Read Tombulu Wahyu 16 Bible Online

Wahyu 16 - Tombulu bible

Wahyu 16

¹An talingangkumé u nuwu' rimez witi untep um Walé ni Opo Empung kimuamé wia sé pitu malaekat itii, “Mangémo wo maiwuwu'mé witi kaayahan an upi' ni Opo Empung a méitahu' wana am pitu eelepan itii.”

² Mangé si malaekat kataré, a mamuwu'mé wia ung kaayahan a méitahu' witu un eelepan um wia ni sia. Am péléng sé tou winéhan un tanda ni binatang itii wo sé mahongkot i mahsigi' si patong ni binatang itii touané ang kupes makaindé'en wo totoz rumara.

³Si malaekat kazua mamuwu'mé witi tasik u méitahu' witu un eelepan um wia ni sia. A mamualima zaha' un zano witi tasik tanumokan un zaha' ni tou nimatémo wo péléng sé menou-nou witi tasik é nimaté.

⁴ Si malaekat katelu mamuwu'mé wana a so'so'an wo ang kembu'an a méitahu' witu un eelepan um wia ni sia. Am péléng an zano witu mamualima zaha'.

⁵Talingangkumé si malaekat si mahkawasa wana an zano itii kimuamé, “Ni Ko én zéi'kan mahsanaweka, ni Ko ém wia in tarékan wo wiamo rengan im puuna, ni Ko é lenas, pahpaan ni Ko é niméhémomé un ukuman kenu.

⁶Ni séra é nimunu'mo sé tou ni Opo Empung wo sé nabi, ni séra kasii ém winéhan-Numola un zaha' in elepen. Un ukuman itii um wangun im wia ni séra!”

⁷An talingangkumé im witu um pahtunuan a raragés wia si Opo Empung, mahkuamé, “O Mahpiara, Opo Empung, Si Totoz Mahkawasa, ni Ko i mahtotoz ulit kaapa zéi'kan am pahwangunen né tou én ulit wo zéi'kan mahsanaweka.”

⁸Si malaekat kaepat mamuwu'mé wia si endo u méitahu' witu un eelepan um wia ni sia. A si endo itii wéhana ung kawasa i luma'ung sé tou karia un api.

⁹Sé tou é lina'unga karia um pasu'na un api totoz wuaya. Niitumo, ni séra é mahséro' u ngaran ni Opo Empung, si mahkawasa wana péléng a meléwo' itii wo ni séra é soo tumula'u a singkéla' néra i lumooz wo sumigi' ni Sia.

¹⁰ Si malaekat kalima mamuwu'mé witu u rurumezan ing kolano ni binatang makaindé'en itii, u méitahu' witu un eelepan um wia ni sia. A marimbengbenga ung kakolanoan ni binatang itii, taka-takazan sé mahongkot wia si binatang itii é mahketep lila' pahpaan in totozo raraan.

¹¹A séra mahséro' wia si Opo Empung si witi kasendukan pahpaan a rumara wo ang kupes néra. Taan ni séra én totoz soo tumula'u a singkéla' néra.

¹² Si malaekat kaenem mamuwu'mé witi so'so'an selah u makangaran Efrat, a méitahu' witu un eelepan um wia ni sia, a maperama u so'so'an itii. Karia in téntu, sé kolano sé witi sendangan a méyé én toromo lumampang witu.

¹³An ilekengkuma im witu u sumah ni naga wo im witu u sumah ni binatang makaindé'en wo kasii im witu u sumah ni nabi towo itii é nimondolé sé telu roh léwo' tanumokan sé pékak.

¹⁴Sé roh né sétang itiimo sé nimahwanguné a makakompo'en wo ni séra kasii sé manimenéro sé kolano wia péléng ung kaayahan i maesaan ing kumoro' witu un endo wangko' ni Opo Empung Si Totoz Mahkawasa si kumala sé kakoro'-Na.

¹⁵ “Ilekené, ni Aku i méyé én tanu si maremu'. Mahpaa-paazola si tou totoz timégam wo niméhé genang witu ung kinaraina, wo sia i lumampang én zéi'kan maizang pahpaan in timangkol.”

¹⁶ A sé roh léwo' telu itii ruméwoké sé kolano witu un tampa, um witu u nunuwu'en Ibrani ém pahkuan Harmagedon.

¹⁷Si malaekat kapitu mamuwu'mé witi wentangan a méitahu' witu un eelepan um wia ni sia. An talingané im witu u rurumezan ni Kolano um witi untep um Walé ni Opo Empung, kimuamé, “Nimakazola.”

¹⁸ Mitpité u sena'na un tila'pong wo menderé un erut, a méhzo'mé totoz repet un zéi'kampé' kawisa nimahmua-mualila rengané sé tou i menou-nou wia ung kaayahan.

¹⁹ A mapahteluma um wanua tua'na itii wo makemuma am wanua tua'na né tahsasana wanua sé zéi'kan mata'u si Opo Empung. A si Opo Empung ikagenanga um wanua tua'na Babel itii, i mangun sé witu um wanua tua'na itii melep un anggor pa'it méitahu' witu un eelepan u mawuta-wuta un upi'-Na.

²⁰ Péléng ang katanaan é nimazéi'ma wo ang kentur én zéi'mo pahilekena.

²¹ Un uzan éis é mahtumpamé im witi langit mahtoromé sé tou. Ung kawutez un éis esa ém woo limana pulu' kilo[14]. A sé tou mahséro' wia si Opo Empung pahpaan un uzan éis an totoz meléwo' itii.