Read Tombulu 1 Yohanes 2 Bible Online

1 Yohanes 2 - Tombulu bible

1 Yohanes 2

¹Ni kamu in oki'ku, ang kenu ém pinantikkuma wo méiwéhéma wia ni kamu, wo kamu zéi'kan mahwangun a singkéla'. Taan sa wéwéhan im wia ni kamu si mahwangun a singkéla', wéwéhan si makumelung ni kita im witu u sinaru ni Ama', ni Siamo si Yesus Kristus, si zéi'kan mahsanaweka.

²Ni Sia nimaté nimaéndo raragés, wo a singkéla'ta én ampungan. Zéi'kan uman a singkéla'ta, taan maan a singkéla' péléng né tou sé wia ung kaayahan.

³Sa kita mahkiit am perénta ni Opo Empung, niitu én tumuzu'mé i ni kita é mata'u ni Sia.

⁴Séi si mahkua, “Ni aku é mata'u ni Sia”, taan zéi'kan mahkiit am perénta-Na, ni sia én tantowo wo im wia ni sia én zéi'kan siapa ang kaulitan.

⁵Taan séi si mahkiit a nuwu' ni Opo Empung, u raraaté ni Opo Empung én uli-ulit lekepo im wia si tou itii. Karia in téntu ni kita én toro mata'ula i ni kita ém wia ni Sia a méyé.

⁶Séi si mahkua i ni sia é menou-nou karia ni Opo Empung, ni sia é léwo'zéi' i menou-nou tanu ung katou-touan ni Kristus.

⁷ Katuari-katuari ikararaatéku, um pinantikku kenu én zéi'kan perénta weru im wia ni kamu taan perénta uré um wiamo ni kamu rengané ing kataré-taré. Um perénta uré kenu é Nuwu' tinalinga niouo.

⁸Taan ni aku kasii é mantika um perénta weru wia ni kamu, un ulit im wia ni Sia wo ulit im wia ni kamu. Pahpaan ung karimbengbengan é mahzéi'moma wo un uli-ulit ayah é mahsena'momé.

⁹Séi si mahkua i ni sia é menou-nou witu un ayah, taan si mazi'zis sé katuarina esa pa'émanen, ni sia é menou-nou witu ung karimbengbengan makaz in tarékan.

¹⁰Séi si rumaraaté si katuarina esa pa'émanen, ni sia é menou-nou witu un ayah, wo zéi'kan siapa u mangun ni sia ikalulu.

¹¹Taan séi si mazi'zis sé katuarina esa pa'émanen, ni sia é menou-nou witu ung karimbengbengan wo mahlampang witu ung karimbengbengan. Ni sia én zéi'mo mata'u wisa un angéanna, pahpaan ung karimbengbengan é limetokola ni sia.

¹²É kamu sé koki', ni aku é mantika ang kenu wia ni kamu, pahpaan a singkéla' niou é niampungano pahpaan u ngaran ni Yesus Kristus.

¹³É kamu sé ama', ni aku é mantika ang kenu wia ni kamu, pahpaan ni kamu é mata'umo ni Sia, si wiamo rengané ing kataré-taré. É kamu sé weru tou, ni aku é mantika ang kenu wia ni kamu, pahpaan si tonaas né sétang éng kinala niouola.

¹⁴É kamu sé koki', ni aku é mantika ang kenu wia ni kamu, pahpaan ni kamu é mata'umo si Ama'. É kamu sé ama', ni aku é mantika ang kenu wia ni kamu, pahpaan ni kamu é mata'umo ni Sia, si wiamo rengané ing kataré-taré. É kamu sé weru tou, ni aku é mantika ang kenu wia ni kamu, pahpaan ni kamu én enté' wo u Nuwu' ni Opo Empung ém wia ni kamu wo si tonaas né sétang éng kinala niouola.

¹⁵Tia' kamu rumaraaté ung kaayahan wo péléng am witu. Sa si tou rumaraaté ung kaayahan, si tou itii én zéi'kan rumaraaté si Ama'.

¹⁶Pahpaan péléng am wia ung kaayahan, tanu a: lelo léwo' un awak, péléng an ilekena éng kapaaz wo ang kaweraan, péléng niana zéi'kan wia si Ama' a méyé taan wia ung kaayahan kenu a méyé.

¹⁷Ung kaayahan wo péléng ang kapaaz né tou é lelezo mazéi', taan si tou mahwangun ang kapaaz ni Opo Empung é menou-nou makaz ing kauré-uré.

¹⁸É kamu in oki'ku, in tarékan é merétémoma ung kaakazan ung kaayahan, wo tanu an tinalinga niouo i si kakoro' ni Kristus[1] é méyé, wo in tarékan lakez sé kakoro' ni Kristus ém wiamo. Nianamo an tumuzu'mé wia ni kita sa un oras kenu én uli-ulit merétémoma ung kaakazan ung kaayahan.

¹⁹Ulit i ni séra ém wia ni kita woan, taan ni séra én zéi'kan uli-ulit méikarékén wia ni kita. Pahpaan sa séra uli-ulit méikarékén wia ni kita, tantumo ni séra é memali-malipé' kariata. Taan niitu é mamuali, wo toro kata'uantala i ni séra péléng én uli-ulit zéi'kan méikarékén wia ni kita.

²⁰Taan ni kamu é nimakailekola si Roh Lenas si méiwéhémé ni Yesus Kristus, niitumo ni kamu péléng é mata'umo an tutuzu' ulit.

²¹Ni aku é mantika an iwéhé wia ni kamu, zéi'kan pahpaan ni kamu én zéi'kan mata'u ang kaulitan, taan pahpaan niitu éng kata'uan niouo wo kasii pahpaan kata'uan niouo in zéi'kan siapa an towo a mahondolé wana an tutuzu' kaulitan.

²²Séi wé si towo itii? Zéi'kankuaa ni sia si mahkélong sa si Yesus é Mesias? Si kenumo si kakoro' ni Kristus, si mahkélong si Ama' wo si Oki'-Na.

²³Pahpaan séi si mahkélong si Oki', ni sia kangkasii én zéi'kan makaanu si Ama'. Séi si makaulitla i ma'éman wia si Oki', ni sia kangkasii é makaanu si Ama'.

²⁴Wo ni kamu, an tinalinga niouo rengan ing kataré-taré, niana é léwo'zéi' i memitu-mitu un até niou. Sa un tinalinga niouo rengané ing kataré-taré é memitu-mitumo un até niou, ni kamu é menou-nou nimaesa karia ni Oki' wo ni Ama'.

²⁵Ang kenumo a mémoitaaz-Na in esa wia ni kita, niitu éng katou-touan makaz ing kauré-uré.

²⁶Péléng niana én ipantikkuma wia ni kamu, tumoro sé tou mahtututu' i mahlululu ni kamu.

²⁷Taan ni kamu ém winéhano ni Yesus Kristus si Roh Lenas ing kumawasa wia ni kamu. Pahpaan si Roh Lenas wiapé' ni kamu, niitumo ni kamu én zéi'mo memandung sé tou walina in tumuzu' ni kamu. Pahpaan si Roh Lenas én timuzu'mo ni kamu tumoro péléng am péléng, wo péléng a méituzu'-Na itii én ulit, zéi'kan towo. Niitumo ni kamu sé im puuna én tinuzu'mo ni Roh Lenas é léwo'zéi' i menou-nou mahkiit um paaz ni Yesus Kristus.

²⁸Niitumo in tarékan, é kamu sé oki'ku, ni kamu é léwo'zéi' i menou-nou nimaesa karia ni Kristus, wo sa Sia méyémo sumaup im witu un endo itii, ni kita én zéi'kan maindé' wo zéi'kan maizang wia ni Sia.

²⁹Sa kata'uan niouo i si Opo Empung én ulit, ni kamu kasii é léwo'zéi' i mata'u im péléng sé tou mahwangun ang kaulitan én oki'-Na.