Read gitonga Chiyambo 13 Bible Online

Chiyambo 13 - gitonga bible

Chiyambo 13

¹Viyo Abramu wangukwera kutuwa ku Egipiti, ndi muwoli wake, ndi chose cho wenga nacho, ndi Lote pamoza nayo, kuya ku Negebu.

²Sono Abramu wangusambasa ukongwa mu ng'ombe, mu siliva, ndi mu golide.

³Ndipo wangukiyakiya kunthazi kutuwa ku Negebu mpaka ku Betele ku malo gho hema lake lenga pakudanga, pakati pa Betele ndi Ai,

⁴ku malo ghenigho wanguzengako jochero pakudanga; ndipo penipo Abramu wanguromba Ambuya.

⁵Ndipo Lote, mweniyo wanguruta ndi Abramu, nayo so wenga ndi miskambu ya mberere ndi miskambu ya ng'ombe ndi mahema,

⁶viyo kuti charu cho chinguziŵa kuŵasunga wose ŵaŵi cha ŵachija pamoza; pakuti mausambasi ghawo ghenga ghakuru ukongwa, kuti ŵanguziŵa kuja pamoza cha,

⁷ndipo penga kulimbana pakati pa ŵaliska ŵa ng'ombe zaku Abramu ndi ŵaliska ŵa ng'ombe zaku Lote. Pa nyengo yeniyiya ŵaKanani ndi ŵaPerezi ŵajange mu charu chiya.

⁸Sono Abramu wanguti kwaku Lote, “Paulevi kulimbana pakati pako ndi ine, ndi pakati pa ŵaliska ŵako ndi ŵaliska ŵangu pakuti teŵene ndi ŵene.

⁹Kumbi charu cho chose kuti che paurongo pako cha? Patukana nane. Asani ukatonga kuchiri ku maze, ine ndikayanga ku marghe; pamwenga asani ukatonga ku marghe, iku ine ndikayanga ku maze.”

¹⁰Ndipo Lote wangulereska ndi wanguwona kuti dambo la Yordane lenga ndi maji ghakukwana kosekose uli ndi munda wa Ambuya, uli ndi charu cha Egipiti; pakuza ku Zoara; yapa ndipo Ambuya ŵenga ŵandanange Sodomu ndi Gomora.

¹¹Viyo Lote wangujisankhiya dambo lose la Yordane kurata ku vuma; viyo ŵangupatukana uyu ku munyake.

¹²Abramu wanguja mu charu cha Kanani penipo Lote wanguja mu msumba wa dambo lo ndi wangunderezga hema lake mpaka ku Sodomu.

¹³Sono ŵanthu ŵamu Sodomu ŵenga ŵaheni, ŵakulakwiya Ambuya weni ukongwa.

¹⁴Pavuli Ambuya anguti kwaku Abramu, wati wajipatuwako Lote, “Ulereske kuturiya pa malo ghenigho ulipo, ku nkhonde, ku malaŵi, ku zambwe, ndi ku vuma;

¹⁵pakuti charu chose cho uwona ndikakupaskanga iwe ndi mphapu zako muyaya.

¹⁶Mphapu zako ndikazichitanga uli ndi fuvu la charu; viyo asani wangaŵapo munthu yo wangaziŵa kuŵerenga fuvu la charu, iku mphapu yako nayo yikaŵerengekanga.

¹⁷Soka wendemo mu utali ndi usani wa charu cho pakuti ndikachipaskanga kwaku iwe.”

¹⁸Viyo Abramu wangutuzgapo hema lake ndi wanguza ndi wanguja pafupi ndi miti ya misolo yamu Mamre, yeniyo yemu Hebroni, ndipo penipa wanguzenga jochero ku Ambuya.