Read Tombulu Wahyu 13 Bible Online

Wahyu 13 - Tombulu bible

Wahyu 13

¹ An ilekengkuma si binatang makaindé'en nimondolé witu un tasik. A sungé ni binatang makaindé'en itii é mapulu' wo an uluna ém pitu. Wana a rawis a sungéna ém wéwéhan am poporongen né kolano. Wo wana an uluna ém pinantikan a ngaran séséro' wia si Opo Empung.

² Si binatang niilekku itii, un touna é masuat wo si macan tutul, un a'éna é masuat wo un a'é ni beruang wo u sumahna é masuat wo u sumah ni singa. Si binatang itii ém winéhanla ni naga ung ketezna, u rurumezanna ing kolano wo ung kawasana um wangko'.

³An ilekengkuma un uluna esa ém wéwéhan um walulang. Im péla'pé', niitu én toro makawali ni sia i maté, taan um péla' itii é lé'oso. Pahpaano niitu, péléng sé tou wia ung kaayahan é mengusi-ngusingsing i nimileka si binatang makaindé'en itii, a séra kumiit ni sia.

⁴A séra mahongkot wo mahsigi' wia si naga pahpaan ni sia é niméhéla ung kawasana wia si binatang itii. Ni séra kasii é mahongkot wo mahsigi' si binatang itii a mahkua, “Séi si kasuat ni binatang kenu? Wo séi si makawawa ing kumoro' sumaru ni sia?”

⁵Si binatang makaindé'en itii é niénéan i mahkua ang kaweraan wo mahséro' wia si Opo Empung. Ni sia kangkasii ém winéhan ung kawasa i mangun niitu epatna pulu' wo zuana loloho'en ung kauréna.

⁶ A si binatang itii rengan mahséro' wia si Opo Empung, mahséro' u ngaran-Na wo mahséro' um pahwéha-wéhan-Na wo péléng sé mahento' witi kasendukan.

⁷ Ni sia kasii é niénéan ing kumoro' wo kumala sé tou ni Opo Empung wo winéhan ung kawasa i merénta wia péléng sé tahsasana suzu wo sé tahsasana réwok mahtuari wo sé tahsasana nunuwu'en wo sé tahsasana wanua.

⁸ Si binatang itii ém pahongkotan wo pahsigi'en péléng né tou mahento' wia ung kaayahan, sé rengané ung kaayahan kenu im winangun, a ngaran néra én zéi'kan méipantik witu ung Kitap Katou-touan un anu ni Anak ni Domba, si kinerizo.

⁹Séi si wéwéhan lunteng é mahtalingama lé'os!

¹⁰ Séi si tinotozo im buin, tantumo ni sia é maiuntep bui. Séi si tinotozo im wunu'en karia um pisou, ni sia é léwo'zéi' im wunu'en karia um pisou. Niitumo un totoz ipahpuu-puuna, sé tou ni Opo Empung é léwo'zéi' in ezen wo tia' mazéi' i ma'éman.

¹¹An ilekengku kasiima si binatang makaindé'en walina nimondolé witu lalem un tana'. Si binatang itii én zua u sungé masuat wo u sungé ni anak ni domba wo um pakahnuwu'na én tanu um pakahnuwu' ni naga.

¹²Witu u sinaru ni binatang kataré, si binatang kazua kenu mahwangun am péléng karia ung kawasa ni binatang kataré. Péléng ung kaayahan wo péléng sé mahento' witu ém winangun ni binatang kazua itii i mahongkot wo mahsigi' wia si binatang kataré, si pélaan um woanokan nimangun ni sia i maté taan u lé'oso.

¹³Si binatang kazua itii é mahwangun a makakompo'en an zéi'mo kakuaan. Lumousé niitu, witu u sinaru né tou lakez, ni sia é mahtumpamé un api witi langit wia ung kaayahan.

¹⁴Si binatang kazua itii é mahlulu sé tou mahento' wia ung kaayahan karia a makakompo'en, a méiwéhémo wia ni sia im pahwangunen witu u sinaru ni binatang kataré. Méiatu ni binatang kazua itii sé tou mahento' wia ung kaayahan i mangun um patong ni binatang kataré, si pélaan im winira' taan menou-noupé', im pahsigi'en.

¹⁵Wo si binatang kazua itii ém winéhan ung kawasa i méhé un asengan witu um patong ni binatang kataré itii. Karia in téntu, si patong ni binatang kataré itii én toro mahnuwu' wo toro mahwangun apa uman taka-takazan péléng sé tou sé zéi'kan mahongkot wo mahsigi' si patong ni binatang itii ém wunu'en.

¹⁶Si binatang kazua itii kangkasii é nimatu péléng sé tou, séra in tou kanaramen kaapa in tou pahsigi-sigi'en, tou wa'ilan kaapa tou zéi'kan siapa apa, ata kaapa zéi'mo ata, im wéhan un tanda witu u lengen kakan kaapa wana an tungtung néra.

¹⁷Wo zéi'kan siapa tou wo toro mangkér kaapa tumeles sa sia zéi'kan winéhan un tanda itii. Un tanda itii é ngaran ni binatang itii kaapa rérékénan u ngaranna.

¹⁸Un ipahpuu-puuna im wia'i éng katulapan. Séi si tulap, tawimo sia i rumékénla lé'os u rérékénan ni binatang itii. Pahpaan u rérékénan itii é rérékénan u ngaran ni tou. Wo u rérékénan itii én enemna atus enemna pulu' wo enem.