Read Tombulu 2 Petrus 2 Bible Online

2 Petrus 2 - Tombulu bible

2 Petrus 2

¹ Rengané im puuna ém wéwéhano sé nabi towo kimaria sé tou ni Opo Empung. Téntu kangkasii in tumondong im wia ni kamu ém wéwéhan sé méster towo. Ni séra é matumuzu' an tutuzu' zéi'kan ulit, u mahlululu uman sé tou makaz sé tou é maikaléwo'. Lumousé niitu ni séra é mahkélong i si Yesus Kristus é si mahkawasa si timubus ni séra. Niitu u nimangun ni séra i rewek léwo'en.

²Lakez sé tou makumiit ung katou-touan né méster towo u mahkiit uman a lelo léwo' un awak néra im wana an zéi'kan wangun. Am pahlé'osen néra itiimo a nimangun sé tou lakez i mahséro' u lalan kaulitan ni Opo Empung.

³Pahpaan ung kaangkuman né méster towo itii, ni séra é mahtututu' i menéro zoit lakez wia ni kamu karia i mahsirita a sirita winangun néra uman. Taan pahpaan am pahwangunen néra itii, un ukuman wia ni séra én urémo niimek wo un endo si Opo Empung i luméwo' ni séra én zéi'mo isoro'.

⁴Pahpaan sé malaekat mahsingkéla' én zéi'kan niampungan ni Opo Empung. Ni séra é méilombo'-Nama witi naraka am buin witu un tuleng makaz witu un endo ni séra in totozen im wana am pahwangunen néra.

⁵ Téntu kangkasii si Opo Empung é nimukum sé tou menou-nou wia ung kaayahan im puuna sé zéi'kan pandung ni Sia karia un ampuhan. Akaz uman si Nuh, si mahwoka' ung kaulitan wo sé pitu tou walina sé tinulung-Na im witu un ampuhan itii.

⁶ Téntu kangkasii i si Opo Empung nimukum um wanua tua'na Sodom wo ung Gomora. Lina'ung-Na am wanua tua'na itii i mapagenang wia sé tou, u mamuali wia sé tou in tumondong sé zéi'kan pandung ni Sia.

⁷ Taan si Lot én tinulung-Na pahpaan ni sia é mahwangun an ulit ang kapaaz-Na. Si Lot én totoz in zézéha pahpaan am pemuali-mualin né tou sé zéi'kan mazéi' i mahmuali a léwo' a mahkiit uman a lelo léwo' un awak néra.

⁸Si Lot si tou mahwangun an ulit itii é mahwitu-witu um wanua tua'na itii karia né tou sé memua-muali a léwo'. Sekez in endo ém pengile-ngileken wo penalinga-nalingana a léwo'an pahwangunen né tou witu um wanua tua'na itii. Niitu u nimangun ni sia totoz mazézéha.

⁹Niana péléng an tumuzu'mé wia ni kita, i si Opo Empung é mata'u in tumulung sé tou sé mahkiit um paaz-Na, sa séra wana am pema'wa'en. Wo ni Sia kangkasii é mata'u i muntep sé tou léwo' witi bui in zézéhan witu un endo i ni Sia tumotoz am pinahmuali néramé,

¹⁰sé ipahpuu-puuna é sé tou sé mahkiit uman a lelo léwo' un awak néra a mahwangun ni séra in zéi'kan wangun wo mahséro' ung kawasa ni Opo Empung. Sé méster towo itii én totoz wuaya wo wera', makaz ni séra én zéi'mo maindé' i mahséro' sé pahloozen wo pahsigi'en witi kasendukan.

¹¹Zozo' ung kaenté'an wo ung kawasa né malaekat é lumouspé'mé sé méster towo itii, taan sé malaekat én zéi'kan kawisa wo mahséro' i mahtoké wia sé pahloozen wo pahsigi'en witi kasendukan im witu u sinaru ni Opo Empung.

¹²Taan sé méster towo itii é masuat wo sé binatang lemou sé méianaké én akaz uman in tionan wo wunu'en. Ni séra é mahséro' wana an zéi'kan kata'uan néra, niitumo ung kinawalian taka-takazan ni séra ém wunu'en tanu sé binatang meneza' tou,

¹³wo mamendan an zézéha pahpaan a léwo'an pahlé'osen néra. Ung kapaaz néra é mahkan wo mahelep zéi'kan kaimekan, zozo' in endo. Ni séra én tanu a sezingna wo rimberek, pahpaan sa séra mahkan mahwali-wali karia niou, ni séra én zéi'kan mazéi' i mahtowo wia ni kamu.

¹⁴Sa mileka si wéwéné, méyé um paaz witu ung genang néra i sumamek karia ni wéwéné itii wo ni séra én zéi'kan maseso' i memua-muali a singkéla'. Sé tou zéi'kampé' tahlous ma'éman wia si Yesus ém pahenouen néra wo séra ikalulu. Ni séra é nimanaramo i menou-nou mahkiit ung kaangkuman néra. Ni séra é makailek un epa' ni Opo Empung.

¹⁵ Pahpaan ni séra én timula'umola u lalan kaulitan, ni séra é méikalulumo. Ni séra é mahkiit um pahmualin ni Bileam, oki' ni Beor, si paaz im pahwaéran i mahmuali a singkéla'.

¹⁶Taan si Opo Empung én totoz siméro' si Bileam im wana a singkéla'na, pahpaan si keledaina si zéi'kan mata'u mahnuwu' é nimuwu'mé tanu si tou wia si nabi itii, siméro' ni sia makaz ni sia én zéi'kan nimamuali ing kimiit ung kalemouanna.

¹⁷Sé méster towo itii én zéi'kan siapa torona, tanu ung kembu'an nimaperamo, tanu u semu nimazéi'ma pahpaan i méiwalima u reges repet. Ni séra é niimekano ni Opo Empung un ukuman in iuntep witu ung karimbengbengan un totoz rimbengbeng.

¹⁸Pahpaan ni séra é menuwu-nuwu' am wera' wo an zéi'kan siapa torona. U lelo léwo' un awak ém pahpakén néra i mahenou sé tou taré ikapiloté im witu ung katou-touan né tou méikalulu.

¹⁹Sé méster towo itii é méhé un taaz wia sé tou i lamaéndo tou zéi'mo ata, taan ndéén sé méster towo itii ém pahata-atan ang kinanaram néra wana a léwo'an a mahléwo' sé tou. Pahpaan si kinalamo é nimaéndomola ata ni kimala ni sia.

²⁰Pahpaan i nimata'umola si Yesus Kristus é si Mahpiarata wo si nimilot ni kita im witu un ukuman wana a singkéla', niitumo ni séra é méikapilotomé im witu u lelo léwo' un awak um wia ung kaayahan kenu. Taan sa séra ikawurila sumaup i mahkiit uman u lelo léwo' un awak um wia ung kaayahan kenu, ung katou-touan néra in tarékan é luméwo'pé'mé ung katou-touan néra im puuna in zéi'kampé' mata'u si Yesus Kristus.

²¹Niitumo, tawimo ni séra én zéi'kan nimata'uma an tutuzu' kaulitan ni Opo Empung, taan ung kinata'uan nérakala an tutuzu' itii taan ing kamurian ni séra én timula'ukala am perénta ni Opo Empung a méipahtuzu'mo wia ni séra.

²² Im wia ni séra én ulito ung kukuan kenu, “Si asu é nimawurima sumaup a masumila' u méilua'na, wo si wawi linelé'mo é nimawurima sumaup a mahuli-uliz witu um pentak pinahuli-ulizanna.”