéhan kasii si tou zéi'kan siapa apa si kimarai ung karai zéi'kan wangun, a séra méyé witu um pahréwo-réwokan niou,

³wo ni kamu simungkul si tou kimarai ung karai wangun karia i mahkua, “Tuang, rumumezé witu u rurumezan wangun kenu!”, taan im wia si tou zéi'kan siapa apa éng kuan niou, “Rumendaiola witi kenuma!” kaapa, “Rumumezomé witu um welah rété un a'éku!”

⁴Karia i mahwangun an téntu, zéi'kankuaa ni kamu é meméléng uman tou wo nimaéndomo menonotoz wia si kasuat tou karia ung genang léwo'?

⁵Katuari-katuari ikararaatéku! Talingana, zéi'kankuaa si Opo Empung é niméléng sé tou sé pahkuan né tou wia ung kaayahan kenu in tou zéi'kan siapa apa, i maéndo tou wa'ilan witu um pa'émanen, wo maéndo tou-Na witi Kakolanoan-Na, tanu u méitaaz-Na wia sé tou rumaraaté ni Sia?

⁶Taan sé tou zéi'kan siapa apa ém pinahséro'an niouola. Zéi'kankuaa sé tou wa'ilan sé mahzézéha wo nimahwali ni kamu witi penonotozan in ulit kaapa zéi'kan am pahwangunen né tou?

⁷Zéi'kankuaa ni séramo sé mahséro' u Ngaran totoz pahsigi'en, u nimangun ni kamu nimaéndo tou ni Opo Empung?

⁸ Taan ni kamu é nimangunola u lé'os, sa kamu uli-ulit mahwangun un ukum ni Opo Empung un ipahpuu-puuna tanu u méipantik witu um Pinantik Lenas in téntii, “Iraraatéla si kasuatmu tou tanu ko i rumaraaté un toumu in esa.”

⁹Taan sa kamu meméléng uman tou, ni kamu é simingkéla'mola, pahpaan un ukum itii un timuzu'mé i ni kamu é simingkéla'mola im witu un ukum-Na.

¹⁰Séi uman si mahkiit péléng un ukum itii, taan zéi'kan mahwangun un esaané im witu, si tou itii é simala'mola wana péléng un ukum itii.

¹¹ Pahpaan ni Sia si kimua, “Tia' mahsamek”, ni Sia kangkasii éng kimua, “Tia' mahwunu' tou.” Niitumo, sa kamu zéi'kan mahsamek taan mahwunu' tou, ni kamu kangkasii é simala'mola witu un ukum itii.

¹²Mahnuwu'la wo mahwangunla tanu sé tou matotozen ulit kaapa zéi'kan am pahwangunen néra, karia un ukum un zuméi' a singkéla' né tou.

¹³Pahpaan si tou zéi'kan siapa raraatéan én totozen in ulit kaapa zéi'kan karia un zéi'kan siapa raraatéan. Taan u raraatéampé' un enté' taan un ukuman.

¹⁴Katuari-katuari apa un torona sa si tou mahkua i ni sia é ma'éman, taan zéi'kan pahileken wana am pahlé'osenna? Toro wé um pa'émanen tanu niitu i milot ni sia im witu un ukuman wana am pahlé'osenna?

¹⁵Sa si katuari tuama kaapa katuari wéwéné zéi'mo siapa karaien wo zéi'mo wutul um pahkanen i mendo-endo,

¹⁶a si esaané im wia ni kamu kumuala, “Mangémo, mile-ileka. Kumaraila ung karai papasu'an wo kumanla makawesuh!” Apa un torona sa am pandungen ni tou itii zéi'kan winéhannama?

¹⁷Téntu kangkasii um pa'émanen: Sa um pa'émanen itii én zéi'kan pahileken wana am pahlé'osen, um pa'émanen itii én zéi'kan siapa torona.

¹⁸Taan woo wéwéhan tou mahkua, “Wia ni ko ém wéwéhan um pa'émanen wo wia ni aku ém wéwéhan um pahlé'osen.” Ni sia ém wingkotengku, “Ipapaileké wia ni aku um pa'émanennu itii taan zéi'kan kinaria um pahlé'osennu, wo ni aku é mapailek wia ni ko um pa'émanengku karia am pahlé'osengku.”

¹⁹Pa'émanennu i si Opo Empung én esa uman? Niitu ém wangun! Taan maan sé sétang é ma'éman niitu wo mahgerger i maindé'.

²⁰É tou lemou, paaz ko wé in tarékan i makaulité sa um pa'émanen zéi'kan kinaria um pahlé'osen én zéi'kan siapa torona?

²¹ Si Abraham, si nimaopota é niéndo ulit ni Opo Empung pahpaan am pahlé'osenna, i si Ishak oki'na méiwéhéna wia si Opo Empung witu um peraragésan.

²²Ilekenola, um pa'émanen é léwo'zéi' in ipapailekla wana am pahlé'osen. Pahpaan wana am pahlé'osen itii um pa'émanen é malekep.

²³ Karia in téntu, nimalekepola u méipantik witu um Pinantik Lenas in téntii, si Abraham é ma'éman si Opo Empung, wo pahpaan um pa'émanenna itii si Opo Empung éng kimua i ni sia én ulit im witu sinaru-Na. Niitumo, si Abraham ém pahkuan “Kalo ni Opo Empung.”

²⁴In tarékan é niilek niouo, i si tou é niéndo ulit pahpaan am pahlé'osenna, zéi'kan uman pahpaan um pa'émanen.

²⁵ Téntu kangkasii si Rahab, si wéwéné sangaya itii. Ni sia é niéndo ulit pahpaan a liné'osna, i sé tou Israel sé mémahtata'u um wanua tua'na pahento'anna méiwunina witi waléna, a séra sawanganna i nimondolé kimiit lalan walina.

²⁶Pahpaan tanu un awak sa zéi'kan kinaria ni roh é nimaté, téntu kangkasii um pa'émanen, sa zéi'kan kinaria am pahlé'osen é nimaté.