Read Tombulu 1 Petrus 4 Bible Online

1 Petrus 4 - Tombulu bible

1 Petrus 4

¹Pahpaan si Kristus é nimendanomé an zézéha witu un awak-Na, niitumo ni kamu kangkasii é léwo'zéi' tumégamla karia i mahgenang tanu niitu. Pahpaan séi si nimendanomé an zézéha witu un awakna, ni sia én zéi'mo memua-muali a singkéla'.

²Niitumo, karegas ni kamu i menou-noupé' wia ung kaayahan, am pemangu-mangunen niou é mahkiit umanla ang kapaaz ni Opo Empung, tia' mahkiit uman a lelo léwo' un awak.

³Pahpaan toromo ung kauré am pemangu-mangunen niou mendo-endo i mahkiit uman ang kapaaz né tou zéi'kan mata'u si Opo Empung. Am pemangu-mangunen niou in toro niitu é: Mahkiit uman a lelo léwo' un awak, mahmuali an zéi'kan wangun, matetewelen, memésta-mésta uman akaz i matewelen wo wayaan ang kamualian, mahongkot wia sé opo-opo a sinéro' im pahwangunen.

⁴Niitumo, sé tou zéi'kan mata'u si Opo Empung é mengusi-ngusingsing i nimilekla ni kamu, pahpaan ni kamu én zéi'mo mahkii-kiit ni séra in zéi'kan kumana' mahmuali an zéi'kan wangun. Pahpaano niitu ni séra mahtawuruko ni kamu.

⁵Taan ni séra é léwo'zéi' i lamakaulit péléng am winangun néramé wia si Opo Empung. Ni Sia é nimimeko in tumotoz ulit kaapa zéi'kan am pinahwanguné né tou, sé menou-noupé' wo sé nimatémo.

⁶Pahpaano niitu, u Nuwu' Lé'os tumoro si Yesus é méipapata'umo kangkasii wia sé tou nimatémo, wo maan an awak néra é nimatémo pahpaan niukum, masuat wo a mamuali wia péléng sé tou, taan sé roh néra é mamenou-nou mengiit um paaz ni Opo Empung.

⁷Ung kaakazan ung kaayahan é lelezokan. Niitumo, pahimikela ung katou-touan niou wo tuméga-tégam, wo kamu toro uli-ulit i mengaléi.

⁸ Taan un totoz ipahpuu-puuna én uli-ulit i mahraa-raatéan, pahpaan sa kita mahraa-raatéan, ni kita én zéi'mo megenang-genang a siningkéla' né tou.

⁹Pahsungkulela si tou mangémé witi walé niou karia in zéi'kan mema'o-ma'os.

¹⁰Ni kamu si esa wo si esa ém winéhan un tatambér ni Opo Empung. Niitumo ni kamu sé tou lé'os mengimek an tatambér itii, pahimekela lé'os a méitambéré itii i mahsawang sé tou walina.

¹¹Sa wéwéhan tou tinambéran i mahkua u Nuwu' ni Opo Empung wia sé tou, ni sia é léwo'zéi' mahnuwu' mahkiit u Nuwu'-Na. Wo sa wéwéhan si tinambéran i sumawang sé kasuat tou, pahwangunennala niitu karia ung ketez méiwéhémé ni Opo Empung wia ni sia. Niitumo, wangunen nioula lumé'o-lé'os an tatambér itii wo sé tou lumooz wo sumigi' si Opo Empung. Karia in téntu si Opo Empung é loozen wo sigi'en wana péléng am péléng mengiité si Yesus Kristus. Ni Siamo si mahkawasa wo wangun i sigi'en wo loozen makaz ing kauré-uré. Amin.

¹²Katuari-katuari ikararaatéku! Tia' ikakompo' niou i mendan an zézéha totoz wutez in tarékan. Pahpaan an zézéha itii é ma'wa' um pa'émanen niou wo an zézéha itii én zéi'kan lumousé ung kinanaram.

¹³Taan, ni kamu é mahpaa-paazola, pahpaan an zézéha itii én tanu an zézéha pinahpendané ni Kristus. Karia in téntu, i si Kristus méyé sumaup wo mapailek ung kawangko'an-Na, ni kamu én toro mahpaa-paaz makaz i mahkonta-konta'.

¹⁴Ni kamu é mahpaa-paazola sa wéwéhan tou sé mahséro' wia ni kamu pahpaan i mahkiit si Kristus. Pahpaan si Roh si pahloozen wo pahsigi'en ém wia ni kamu, ni Siamo si Roh ni Opo Empung.

¹⁵Tia' im wia ni kamu ém wéwéhan sé totoz nimazézéha pahpaan i nimunu'la tou kaapa rimemu' kaapa tou léwo' kaapa paaz i mahrikoka' sé tou.

¹⁶Taan sa ni kamu nimazézéha pahpaan ni kamu én tou Sarani, ni kamu én tia'mo maizang. Tawimo ni kamu i lumoozla wo sumigi'la si Opo Empung pahpaan ni kamu é mahkiito si Kristus.

¹⁷Pahpaan in tarékan én orasnamo si Opo Empung in tumotoz ulit kaapa zéi'kan am pahwangunen né tou, wo sé kataré-taré totozen-Na é sé tou-Na in esa. Sa Sia in tumotoz éng kumataréma wia ni kita in tou-Na, kura rékén u mamuali wia sé tou soo ma'éman u Nuwu' Lé'os ni Opo Empung?

¹⁸ Im witu um Pinantik Lenas é méipantik in téntii, “Sa sé tou ulit én tawi zéi'kan ipilot im witu un ukuman wana a singkéla' néra, kura u lamamuali wia sé tou zéi'kan pandung si Opo Empung wo mahsingkéla' wia ni Sia?”

¹⁹Pahpaano niitu, sé tou nimazézéha pahpaan um paaz ni Opo Empung, ni séra é léwo'zéi' i méhéla un tou néra wia ni Sia karia i memangu-mangun uman a lé'os. Ni Sia si nimangun péléng am péléng wo zéi'kan maliuz im wana a méitaaz-Na.