Read gitonga Chiyambo 20 Bible Online

Chiyambo 20 - gitonga bible

Chiyambo 20

¹Kuturiya pa Abrahamu wangwenda ulendo kurata ku charu cha ŵaNegebu, ndipo wanguja pakati pa Kadeshe ndi Shuru; ndipo wanguyingayinga mu Gerara.

²Ndipo Abrahamu wangunena zaku Sara muwoli wake, “Ndi mzichi wangu.” Ndipo Abimeleke karonga wa Gerara wangutuma ŵanthu kwachimuto Sara.

³Kweni Chiuta wanguza kwaku Abimeleke mu tulo ndi usiku, ndi wanguti kwaku iyo, “Awona, we munthu wakufwa chifukwa cha munthukazi mweniyo wato, chifukwa ndi muwoli wa munthurumi munyake.”

⁴Kweni Abimeleke wengavi kumukwaska munthukazi, viyo wanguti, “Ambuya, kumbi mukabayanga ŵanthu ŵambura kalema?

⁵Kumbi wengavi kukamba kwaku ine iyo mweneko munthurumi kuti, ‘Ndi mzichi wangu?’ Ndipo munthukazi nayo wanguti, ‘Ndi mzichi wangu!’ Mu ukongorekwa wa mtima wangu ndi manja ghangu ghambura kalema ndachita ichi.”

⁶Sono Chiuta wanguti kwaku iyo mu loto lo, “Inya ndiziŵa kuti wachita ichi mu kuphotoka kwa mtima wako, ndipo ndine ndingukusunga kuwura kundinangiya ine; chifukwa cho ndengavi kukuzomerezga kumuko munthukazi.

⁷Viyo sono muwezge mweneko muwoli wake, chifukwa ndi mchimi, ndipo wakakurombiyanga, ndipo ukajanga wamoyo. Kweni asani urekenge kumuwezge, uziŵe kuti ukafwanga nadi, iwe, ndi wose ŵeniwo mbako.”

⁸Viyo Abimeleke wanguyuka ndi mlenji-lenji, ndi wangudana ŵaŵanda ŵake wose, ndi wanguŵanene vinthu ivi; ndipo ŵanthu wo ŵangopa ukongwa.

⁹Sono Abimeleke wangudana Abrahamu, ndi wanguti kwaku iyo, “Nchine cho wachita kwaku ifwe? Ndipo ndakulakwiya uli iwe, kuti watole paku ine ndi pa ufumu wangu uheni ukuru? Wandichitiya ine vinthu vyo kuti vingwenere kuchitika cha.”

¹⁰Ndipo Abimeleke wanguti kwaku Abrahamu, “Cho waghanaghananga nchine, pakuti unguchita chinthu ichi?”

¹¹Abrahamu wanguti, “Ndinguchichita chifukwa ndingughanaghana kuti, ‘Mulivi kopa Chiuta chingana nkhamanavi mu malo yagha, ndipo ŵakandibayanga chifukwa cha muwoli wangu.’

¹²Ndipo so ndi mzichi wangu nadi, mwana munthukazi wa ada, kweni kuti ndi mwana munthukazi wa ama cha: ndipo wanguŵa muwoli wangu.

¹³Ndipo penipo Chiuta wangundisanduska kuŵa wakuyingayinga kutuwa ku nyumba ya ada, ndingumunene muwoli wangu, ‘Wezi weniwo undichitiyenge ine ndi uwu: pa malo pe pose penipo tikazanga unene nde mzichi wako.’ ”

¹⁴Sono Abimeleke wanguto mberere ndi ng'ombe ndi ŵaŵanda ŵanthurumi ndi ŵanthukazi wanguŵapaska kwaku Abrahamu, ndipo wangumuwezge Sara muwoli wake.

¹⁵Ndipo Abimeleke wanguti, “Awona, charu changu che paurongo pako, uje penipo pose ungakhumba.”

¹⁶Kwaku Sara wanguti, “Awona, ndapaska mzichi wako chikwi chimoza (1,000) cha siliva, nge nchisimikizgu paku iwe mu maso ghaku wose ŵeniwo ŵendi iwe, ndi paurongo pamunthu we yose kuti we mukongorekwa.”

¹⁷Sono Abrahamu wanguromba kwaku Chiuta, ndipo Chiuta wanguchizga Abimeleke, ndipo wanguchizga so muwoli wake ndi ŵaŵanda ŵanthukazi viyo kuti wangupapa ŵana.

¹⁸Chifukwa Ambuya angujara vibali vyose vyamu nyumba yaku Abimeleke chifukwa chaku Sara, muwoli waku Abrahamu.