Read Tombulu 1 Yohanes 1 Bible Online

1 Yohanes 1 - Tombulu bible

1 Yohanes 1

¹ Um pinantik kenu én tumoro u Nuwu' ni Opo Empung u mahwéhémé ung katou-touan, um wiamo rengané ing kataré-taré, un tinalinga naimo, u niilek naimo karia um weren nai, um winéhan naimo genang wo um pinahtionan naimomé. Niitumo u méipantik nai an iwéhéma wia ni kamu.

² Ung katou-touan itii é méipapaileko wo niitu é niilek naimo wo in tarékan, ni kai é mahwoka' wia ni kamu a niilek wo tinalinga nai tumoro ung katou-touan makaz ing kauré-uré, u memali-mali karia ni Ama' wo u méipapaileko wia ni kai.

³A niilek wo an tinalinga naimo itii én iwoka' nai kasiima wia ni kamu, wo kamu toro maesa karia nai. Wo um pahesa-esaanta ém pahesa-esaan karia ni Ama' wo karia ni Oki'-Na, si Yesus Kristus.

⁴Péléng niia én ipantik naima wo iwéhéma wia ni kamu, wo u mahpaa-paaz nai én toro malekep.

⁵Ang kenumo a nuwu' tinalinga naimomé wia si Oki'-Na, wo ikua nai wia ni kamu: Si Opo Empung én ayah wo im wia ni Sia én totoz zéi'kan siapa karimbengbengan.

⁶Sa kita kumua i ni kita é nimaesamo karia-Na, taan ung katou-touanta ém witupé' ung karimbengbengan, ni kita é mahtowo wo zéi'kan mahwangun ang kaulitan.

⁷Taan sa kita menou-nou witu un ayah tanu ni Sia ém witu un ayah, ni kita é nimaesa karia né tou walina, wo un zaha' ni Yesus, si Oki'-Na itii é meresi ni kita im wana a singkéla'ta.

⁸Sa kita kumuala i ni kita én zéi'kan simingkéla', ni kita é mahtowomo im witu un touta in esa, wo ung kaulitan én zéi'kan siapa im wia ni kita.

⁹Sa kita makaulitla a singkéla'ta wia si Opo Empung, ni Sia én zéi'kan maliuz wana an taaz-Na wo zéi'kan mahsanaweka, niitumo a singkéla'ta én ampungan-Na wo ni kita ém weresin im wana a léwo'an.

¹⁰Sa kita kumuala i ni kita én zéi'kan simingkéla', ni kita é nimangunola ni Sia in tantowo wo u Nuwu'-Na én zéi'kan witu un atéta.