Read Tombulu Wahyu 10 Bible Online

Wahyu 10 - Tombulu bible

Wahyu 10

¹An ilekengkuma si malaekat ketezen walina timumpamé im witi kasendukan, sinaput u ninahak, wo witu um wawo un uluna ém wéwéhan un zuni', ung giona é mahsena' tanu si endo, wo un a'éna én tanumokan un tombol melaya-layas.

²Witu u lengenna ém wéwéhan ung kitap kori' ginulung, u nimawukamo. Un a'éna kakan é liméék witu um wawo un tasik wo un a'éna kawihi é liméék witu um wawo un tana'.

³A sia kumérété, u nuwu'na én tanumokan si singa mahséngker. I ni sia nimakanuwu'moma, an talingané un erut pitu nimuwu'mé.

⁴I nimakanuwu'momé un erut pitu itii, ipahpapantikkumo a méikuamé un erut itii, taan talingangkumé um witi kasendukan éng kimuamé, “Tia'mo ipahpapantikmu itu! Totoz in iwunimula an ipahkuamé an erut pitu itii.”

⁵ Kumawusa niitu, si malaekat niilekku si rimendai witu um wawo un tasik wo witu um wawo un tana', nimayata u lengenna kakan witi langit,

⁶a sia mahtiwa' witu u ngaran-Na si menou-nou makaz ing kauré-uré, si nimangun u langit wo péléng am witu, ung katanaan wo péléng am witu, wo un tasik wo péléng am witu, kuana, “Un oras si Opo Empung i mangun ang ginenang-Na én zéi'mo isoro'!

⁷Taan si malaekat kapitu i sumengoma um pontuangna, in toro niitumokan an tinotoz tumoro an ipahwuni-wuni ni Opo Empung é malekep, tanu a méipahwoka'-Namo wia sé ata-Na, ni séramo sé nabi.”

⁸ An talingangkumé um witi kasendukan éng kimua kasiimé wia ni aku, kuana, “Mangémo, ma'éndoné ung kitap ginulung u nimawukamo, um witu u lengen ni malaekat rimendai witu um wawo un tasik wo witu um wawo un tana' itii.”

⁹A ni aku mangé wia si malaekat itii, am pahaléiengkumé ung kitap ginulung itii, wo niitu iwéhénamé wia ni aku. Kuana wia ni aku, “Éndona wo itu kanenla. Niitu é mapa'it im witu um pootmu, taan im witu u sumahmu, niitu én tombal tanu u rarina'.”

¹⁰Éndongkumé ung kitap itii im witu u lengen ni malaekat itii, an itu kanengkuma. Niitu im witu u sumahkutuu én tombal tanu u rarina'. Taan i nino'notkumoma, niitu én zéi'kan tariis im witu um pootku pahpaan nimapa'itoma.

¹¹Ang kuana wia ni aku, “Totoz i maikuamu kasiila a méikuamé ni Opo Empung tumoro a mawangunen-Na wia sé tahsasana wanua, sé tahsasana réwok mahtuari, sé tahsasana nunuwu'en wo wia sé kolano.”