Read Tombulu Yudas 1 Bible Online

Yudas 1 - Tombulu bible

Yudas 1

¹ Um pinantik kenu ém pinantikku, Yudas, ata ni Yesus Kristus wo katuari ni Yakobus, iwéhé wia sé tou tinawah wo ikararaaté ni Opo Empung Ama'ta wo sé pahtéizan-Na i maéndo anu ni Yesus Kristus.

²Mengalé-ngaléi uman un tatambér ni Opo Empung, ung kaluasan witu un até wo u raraatéan é malake-lakez im wia ni kamu.

³ Katuari-katuari ikararaatéku, ni aku én totoz mahtututu' i nimantik tumoro ni kita péléng i mémoipiloté im witu un ukuman wana a singkéla'. Ni aku én totoz paaz i mantik um pinantik kenu wo sumésama wia ni kamu, wo kamu uli-ulit mahtututu' i rumembe-rembet witu um pa'émanen u mémoiwéhé wia sé tou linenas ni Opo Empung.

⁴Pahpaan mémoikatuzu'mé im wéwéhano sé tou mahwuni-wuni kimariala ni kamu. Ni séra én urémo tinotoz in ukumen. Ni séra é sé tou zéi'kan pandung si Opo Empung wo mahséa' u raraatéan-Na, wo séra toro menou-nou mengiit u lelo léwo' un awak. Ni séra kasii é soo makaulit i si Yesus Kristus si Mahkawasa wo si Mahpiarata én esa uman.

⁵ Zozo' ni kamu én totozo mata'u niana péléng, taan ipapagenangkuma wia ni kamu i si Opo Empung im puuna é nimiloté sé tou-Na im witi tana' Mesir. Taan tumondong niitu im wia sé tou Israel sé zéi'kan ma'éman én zéi'kan méiwaya-Na i menou-nou.

⁶Sé malaekat kangkasii sé simala' i nimaké ung kawasa méiwéhé wia ni séra an tumula'umé um pahwéha-wéhan néra é niapus-Na karia un aapus un zéi'kan mahwuka-wukala makaz ing kauré-uré, witu ung karimbengbengan witi lalem ung kaayahan makaz witu un endo wangko', in totozen ulit kaapa zéi'kan am pinahwangun néramé.

⁷ Téntu u nimamuali witi Sodom wo Gomora karia am wanua tua'na makaliklik witu. Am pahwangunen né tou wana é masuat wo am pahwangunen né malaekat itii, mahwangun a samek wo mahwuwutul uman a lelo léwo' un awak néra an zéi'kan tanu ang kinanaram. Ni séra péléng é niukum karia un api zéi'kan mahpaté-patéla i mapagenang wia péléng sé tou.

⁸Téntu kangkasii sé tou mengingipi itii é mahkilamu' an awak néra wo meroros ung kawasa ni Opo Empung wo kasii mahséro' wia péléng sé pahloozen wo pahsigi'en witi kasendukan.

⁹ Si Mikhael si tonaas né malaekat i mahzéi-zéi'an karia ni tonaas né sétang, soo tumotoz karia a séséro' wia si tonaas né sétang tumoro séi si makailek un awak ni Musa. Si Mikhael éng kimua uman, “Mengalé-ngaléi si Opo Empung é rumekaké ni ko!”

¹⁰Taan ni séra é mahséro' uman wana péléng an zéi'kan kata'uan néra. Ni séra é mahkiit uman ang genang néra tanu sé binatang lemou. Nianamo a nimangun ni séra ikaléwo'.

¹¹ Ikaléwo'la séra pahpaan ni séra éng kimiit um pinahmualimé ni Kain wo ni séra éng kimiit si Bileam si nimahlulumé sé tou pahpaan im pahwaéran. Ni séra kasii én ikaléwo' pahpaan mahsaru si Opo Empung tanu si Korah.

¹²Ni séra én tanu a sezingna im wia ni kamu. Pahpaan i ni kamu mahkan mahwali-wali ing gumenang u raraatéan ni Opo Empung, ni séra én zéi'mo siapa izangna i mahkan wo zéi'kan mahgenang sé tou walina. Ni séra én tanu a ninahak zéi'kan mamuali uzan un ipahwali-wali uman u reges. Ni séra én tanu uman ung kai zéi'kan mahwua' im witu un oras i mua', um winutwutan an ahmutna wo uli-ulit nimaté.

¹³Tanu u sempa' makaindé'en witi tasik, u mahsewumé, ni séra kangkasii é mapailek am pahmualin néra ang kaizangnokané. Ni séra én tanumokan sé tototi'en mahéra-éra sé méimeko ni Opo Empung ung karimbengbengan witi lalem ung kaayahan makaz ing kauré-uré.

¹⁴ Si Henokh, si suzu kapitu ni Adam éng kimua u méikuamé ni Opo Empung tumoro ni séra, kuana, “Un ulitna, si Opo Empung é méyé karia né mariwu-riwu tou linenas-Na.

¹⁵Ni Sia é métumotoz ulit kaapa zéi'kan am pinahwanguné né tou wo mémukum sé tou léwo' pahpaan a léwo'an pahmualin néra wo péléng a nuwu' zéi'kan wangun an ipahkua né tou mahsingkéla' itii wia si Opo Empung.”

¹⁶Sé tou itii é sé mengengu-ngengut wo mema'o-ma'os tumoro am pengalin néra, menou-nou mahkiit a lelo léwo' un awak néra. A sumah néra é mahkua ang kaweraan néra wo meloo-looz sé tou i mahlalakez am pahkailekan néra.

¹⁷Taan ni kamu katuari-katuari ikararaatéku, gena-genangen a mémoipahkuama né aatu ni Yesus Kristus, Mahpiarata, im puuna.

¹⁸ Pahpaan ni séra éng kimuamo wia ni kamu, “Merétéma ung kaakazan ung kaayahan, mondolé sé menénéro', sé menou-nou mahkiit uman a lelo léwo' un awak néra.”

¹⁹Sé tou itii é mahkayo' wo mahkiit um paaz ung kaayahan wo menou-nou zéi'kan siapa si Roh Lenas.

²⁰Taan ni kamu katuari-katuari ikararaatéku, pahimekela ung katou-touan niou karia i mahkiit uman um pa'émanen un totoz lenas wo mengaléila karia ung kawasa ni Roh Lenas.

²¹Ime-imeken un toumu witu u raraatéan ni Opo Empung, karegas i ma'ento' u raraatéan ni Mahpiarata, si Yesus Kristus, i méhémé ung katou-touan makaz ing kauré-uré.

²²Ipapailekla u raraatéan wia sé tou mahzua-zua genangpé',

²³wo tulungela ni séra tanu ing kuméhongé ni séra im witu un api. Taan im wia sé walina én ipapailekla u raraatéan karia i mile-ilek én taa ikakiit i mahwangun a léwo'an tanu ni séra wo ikazi'zisla maan ang karai néra ang kinilamu'mo a lelo néra wana a singkéla'.

²⁴Wia ni Sia si mahkawasa si mahtéiz wia ni kamu én taa kamu ikasundui, wo si nimahwali ni kamu sé zéi'kan siapa um pahséro'an karia i mahpaa-paaz i marumendai sumaru witu un tampa-Na um pahloozen wo pahsigi'en.

²⁵Si Opo Empung si esa uman, si nimiloté ni kita im witu un ukuman wana a singkéla', mengiité si Yesus Kristus Mahpiarata. Wia ni Sia uman u sigi' wo looz, ung kawangko'an, ung kaketezan wo ung kawasa um wiamo rengané im puuna, in tarékan wo makaz ing kauré-uré. Amin.