Read Tombulu 1 Petrus 3 Bible Online

1 Petrus 3 - Tombulu bible

1 Petrus 3

¹ Téntu kangkasii isésakuma wia ni kamu sé wéwéné makamahayo, ni kamu é léwo'zéi' i mahtali-talinga wia si mahayo niou si esa wo si esa. Karia in téntu, sa wéwéhan si mahayo zéi'kan ma'éman, maan ni séra zéi'kan nuwu'an nioula, ni séra é ma'éman u Nuwu' ni Opo Empung pahpaan i mahileka am pahwangunen niou.

²Ni séra é ma'éman sa mengile-ngilek an totoz wangun am pahwangunen niou wo mahkiit ung kapaaz ni Opo Empung.

³ Tia' wo ni kamu pahileken uman ing kéndis im witu un awak, tanu ang kenu: um wuuk ém pahayamen, mahperong un tou karia am peperong mas am wangunen kaapa kimarai ang karai totoz mahal.

⁴Taan u nimangun ni kamu kéndis ém witu un até a méyé un zéi'kan mahzéi-zéi'la tanu ang kenu: eluz uman wo zéi'kan mengupi-ngupi'. Niitumo un totoz kapaaz ni Opo Empung.

⁵Pahpaan téntumo sé wéwéné mahsigi' si Opo Empung im puuna i mangun un tou néra ing kéndis. Ni séra én uli-ulit niméré' uman wia si Opo Empung wo si esa wo si esa mahtali-talinga wia si mahayona.

⁶ Tanu si Sara mahtali-talinga wia si Abraham wo kasii mahtawah ni sia in tuangna. Ni kamu é suzu ni Sara sa ni kamu mahwangun a lé'os wo zéi'kan maindé' wana an apa uman a ma'indé' ni kamu.

⁷ Téntu kangkasii ni kamu in tuama makamahayo, ni kamu é léwo'zéi' i menou-nou karia im wangun wo si mahayo niou si esa wo si esa. Gena-genangen, ung ketez néra én zéi'kan masuat karia ung ketez niou. Pahsigi'ela séra pahpaan ni séra kasii nimakailek ung katou-touan u méitambéré ni Opo Empung. Pahwangunela niitu wo am pengaléien niou talingan ni Opo Empung.

⁸Ing kamurian, kapaazku ni kamu én esa genang, mahgena-genangan, rumaraaté sé tou esa pa'émanen, meripu' umané i rumaraaté wo zéi'kan wera'.

⁹Tia' u léwo'an ém waéran niou karia u léwo'an, kaapa u sasalou karia u sasalou. Taan, ipengaléi nioula wia si Opo Empung wo séra kamangené, pahpaan ni kamu én tinawah-Na i maéndo kamang wia sé tou walina, wo karia in téntu ni kamu é makailek ung kamang.

¹⁰Witu um Pinantik Lenas é méipantik in téntii, “Séi si lumelo ung katou-touan, wo paaz milek an endona lé'os, u lila'na é léwo'zéi' im pahimeken wo tia' menuwu'-nuwu' a léwo', wo um wiwihna én tia' mengua-ngua an towo.

¹¹Ni sia é léwo'zéi' in tumula'umola a léwo'an wo mahwangunla a lé'os. Ni sia kasii é léwo'zéi' i mahtututu'la makaz i makailek u mahlé'o-lé'osan.

¹²Pahpaan um weren ni Opo Empung é mena'u-na'u sé tou mahwangun an ulit, wo u lunteng-Na é mahtalinga am pengaléien né mekitulung. Taan ni Sia é makahkoro' wo sé tou sé memangu-mangun a léwo'an.”

¹³Séi si paaz mangun a léwo'an wia ni kamu, sa ni kamu zéi'kan kumana' i memangu-mangun a lé'os?

¹⁴ Taan zozo' ni kamu i mendan an zézéha pahpaan i memangu-mangun an ulit, ni kamu é mahpaa-paazola. Tia'mo maindé' kaapa paharétan im wia sé mahzézéha ni kamu.

¹⁵ Taan sigi'ela si Kristus im witu un até niou pahpaan ni Sia é Mahpiara. Tumégamla i mingkot sa wéwéhan si tou meligau tumoro um pahéré'an niou wia si Kristus. Taan ni kamu i mahwingkot é maheluz umanla wo karia i mahsigi',

¹⁶wo karia ung genang lé'os. Sa um pakahwingkot niou én téntu, niitu é mangun sé tou menuwu-nuwu' a léwo'an tumoro ni kamu sé mahwangun a lé'os pahpaan i mahkiit si Kristus é maizang, pahpaan a léwo'an penuwu-nuwu'en néra itii.

¹⁷Tawimo ni kamu in zézéha pahpaan i mahwangun a lé'os, sa niitu ang kapaaz ni Opo Empung, taan taré ni kamu zézéha pahpaan ni kamu i mahwangun a léwo'an.

¹⁸Pahpaan si Kristus kangkasii é nimaté makasa uman in ziméi' a singkéla'ta. Ni Sia si mahwangun an ulit é nimaté in timubus sé tou mahwangun an zéi'kan ulit, wo kita toro ipahwali-Na wia si Opo Empung. Ni Sia ém winunu' i ni Sia in tou uman, taan ni Sia é méitoumé sumaup ni Roh Lenas im wia sé nimaté.

¹⁹Wo pahpaan kinawasa ni Roh lenas, ni Sia mahwoka' u Nuwu' Lé'os ni Opo Empung wia sé roh witi bui.

²⁰ Sé roh itii é roh né tou sé soo mahtali-talinga si Opo Empung im witu un oras ung katou-touan ni Nuh. In toro niitu si Opo Empung én ezen i ma'ento' sé tou in tumula'ula a singkéla' néra, karegas si Nuh i mahwangun u londéi tua'na. Taan toyo' uman sé tou nimuntep witu u londéi tua'na itii, ni séra ém walu uman sé tinulung ni Opo Empung im witu un ampuhan.

²¹Un ampuhan itii én toro pasuaten karia u sasarani in tarékan un tumuzu'mé si Opo Empung nimiloté ni kamu im witu un ukuman wana a singkéla', mengiité si Yesus Kristus si méitoumomé sumaup ni Opo Empung im wia sé nimaté. Ni kamu i sinarani én zéi'kan i meresi un tou niou, taan u sasarani én tumuzu'mé i ni kamu mahaléi wia si Opo Empung i makaileké un até weresi.

²²In tarékan si Yesus Kristus é nimangémo witi kasendukan a rumumezla witu u rurumezan totoz pahsigi'en witu ung kakan ni Opo Empung. Wo péléng sé malaekat, péléng sé mahkawasa wo péléng ang kaketezan ém witumo ung kawasa ni Yesus Kristus.