Read gitonga Chiyambo 11 Bible Online

Chiyambo 11 - gitonga bible

Chiyambo 11

¹Sono charu chose chenga ndi lilime limoza ndi mazu ghamanavi.

²Ndipo penipo ŵanthu ŵangusama kutuwa ku vuma, ŵangusaniya dambo mu charu cha Shinara ndipo ŵanguzenga mwenimo.

³Ndipo ŵangunenerana, “Tiyeni tiumbe ncherwa, ndipo tizoche weniukongwa.” Ndipo ŵenga ndi ncherwa mu malo gha mwa, ndi maziu mu malo gha dongo.

⁴Sono ŵanguti, “Tiyeni tijizenge msumba; ndi sonjo pachanya, wafike ku mtambo, ndipo tijichitiye zina, vinu tingamwaranikiya pa charu chose.”

⁵Ndipo Ambuya angusika kuzachiwona msumba wo ndi sonjo, vyo ŵana ŵa ŵanthu ŵanguzenga.

⁶Ndipo Ambuya anguti, “Ehe, mbanthu ŵa khamu limoza ndipo wose ŵendi mazu ghamoza; ndipo ichi nkhwamba ŵaka kwaku vyo ŵakachitanga; ndipo sono kuti ŵakatondekanga cha kuchita cho ŵakhumba kuchita.

⁷Sono ndisikiye pasi, ndipo ndikatimbanizge lilime lawo, kuti ŵatondeke kuziŵa cho wakamba munyake.”

⁸Viyo Ambuya anguŵambininiskiya pa charu chose chapasi kutuwa penipa, ndipo ŵangureka kuzenga msumba wo.

⁹Chifukwa cho zina lake lingudanika Babele, chifukwa pa Ambuya angutimbanizga lilime la charu chose; ndipo kutuliya penipa Ambuya anguŵaparghang'a pa charu chose chapasi.

¹⁰Izi ndi mphapu zaku Shemu. Penipo Shemu wenga wa virimika machumi pe chumi (100) mu umoyo wake, wangupapa Arpakashadi, vyati vyakapo virimika viŵi pavuli pa zandi.

¹¹Ndipo shemu wanguŵa wamoyo pavuli pa kawi kaku Arpakahadi virimika machumi pe chumi ghankhonde (500) ndipo wenga ndi ŵana ŵanthurumi ŵanyake ndi ŵana ŵanthukazi.

¹²Penipo Arpakahadi wanguŵa wa virimika machumi ghatatu ndi vinkhonde (35), wangupapa Shela;

¹³ndipo Arpakahadi wanguŵa wamoyo pavuli pa kawi kaku Shela virimika machumi pe chumi ghanayi pachanya vitatu (403) ndipo wenga ndi ŵana ŵanthurumi ŵanyake ndi ŵana ŵanthukazi.

¹⁴Penipo Shela wanguŵa wa virimika machumi ghatatu (30) wangupapa Ebere;

¹⁵ndipo Shela wanguŵa wamoyo pavuli pa kawi kaku Ebere virimika machumi pe chumi ghanayi pachanya vitatu (403) ndipo wenga ndi ŵana ŵanthurumi ŵanyake ndi ŵana ŵanthukazi.

¹⁶Penipo Ebere wanguŵa wa virimika machumi ghatatu ndi ghanayi (34) wangupapa Pelege;

¹⁷ndipo Ebere wanguŵa wamoyo pavuli pa kawi kaku Pelege virimika machumi pe chumi ghanayi ndi machumi ghatatu (430), ndipo wenga ndi ŵana ŵanthurumi ŵanyake ndi ŵana ŵanthukazi.

¹⁸Penipo Pelege wanguŵa wa virimika machumi ghatatu (30) wangupapa Reu.

¹⁹Ndipo Pelege wanguŵa wamoyo pavuli pa kawi kaku Reu virimika machumi pe chumi ghaŵi, pachanya vinkhonde ndi vinayi (209), ndipo wenga ndi ŵana ŵanthurumi ŵanyake ndi ŵana ŵanthukazi.

²⁰Penipo Reu wanguŵa wa virimika machumi ghatatu ndi viŵi (32) wangupapa Serugu;

²¹ndipo Reu wanguŵa wamoyo pavuli pa kawi kaku Serugu, virimika machumi pe chumi ghaŵi pachanya vinkhonde ndi viŵi (207), ndipo wenga ndi ŵana ŵanthurumi ŵanyake ndi ŵana ŵanthukazi.

²²Penipo Serugu wanguŵa wa virimika machumi ghatatu (30) wangupapa Nahoro;

²³ndipo Serugu wanguŵa wamoyo pavuli pa kawi kaku Nahoro virimika machumi pe chumi ghaŵi (200), ndipo wenga ndi ŵana ŵanthurumi ŵanyake ndi ŵana ŵanthukazi.

²⁴Penipo Nahoro wanguŵa wa virimika machumi ghaŵi pachanya vinkhonde ndi vinayi (29), wangupapa Tera;

²⁵Ndipo Nahoro wanguŵa wamoyo pavuli pa kawi kaku Tera virimika machumi pe chumi pachanya chumi ndi vinkhonde ndi vinayi (119), ndipo wenga ndi ŵana ŵanthurumi ŵanyake ndi ŵana ŵanthukazi.

²⁶Penipo Tera wanguŵa wa virimika machumi ghankhonde ndi ghaŵi (70), wangupapa Abramu, Nahoro ndi Harani.

²⁷Sono izi ndi mphapu zaku Tera. Tera wenga wiske waku Abramu, Nahoro ndi Harani; ndipo Harani wenga wiske waku Lote.

²⁸Harani wangufwiya pa maso pa wiske Tera mu charu cha kawi kake mu Uru wa ŵaKaldiya.

²⁹Ndipo Abramu ndi Nahoro ŵanguto ŵanthukazi; zina la muwoli waku Abramu lenga Sarai, ndipo zina la muwoli waku Nahoro lenga Milka mwana munthukazi waku Harani wiske waku Milka ndi Iska.

³⁰Kweni Sarai wenga chumba; wengavi mwana.

³¹Tera wanguto mwana wake Abramu ndi Lote mwana munthurumi waku Harani, mzuku wake, ndi Sarai mukumwana wake, muwoli wa mwana wake Abramu, ndipo ŵanguruta wose pamoza kutuwa ku Uru wa ŵaKaldiya kuya mu charu cha Kanani; kweni penipo ŵanguza ku Harani, ŵanguja Kweniko.

³²Mazuŵa ghaku Tera ghenga virimika machumi pe chumi ghaŵi pachanya vinkhonde (205); ndipo Tera wangufwiya mu Harani.