Read Tombulu 2 Yohanes 1 Bible Online

2 Yohanes 1 - Tombulu bible

2 Yohanes 1

¹Um pinantik kenu ém wia ni aku, si penatua wo iwéhé wia sé totoz ikararaatéku, si ina'[1] pinéléng ni Opo Empung wo wia sé oki'na. Zéi'kan uman ni aku si rumaraaté ni kamu, taan maan péléng sé tou sé mata'umo an tutuzu' kaulitan,

²pahpaan an tutuzu' itii ém witumo un atéta wo mamenaté-natér ni kita makaz ing kauré-uré.

³Ung kamang tatambér, u raraatéan wo ung kaluasan witu un até, um wia si Opo Empung si Ama' wo um wia si Yesus Kristus, si Oki' ni Ama' é menaté-natér ni kita witu ung kaulitan wo u raraatéan.

⁴Ni aku én totoz mahpaa-paaz i nimilekla wéwéhan sé woopira im wia sé oki'mu menou-nou mahkiit an tutuzu' kaulitan tanu a méiperénta ni Ama'.

⁵ In tarékan, pahaléiengku wia si ina', wo kita totoz i mahraa-raatéan. Un ipahkuaku kenu én zéi'kan perénta weru im wia ni kita taan perénta urémo wia ni kita rengané im puuna i ni kita taré ma'émanla.

⁶Kenumo u raraaté itii, ni kita é léwo'zéi' i mahkiit am perénta-Na. Um perénta itii, ni kamu é léwo'zéi' i menou-nou witu u raraatéan, tanu un tinalinga niouo rengan ing kataré-taré.

⁷Pahpaan im wia ung kaayahan é lakez sé tou mahlululu uman wo soo makaulit i si Yesus Kristus é niméyémo wia ung kaayahan in tou uman. Sé tou itiimo sé melulu, wo kakoro' ni Kristus.

⁸Niitumo tuméga-tégamla, én taa um pa'émanen niou wia si Yesus Kristus um pinaayang naimo im puuna én ikaliong, wo péléng um wawaér wia ni kamu én toro kailekan niou.

⁹Si tou zéi'kan mahkiit an tutuzu' ni Kristus ang kumiitla an tutuzu' walina, ni sia én zéi'kan makaanu si Opo Empung. Séi si mahkiit an tutuzu' ni Kristus, ni sia é makaanu si Ama' wo si Oki'.

¹⁰Niitumo, sa wéwéhan si méyé wia ni kamu wo zéi'kan mahtuzu' an tutuzu' ni Kristus, si tou itii én tia' pahsungkulen niou i muntep witu um walé niou wo tia' mahwéhé u sisigi'an wia ni sia.

¹¹Pahpaan séi si sumungkul ni sia, si tou itii é méikakiitola wana a léwo'an pahwangunenna.

¹²Zozo' i lakezpé' a léwo'zéi' in ikuakuma wia ni kamu, taan ni aku é soo sa niitu ipantik umana. Taan ni aku é mahéré'la i ni aku in esa si mémahilekan mahilekan karia niou i sumirita nimasaruan wo u mahpaa-paazta é malekep.

¹³Sé oki' ni katuarimu wéwéné si pinéléng ni Opo Empung é mapaayoma u sigi' wia ni ko.