Read Tombulu Wahyu 9 Bible Online

Wahyu 9 - Tombulu bible

Wahyu 9

¹A si malaekat kalima sumengoma um pontuangna, ilekengkuma si tototi'en nimaragosé witi langit timoromé ung kaayahan. Wia si tototi'en itii ém winéhan ung kusi' um woso um patéan.

² Am wukanama um pepenet um woso um patéan itii, a mondolé an teremuz totoz lakez tanumokan an teremuz i mahruruk. Si endo wo um wentangan é nimarimbengbeng, pahpaan ing kinaapé'an an teremuz itii.

³ Im wana an teremuz itii, mahondolé sé koropit timumpamé wia ung kaayahan. Sé koropit itii ém winéhan ung kawasa makawawa i mahséhéz tanu sé kalajengking sé wia ung kaayahan.

⁴ Sé koropit itii ém pinerénta in tia' mahléwo' an zukut, an tinanem kaapa ang kai wia ung kaayahan. Sé toro uman i séhézen néra é sé tou zéi'kan winéhan un tanda ni Opo Empung witu un tungtung néra.

⁵Sé koropit itii é niénéan zéi'kan i munu' sé tou, taan in zuméha uman sé tou limana loloho'en ung kauréna. An zézéha pahpendanen néra én tanu ung kazéha i sinéhéz ni kalajengking.

⁶ Im witu limana loloho'en itii, sé tou mahpendan an zézéha itii én totozo paaz maté, taan ni séra én zéi'kampé' maté, pahpaan um patéan é zimou-zou' umané im wia ni séra.

⁷ Sé koropit itii én tanumokan sé kawalo niimek i makumoro'. Wana an ulu néra ém wéwéhan an tanu am poporongen né kolano a mas am wangunen. Ang gio néra én tanu ang gio né tou.

⁸ Wo am wuuk néra é lambo' tanu am wuuk né wéwéné. Am waang néra én tanu am waang né singa.

⁹ Am wezwez néra én tanumokan ang karai uaséi, wo un zani an tétéwél néra i mahtéwél én tanumokan zanina a roda ipahkara' né kawalo totoz lakez i makumoro'.

¹⁰An ipus né koropit itii én tanumokan an ipus né kalajengking wo wéwéhan a séséhézna, wo wana an ipus néra itii ém wéwéhan ung kawasa in zuméha sé tou limana loloho'en ung kauréna.

¹¹Si kolano néra é si malaekat mahtéiz um woso um patéan. U ngaran ni kolano itii im witu u nunuwu'en Ibrani é ‘Abadon’, wo witu u nunuwu'en Yunani é ‘Apolion’, ung kalakoana é ‘Meléléwo'.’

¹²U meléwo' kataré é limangkoioma, taan wéwéhampé' zua u meléwo' mahtondongé.

¹³ A si malaekat kaenem sumengoma um pontuangna. Talingangkumé u nuwu' nimondolé wana a sungé, am witu un epat zuhuna um pahtunuan a raragés u mas am wangunen, um witu u sinaru ni Opo Empung.

¹⁴U nuwu' itii éng kimuama wia si malaekat kaenem si timion um pontuang in téntii, “Maipiloté sé malaekat epat sé méiapus witi tembir u so'so'an selah Efrat!”

¹⁵A maipilotnamé sé epat malaekat méiapus itii witu un jam, un endo, u loloho'en wo un ta'un un tinotozo, i mamunu' sé sana pahtelu im wia sé tou wia ung kaayahan.

¹⁶Wo un tinalingakumé, ung kalakez né suraro sé menaké kawalo itii én zuana atus yuta.

¹⁷Witu um pina'ilekku, ni aku é nimilek sé kawalo wo sé suraro simaké wia sé kawalo itii, ni séra éng kimarai ang karai uaséi rangdang tanu an api, dongker tanu um watu safir, wo ririh tanu am walélang. Wo an ulu né kawalo itii én tanu an ulu né singa, wo im wana a sumah né kawalo itii é mahondolé api, teremuz wo walélang.

¹⁸Karia un telu meléwo' kenu: an api, an teremuz wo am walélang pasu' a mahondolé wana a sumah né kawalo itii, sé sana pahtelu tou wia ung kaayahan ém winunu'.

¹⁹Pahpaan wana a sumah wo wana an ipus né kawalo itii ém wéwéhan ung kawasa. An ipus né kawalo itii én tanu sé ulé', an ulu né ulé' wana an ipus itii ém wéwéhan ung kawasa in zuméha sé tou.

²⁰ Taan sé tou walina sé zéi'kan nimaté pahpaan an zézéha itii é soopé' tumula'u am pahwangunen néra. Ni séra én zéi'kan mazéi' i mahongkot wia sé sétang, sé patong né opo-opo sé mas, péra', perunggu, watu, wo kai am wangunen; sé zéi'kan makailek kaapa zéi'kan makatalinga kaapa zéi'kan mata'u lumampang.

²¹Ni séra kasii é soo tumula'u am pahwangunen néra, tanu a: mahwunu' tou, mahriara, mahsamek wo mahremu'.