Read Tombulu Wahyu 20 Bible Online

Wahyu 20 - Tombulu bible

Wahyu 20

¹An ilekengkuma si malaekat esa timumpamé im witi kasendukan timion ung kusi' um woso um patéan wo u ranté tua'na.

² Si naga, si ulé' tu'a itii, si pahkuan tonaas né sétang wo sétang mahlulu sé tou én tinionan ni malaekat itii. Si naga itii é niapusna sana riwuna ta'un ung kauréna.

³An iweritnama si naga itii witu um woso um patéan. Ang kusi'ennamé um woso um patéan itii a segelennamé um wawona. Karia in téntu, si naga itii én zéi'mo mata'u lumulu sé tahsasana wanua witu u sana riwuna ta'un. Ing kimawusoma u sana riwuna ta'un, si naga itii én ipilot sumaup ni malaekat itii taan zéi'kan mauréma.

⁴ An ilekengkuma a rurumezan né kolano wo sé tou rimumez witu ém winéhanna ung kawasa in tumotoz ulit kaapa zéi'kan am pinahlé'osé né tou. Ilekengku kasiima sé roh né tou sé im puuna éng kinetoran an ulu pahpaan i mahkua a niilek wo an tinalinga néra tumoro si Yesus wo kasii pahpaan i mahkua u Nuwu' ni Opo Empung, sé zéi'kan mahongkot wo mahsigi' wia si binatang wo wia si patong ni binatang itii wo sé zéi'kan tinandaan an tungtung wo a lengen néra. Ni séra é méitou sumaup ni Opo Empung, a merénta ing kolano karia ni Kristus sana riwuna ta'un ung kauréna.

⁵Sé kenumo sé kataré-taré méitoumé sumaup ni Opo Empung. Taan sé tou nimaté walina én zéi'kampé' itoumé sumaup ni Opo Empung sa u sana riwuna ta'un itii zéi'kampé' simampeta.

⁶Mahpaa-paazola sé kataré-taré méitoumé sumaup ni Opo Empung. Ni séramo sé linenas-Na. Ni séra én zéi'mo mendan um patéan kazua taan ni séra é maéndo walian ni Opo Empung wo ni Kristus, wo ni séra é merénta ing kolano karia-Na witu u sana riwu ta'un.

⁷I simampetoma u sana riwu ta'un, si tonaas né sétang én ipiloté ni malaekat im witu um woso um patéan.

⁸ Si tonaas né sétang itii é malumulu sé tahsasana wanua witi epat zuhuna ung kaayahan. Sé tahsasana wanua itii ém pahkuan ‘Gog’ wo ‘Magog’, wo ni séra é réwoken ni tonaas né sétang itii i makumoro'. Wo ung kalakez néra én tanumokan an eris witi tasik.

⁹Ni séra é nimangé wana péléng ung kaayahan a lumiklikla un tampa rinendaian an ténda né suraro linenas ni Opo Empung wo um wanua tua'na ikararaaté-Na itii. Taan un api witi langit én timumpamé a luma'unga ni séra.

¹⁰Si tonaas né sétang si limulu sé tou itii é méiwerita witu un tasik api wo walélang melaya-layas, um wineritan kasii si binatang makaindé'en wo si nabi towo. Im witu ni séra péléng ém pahzézéhan endo wo wengi makaz ing kauré-uré.

¹¹ An ilekengkuma u rurumezan ni Kolano ung kulo' wo tua'na wo ni Sia si rimumez witu. Witu u saru-sarun-Na a mazéi'ma u langit wo ung kaayahan makaz in zéi'mo pinahile-ilekla un tampana.

¹²Ilekengkuma sé tou nimatémo, ni séra é sé tou pahsigi-sigi'en wo sé tou kanaramen, rimendai witu u sinaru u rurumezan ni Kolano itii. In toro niitu, péléng ang kitap ém winukama, am pinantikan péléng am pinahwanguné né tou. Am wukan kasiima ung kitap walina, ung kitap katou-touan. Sé tou nimatémo ém pahtotozen ulit kaapa zéi'kan am pinahlé'os néramé mengiit a mémoipantik wana ang kitap itii.

¹³Un tasik nimayoma sé tou nimaté witu, um patéan wo um pahwéha-wéhan né tou nimaté é nimayoma sé tou nimaté witu, wo si esa wo si esa én totozen mengiit am pinahlé'os néramé.

¹⁴Kumawusa niitu, um patéan wo um pahwéha-wéhan né tou nimatémo é méiwerita witu un tasik api melaya-layas. Un tasik api itiimo um patéan kazua.

¹⁵Peléng sé tou sé makangaran un zéi'kan méikapantik witu ung kitap katou-touan itii, méiwerit witu un tasik api melaya-layas itii.