Read Tombulu Yakobus 4 Bible Online

Yakobus 4 - Tombulu bible

Yakobus 4

¹Wisa a méyé am pahéndo-éndoan wo am pahkoro'an niou? Zéi'kankuaa wana a lelo léwo' un awak niou a mahkoro' i mahkakawasa un tou niou?

²Wéwéhan am pelelo-lelo niou, taan zéi'kan kinakiitan, ang kamu munu' tou. Ni kamu é mahtéutéu, taan am pelelo-lelo niou én zéi'kan kinaayoan, ang kamu mahéndo-éndoan wo mahkoro'. Zéi'kan siapa ung kinailekan niou, pahpaan ni kamu én zéi'kan nimengaléi.

³Kaapa ni kamu é nimengaléitaréla, taan zéi'kan siapa ang kinailekan nioula, pahpaan am pahaléien niou i mengaléi é simala'. Am pahaléien niou é mahwuwutul uman a lelo léwo' un awak niou.

⁴É kamu sé nimaliuz a méitaaz! Zéi'kan kata'uan niou wé sa kamu mahkaloan karia ung kaayahan, ni kamu é makahkoro' wo si Opo Empung? Niitumo, séi si mahkaloan karia ung kaayahan kenu, ni sia nimangun un touna maéndo kakoro' ni Opo Empung.

⁵Tia' kamu mahgenangla a méipantik witu um Pinantik Lenas én zéi'kan siapa ung kalakoana ing kimua in téntii, “Si roh si méiwéhémé ni Opo Empung wia ni kita én téiz wia ni kita sa zéi'kan mahtali-talinga wia ni Sia!”

⁶ Taan ung kamang méitambér-Napé' um wangko' taan niana péléng. Niitumo, witu um Pinantik Lenas é méipantik in téntii, “Si Opo Empung é makahkoro' wo sé tou loozan, taan rumaraaté sé tou roros até.”

⁷Niitumo, iwéhéla un tou niou wo kumiitla si Opo Empung, sarula si tonaas né sétang, wo sia tumingkasé im wia ni kamu.

⁸Rumétéla wia si Opo Empung, ni Sia kangkasii é rumété wia ni kamu. Weresila u lengen niou, é kamu in tou mahsingkéla', wo weresila un até niou, é kamu sé mahzua-zua genang!

⁹Ni kamu é léwo'zéi' in uli-ulit mene'sel, tekur wo mahamé'. Ung ké'ké' niou é sawelanla un amé' wo u mahpaa-paaz niou é sawelanla un tekur.

¹⁰Irorosla un tou niou witu u sinaru ni Mahpiara wo ni kamu irakék-Na.

¹¹Katuari-katuari, tia' kamu mahtatawurukan! Séi si mahtawuruk kaapa mapahsasala' si katuarina esa pa'émanen, ni sia é mahtawuruko wo mapahsasala'mo un ukum ni Opo Empung. Wo sa ko mapahsasala' un ukum itii, ni ko én zéi'kan mahwangun un ukum itii taan nimaéndomo menonotoz ulit kaapa zéi'kan un ukum itii.

¹²Si Opo Empung si mahkawasa i milot sé tou im witu un ukuman wana a singkéla' wo luméwo' sé tou, ni Sia uman si mahwangun an ukum wia sé tou wo si Mahtotoz sé tou. Taan, séi ndéén ko wé akaz ko paaz i mahtotoz si kasuat tou?

¹³ Niitumo, é kamu sé mahkua in téntii, “In endo kenu kaapa i sando, ni kai é mangé witi wanua kenuma, im wana ni kai é mento' sana ta'un wo mahwangké-wangkér i menéro zoit”,

¹⁴taan zéi'kan kata'uan niou apa u mamuali i sando wo makura ung katou-touan niou. Ung katou-touan niou itii é masuat wo u semu, un zéi'kan uré in ilekena a mazéi'ma.

¹⁵Un ulitna ni kamu é léwo'zéi' ing kumuala, “Sa énéané ni Mahpiara, ni kai é mamenou-nou wo mangun ang kenu kaapa ang kenuma.”

¹⁶Taan in tarékan ni kamu é mahloo-looz un tou niou witu ung kawera'an niou. Péléng ang kaloozan niou itii é simala'.

¹⁷Niitumo, sa si tou mata'u kura i mahwangun a lé'os, taan zéi'kan pahwangunenna, si tou itii é mahsingkéla'mo.