Read Tombulu Wahyu 2 Bible Online

Wahyu 2 - Tombulu bible

Wahyu 2

¹A si Oki' ni Tou kumuala wia ni aku, “Ipantikmula wo iwéhéma wia si malaekat[1] si wia sé jamaat witi Efesus in téntii: ‘Kenumo u Nuwu' um wia ni Sia a méyé, si timion sé pitu tototi'en karia u lengen-Na kakan wo mahlampang wana am pinaselat am pitu pahto'tolan solo a mas am wangunen a méipenoo-nooz.

²Kata'uang-Ku péléng am pinaayang niou. Ni kamu é mahtututu' i mahwangun ang kapaaz-Ku wo kasii zéi'kan mazéi' i ma'éman zozo' in zézéha. Kata'uang-Ku kasii i ni kamu én zéi'kan makaezen wia sé tou léwo'. Sé tou mengua-ngua in aatu-Ku taan ndéén zéi'kan ém pinahtata'u niouola, wo kinata'uan niouola i ni séra én tantowo.

³Ni kamu én ezen wo nimazézéha pahpaan ni Aku wo ni kamu én zéi'kan mahgenang u rawoi.

⁴Taan zozo' in téntu, wéwéhan ung kasoo-Ku wia ni kamu. Pahpaan, u raraatéan niou én zéi'mo tanu u raraatéan niou im puuna in taré ma'émanla wia ni Aku.

⁵Niitumo gena-genangen, ni kamu én totozo zou' im witu u raraaté niou im puuna. Kumana'mola i memangu-mangun an téntu wo mahwangunola tanu am pahwangunen niou im puuna. Sa kamu zéi'kan tumula'u a singkéla' niou, ni Aku é méyé wia ni kamu i mémukum ni kamu, un tanumokan ni Aku i méméndo am penono'tolan niou a solo.

⁶Taan wéwéhan am wangun am wia ni kamu. Ikazi'zis niou am pahmualin né tou ni Nikolaus, ni Aku kangkasii é mazi'zis am pahmualin néra itii.

⁷ Séi si wéwéhan lunteng é mahtalingama lé'os an ipahkua ni Roh ni Opo Empung wia sé jamaat: Si tou nimuntung, ni sia én énéang-Ku ing kuman um wua'na ung kai u mahwéhémé ung katou-touan, um witu un Uma ni Opo Empung.’ ”[2]

⁸ Ang kuan kasii ni Oki' ni Tou, “Ipantikmula wo iwéhéma wia si malaekat si wia sé jamaat witi Smirna in téntii: ‘Kenumo a Nuwu' am wia Si Kataré-taré wo Si Kamurian a méyé, si nimatémoma taan méitoumé sumaup.

⁹Kata'uang-Ku ni kamu én zézéha wo zéi'kan siapa apa, taan ni kamu ém wa'ilan im witu u sinaru ni Opo Empung. Kata'uang-Ku kasii an tumoro sé mahtawuruk ni kamu. Ni séra é mahkua i ni séra én tou Yahudi sé pinéléng ni Opo Empung, taan un ulitna én zéi'kan. Un ulitna ni séra én jamaat ni tonaas né sétang.

¹⁰Tia'mo maindé' wana an zézéha a léwo'zéi' im pendanen niou. Gena-genangen! Pahpaan i ma'éman ni Aku, sé woopira im wia ni kamu én iuntep ni tonaas né sétang witi bui im pema'wa'en wo zézéhan witu, mapulu'na endo ung kauréna. Taan zozo'pé' in téntu, ni kamu én tia' mazéi' i ma'éman wia ni Aku makaz i maté, wo ni kamu ém wéhang-Ku ung katou-touan makaz ing kauré-uré. Niitu ung kukulu-Ku wia ni kamu.

¹¹ Séi si wéwéhan lunteng é mahtalingama lé'os an ipahkua ni Roh ni Opo Empung wia sé jamaat: Si tou nimuntung én zéi'kan mahpenda-pendanla an zézéha witu um patéan kazua.’ ”

¹²Ang kuan kasii ni Oki' ni Tou, “Ipantikmula wo iwéhéma wia si malaekat si wia sé jamaat witi Pergamus in téntii: ‘Kenumo a Nuwu' am wia ni Sia a méyé, si makaanu um pisou tewel zua masaru.

¹³Kata'uang-Ku um pahwéha-wéhan niou. Ni kamu é mahento' witu un tampa kinawasaan ni tonaas né sétang. Taan zozo' in téntu, ni kamu én zéi'kan mazéi' i ma'éman wia ni Aku, wo ni kamu kangkasii én zéi'kan mahkélong i ma'éman ni Aku. Téntu kangkasii, ni kamu én zéi'kan mazéi' i ma'éman, im witu un endo si Antipas si mengungua a niilek wo tinalingana tumoro ni Aku, si totoz ma'éman ni Aku, im winunu' witu u saru-sarun niou witu un tampa kinawasaan ni tonaas né sétang.

¹⁴ Taan wéwéhan ang kasoo-Ku wia ni kamu: Sé woopira im wia ni kamu é mahkiit an tutuzu' ni Bileam, si mahtuzu' si Balak i mahlululu sé tou Israel ing kuman ang kakanen a mémoiragés wia sé opo-opo wo mahsamek.

¹⁵Téntu kangkasii im wia ni kamu ém wéwéhan sé mahkiit an tutuzu' né mahkii-kiit si Nikolaus.

¹⁶Niitumo, tia'mo mahwangun an téntu! Sa zéi'kan, ni Aku é rengan i méyé wia ni kamu wo sumaru ni séra karia um pisou u nimondolé witu u sumah-Ku kenu.

¹⁷ Séi si wéwéhan lunteng é mahtalingama lé'os an ipahkua ni Roh ni Opo Empung wia sé jamaat: Si tou nimuntung, ni sia ém wéhang-Ku manna[3] a méiwunipé', wo ni sia kasii ém wéhang-Ku um watu kulo', um wawona ém pinantikan u ngaran weru un akaz uman si makaanu si mata'u u méipantik witu, zéi'kan siapa walina.’ ”

¹⁸Ang kuan kasii ni Oki' ni Tou, “Ipantikmu kasiila wo iwéhéma wia si malaekat si wia sé jamaat witi Tiatira in téntii: Kenumo a Nuwu' ni Oki' ni Opo Empung, si makaweren u mahsena' tanumokan u layasna un api wo un a'é-Na é meto-petot tanumokan petotna un tambaga méiluleng witu un api.

¹⁹Kata'uang-Ku péléng am pinaayang niou: U raraaté niou wo kasii um pa'émanen niou, um paayangen niou wo ung kaezenan niou im wana an zézéha. Kata'uang-Ku am pinaayang niou in tarékan é lumouspé'mé am pinaayang niou im puuna in taré ma'émanla wia ni Aku.

²⁰ Taan zozo' in téntu, wéwéhan ung kasoo-Ku wia ni kamu, pahpaan méiwaya niou uman si wéwéné makangaran Izebel, si mahkua-kua i nabi, ni sia é mahtuzu' wo mahlululu uman sé ata-Ku i sumamek wo kuman ang kakanen mémoiragés wia sé opo-opo.

²¹Si wéwéné itii ém winéhang-Kumoma oras in tumula'u am pahwangunenna itii, taan ni sia é soo tumula'u am pahwangunenna im wana ang kasamekanna itii.

²²Gena-genangen! Si wéwéné itii én ukumeng-Ku karia u saki takaz ni sia memitu-mitumokan kokolo'an. Wo sé tou mahsamek kariana én ilombo'-Ku witu un zézéha totoz wutez, sa séra zéi'kan tumula'ula am pahwangunen néra karia ni wéwéné itii.

²³ Péléng sé mahkii-kiit si wéwéné itii ém wunu'eng-Ku, wo toro kata'uala né jamaat i ni Aku é mata'u am pegena-genangen ni tou wo am witu un aténa. Ni Aku é maér wia sé tou mengiité am pinahwanguné ni esa wo ni esa.

²⁴Taan wia ni kamu sé tou walina witi Tiatira, sé zéi'kan mahkiit an tutuzu' ni Izebel wo soo mahtata'u an tutuzu' ni tonaas né sétang, ni Aku éng kumuama: Wia ni kamu én zéi'mo awesang-Ku am pengalin walina.

²⁵Taan am wiamo ni kamu én tio-tionan makaz ni Aku i mawurimé sumaup.

²⁶ Séi si nimuntung wo mahwangun ang kapaaz-Ku makaz ni Aku i mawurimé sumaup ém wéhang-Ku ung kawasa i merénta péléng sé tahsasana wanua.

²⁷Wo ni sia i merénta ni séra én zéi'kan siapa ampungna, tanumokan merénta karia un teken uaséi. Ni séra éng kemun tanumokan ing kumemuma ung kuré' tana'. Ung kawasa itii é masuat wo ung kawasa ung kinailekang-Kumé im wia si Ama'-Ku.

²⁸Wo ni Aku é méhé si tototi'en kaendoan wia ni sia.

²⁹Séi si wéwéhan lunteng é mahtalingama lé'os an ipahkuama ni Roh ni Opo Empung wia sé jamaat.”