Read gitonga Chiyambo 2 Bible Online

Chiyambo 2 - gitonga bible

Chiyambo 2

¹Viyo machanya ndi charu chapasi vingumara, ndi maŵanja ghawo ghose.

²Ndipo pa zuŵa la chinkhonde ndi chiŵi Chiuta wangumara nchitu yake yeniyo wanguchita, ndipo wangupumuwa pa zuŵa la chinkhonde ndi chiŵi ku nchitu yake yeniyo wanguchita.

³Viyo Chiuta wangutumbika zuŵa la chinkhonde ndi chiŵi ndi wangulipatuwa, chifukwa mwaku lo Chiuta wangupumuwa ku nchitu zake zose zenizo wanguchita pa kulenga.

⁴Uwu ndi mukoka wa machanya ndi charu chapasi penipo vingulengeka. Mu zuŵa lo Ambuya Chiuta anguchita charu chapasi ndimachanya,

⁵penipo pengavi chakume cha mu munda mu charu chapasi, ndi pengavi mbeu ya mu munda yingume; pakuti Ambuya Chiuta wengavi kung'iska vuwa pa charu chapasi, ndi pengavi munthu wakulima nyata;

⁶kweni chiuli chingukwera kutuwa pa charu chapasi kuzumbwiska nyata yose.

⁷Sono Ambuya Chiuta wangulenga munthu ndi fuvu la nyata, ndipo wangututiya mu mphunu zake mvuchi wa umoyo, ndipo munthu wanguŵa wamoyo.

⁸Ndipo Ambuya Chiuta wangupanda munda mu Edene, ku vuma mwenimo wanguŵika munthu mweniyo wangulenga.

⁹Ndipo kuturiya mu nyata Ambuya Chiuta wangumezga miti yose yakukondweska kuyiwona, ndi yamampha kurgha; ndiso muti wa umoyo pakatikati pa munda, ndipo muti wa kuziŵa umampha ndi uheni.

¹⁰Msinji ungutuwa mu Edene kudiriya maji munda wo, ndipo muwa ungugawukana ndi ungusanduka misinji yinayi.

¹¹Zina la wakudanga ndi Pishono; wo utenda kuzunguliya charu chose cha Havili, mwenimo mwe golide;

¹²ndipo golide la charu chiya ndamampha; bideli ndi onike[1] ye mwenimuwa.

¹³Zina la msinji wa chiŵi ndi Gihono wo utenda kuzunguliya charu chose chaku Kushi.

¹⁴Ndipo zina la msinji wa chitatu ndi Tigirisi, wo utenda ku vuma kwa Asiriya. Ndi msinji wa chinayi ndi Efrate.

¹⁵Ambuya Chiuta wanguto munthu ndi wangumuŵika mu munda wa Edene ku ulinda ndi kuwusunga.

¹⁶Ndipo Ambuya Chiuta wangulanguliya munthu yo kuti, “Ukarghanga kwawanangwa vyamu muti wose wamu munda;

¹⁷kweni vyamu muti wo wakuziŵa umampha ndi uheni kuti ukarghanga cha, pakuti mu zuŵa lo ukarghiyanga vyaku wo ukafwanga.”

¹⁸Ndipo Ambuya Chiuta wanguti, “Kuti nkhwamampha cha kuti munthu yo waje yija; ndikamuchitiyanga wakumovya, wakulingana nayo.”

¹⁹Viyo kutuwa mu nyata Ambuya Chiuta wangulenga nyama yose yamu dondo ndi chiyuni chose cha mude, ndi wanguza navyo ku munthu yo kuti wawone, ndi mazina uli gho wangavidana; ndipo zina lose lo munthu yo wangudana chamoyo chose cho lenga zina lake.

²⁰Munthu yo wangupaska mazina ku chakuŵeta chose, ndi ku viyuni vya mude, ndi nyama yose yamu dondo; kweni ku munthu yo kwengavi kusanirika wakumovya wakulingana nayo.

²¹Viyo Ambuya Chiuta wanguchita tulu tukuru kuŵa pa munthu yo, ndipo penipo weche kura wanguto yimoza ya mbaghara zake ndipo pa malo pake wangujarapo ndi nyama;

²²ndipo mbaghara yo Ambuya Chiuta wanguto mu munthu yo wanguchita munthukazi ndi wangumutole ku munthu yo.

²³Sono munthu yo wanguti, “Uyu sono nchiwanga cha viwanga vyangu ndi nyama ya nyama yangu; wakadanikanga Munthukazi, chifukwa wangutoleka kutuwa mu Munthurumi.”

²⁴Chifukwa chenichi munthurumi wasiya awiske ndi anyina ndi watijibatika ku muwoli wake, ndipo ŵatuŵa nyama yimoza.

²⁵Ndipo munthurumi yo ndi muwoli wake ŵenga ŵankhuli ŵaŵi viyo, ndipo kuti ŵanguchita soni cha.