Read Tombulu Wahyu 6 Bible Online

Wahyu 6 - Tombulu bible

Wahyu 6

¹Tumondongla niitu, ilekengkuma si Anak ni Domba itii nimukama u segel kataré wana am pitu segel itii. An talingangkumé si esaané im wia sé epat tumou-tou itii é mahkérété, ung karimezna én tanumokan un zanina un erut in téntii, “Méyémo!”

² An ilekengkuma si kawalo kulo', si sinakéan ni tou timion um pana. Si tou itii ém winéhan um poporongen ni kolano. Ni sia si nimuntungo, mangé ing kumala sé kakoro'na.

³I si Anak ni Domba itii mukama u segel kazua, an talingangkumé si tumou-tou kazua éng kimuamé, “Méyémo!”

⁴A mondol kasiimé si kawalo esa walina. Si kawalo itii é rangdang tanumokan u layasna un api. Si simaké wia si kawalo itii ém winéhan ung kawasa i maméndo u mahlé'o-lé'osan né tou wia ung kaayahan, makaz sé tou mahwuwunu'an, wo ni sia kangkasii ém winéhan um pisou tua'na.

⁵I si Anak ni Domba itii mukama u segel katelu, talingangkumé si tumou-tou katelu kimuamé, “Méyémo!” Ilekengkuma si kawalo zemdem wo si tou simaké wia si kawalo itii én timion un timbangan.

⁶An talingangkumé im witu un unez né epat tumou-tou éng kana' i mahkuamé, “Sa ung gandum sana liter um wawaérna én esa dinar. Un teluna liter jelai [8] , um wawaérna kasii én esa dinar. Wo tia' mahléwo' ang kai zaitun am wua'na pahwangunen lana, téntu kangkasii an tinanem pahwangunen anggor pahelepen.”

⁷I si Anak ni Domba itii mukama u segel kaepat, talingangkumé si tumou-tou kaepat kimuamé, “Méyémo!”

⁸ An ilekengkuma si kawalo kilo. Si kawalo itii é sinakéan ni tou makangaran Patéan, wo um pahwéha-wéhan né nimatémo é mahkiité witu murina. Wia ni séra ém winéhan ung kawasa i munu' sé sana pahepat né tou wia ung kaayahan karia um pisou, karia ung kaahreman, a saki melaput wo seza'en né meneza' tou.

⁹I si Anak ni Domba itii mukama u segel kalima, ilekengkuma um witu um wawa' um pahtunuan a raragés wia si Opo Empung ém wéwéhan sé roh né tou winunu'mo, pahpaan u Nuwu' ni Opo Empung wo pahpaan ang kata'uan néra tumoro a niilek wo tinalinga néra.

¹⁰Sé roh itii é mahkérété, “O Opo Empung si Mahkawasa, lenas wo ulit! Sawisamokan wo Ko taré tumotoz am pahwangunen wo mukum sé tou witi kaayahan sé nimunu'mé ni kai?”

¹¹Péléng sé roh itii é nimakailek tata'saan ung karai tonton kulo'. Wo wia ni séra éng kuaan ing kumana'pé'la oki' makaz ung kalakez né kapaayang wo né katuari esa pa'émanen néra, sé winunu' tanu ni séra malekep.

¹² An ilekengku kasiima si Anak ni Domba itii i nimukama u segel kaenem. A méhzo'mé totoz repet wo si endo é nimazemdem tanu u roko' zemdem[9] wo si loloho'en é nimarangdang tanumokan un zaha'.

¹³ Sé tototi'en witi langit é nimagogomé wia ung kaayahan, tanumokan am wua'na un ara mata'pé' a mahragosé im pahsengoné u reges repet.

¹⁴ U langit éng kimoskosa, tanumokan ung kitap ginulung, péléng ang kentur wo ang katanaan é méikaérama.

¹⁵ In toro niitu, sé kolano wia ung kaayahan, sé pahsigi-sigi'en, sé tonaas né suraro, sé tou wa'ilan, sé tou mahkawasa, péléng sé ata wo sé zéi'mo ata é mahwuni wana an tuleng, wana am pinaselat am watu wana ang kentur.

¹⁶ Ni séra é mahkua wana ang kentur wo wana am watu tua'na itii, “Mawuswusomé wia ni kai wo kai ikawunila im wia ni Sia si rimumez witu u rurumezan ing Kolano wo im witu un upi' ni Anak ni Domba itii.”

¹⁷ Pahpaan méikaayomola witu un endo ni Opo Empung wo ni Anak ni Domba i mapailek un upi' néra wo zéi'kan siapa si makaezen i mengali niitu.