Read Tombulu Wahyu 17 Bible Online

Wahyu 17 - Tombulu bible

Wahyu 17

¹ A méyé si esa im wia sé pitu malaekat sé mahali-ali am pitu eelepan itii, ang kumuamé wia ni aku, “Méyémo wia'i, ni ko én tuzu'angku un ukuman wia si wéwéné sangaya ipahkua-kua si rimumez witi tampa lakez zano.

² Sé kolano wia ung kaayahan é simamekola karia ni wéwéné sangaya itii. Maan sé mahento' wia ung kaayahan ém winangunnamola mahsamek pahpaan in tewelen nimelep un anggor méiwéhéna.”

³ A ni aku kawasanla ni Roh ni Opo Empung, an ipahwalima ni malaekat itii witi kapelasan. Im witu niilekkumé ém wéwéhan si wéwéné rimumez wia si binatang si totoz rangdang, si pinantikan mawuta-wuta a ngaran séséro' wia si Opo Empung. An ulu ni binatang itii ém pitu wo a sungéna é mapulu'.

⁴ Si wéwéné itii éng kimarai u roko' monong wo totoz rangdang. Ni sia ém pinerong a mas, am watu totoz mahal wo a mutiara. Witu u lengenna ém wéwéhan un eelepan mas am wangunen, u mawuta-wuta a léwo'an wo a makati'tiren pahpaan ung kasamekanna.

⁵Wo witu un tungtungna ém pinantikan u ngaran ung kalakoana é méiwunipé'. U méipantik itii én téntii, “Babel totoz ipahkua-kua! Ina' péléng né wéwéné sangaya wo péléng a léwo'an wia ung kaayahan.”

⁶Ilekengkuma si wéwéné itii én teweleno pahpaan nimelep an zaha' né tou ni Opo Empung wo an zaha' né tou sé mahkua a niilek wo tinalinga néra tumoro si Yesus. Ni aku i nimileka si wéwéné itii én totoz mengusi-ngusingsing.

⁷Ang kuan ni malaekat itii wia ni aku, “Kaa ko mengusi-ngusingsing? Ni ko éng kuaangku un ipahwuni-wuni tumoro si wewéné itii wo un tumoro si binatang makaindé'en si rinumezan ni wéwéné itii, si binatang pitu ulu wo mapulu' sungé.

⁸ Si binatang makaindé'en niilekmuma ing kataré, im puuna ni sia ém wiamo, taan in tarékan én zéi'mo wia. Ni sia é mondolé im witu um woso um patéan i maléwo'en. Sé tou mahento' wia ung kaayahan, sé zéi'kan méipantik witu ung kitap katou-touan rengané ung kaayahan kenu im winangun é mengusi-ngusingsing i nimileka si binatang, si im puuna ém wiamo taan in tarékan én zéi'mo wia wo mawia sumaup.

⁹Un ipahpuu-puuna wia'i éng genang kinaria ung katulapan. Am pitu ulu ni binatang makaindé'en itii ém pitu kentur rinumezan ni wéwéné itii.

¹⁰Am pitu ulu itii kasii é sé pitu kolano. Sé lima im wia sé kolano itii é nimatémo. Si esa ém wiapé' wo si esa kasii én zéi'kampé' niméyé. Sa si esa itii méyé, ni sia é merénta taan zéi'kan mauréma.

¹¹Si binatang makaindé'en itii si i makasa ém wiamo taan in tarékan én zéi'mo wia, ni sia é si esaané im wia sé pitu kolano. Ni sia i mawurimé sumaup é maéndo kolano kawalu, taan ni sia zéi'kan mauréma én ikaléwo'mo.

¹² A mapulu' sungé niilekmuma itii, ni séramo sé mapulu' kolano sé zéi'kampé' mahperénta. Taan ni séra é makailek ung kawasa i merénta ing kolano karia ni binatang makaindé'en itii, ung kauréna é sana jam.

¹³Ni séra é nimaesaan i méhé ung ketez wo ung kawasa wia si binatang makaindé'en itii.

¹⁴Ni séra éng kumoro' sumaru si Anak ni Domba. Taan si Anak ni Domba éng kumala ni séra, pahpaan si Anak ni Domba itii én Tuang péléng né tuang, wo kasii Kolano péléng né kolano. Wo sé tou sé memali-mali karia ni Anak ni Domba itii kasii éng kumala ni séra. Sé tou itii é sé tinawah, sé pinéléng wo kasii sé zéi'kan mazéi' i ma'éman wia si Opo Empung.”

¹⁵Ang kuano kasii ni malaekat itii wia ni aku, “Péléng an zano niilekmumo, u rinumezan ni wéwéné sangaya itii, niitu ém péléng sé tahsasana wanua, péléng sé tahsasana suzu, péléng sé tahsasana réwok mahtuari, wo péléng sé tahsasana nunuwu'en.

¹⁶U mapulu' sungé un niilekmumé wo kasii si binatang makaindé'en itii é mazi'zis si wéwéné sangaya itii. Péléng a sangkum ni wéwéné itii éng kahaten néra wo ni sia én tangkolan néra. Ni séra é sumeza' u lé'ona ni wéwéné itii wo luma'ung ni sia.

¹⁷Pahpaan si Opo Empung é mahpaayango witu un até néra i mangun ang kapaaz-Na. Si Opo Empung nimangun ni séra nimaesaan i méhé ung kawasa néra i mahperénta wia si binatang makaindé'en itii, makaz péléng a nuwu' ni Opo Empung linekepoma.

¹⁸Si wéwéné niilekmumo itii én tumuzu'ma um wanua tua'na pahkua-kua u mahperénta wia péléng sé kolano wia ung kaayahan.”