Read gitonga Chiyambo 25 Bible Online

Chiyambo 25 - gitonga bible

Chiyambo 25

¹Abrahamu wanguto munthukazi munyake yo zina lake lenga Ketura.

²Wangumupapiya Zimirana, Jokishana, Medana, Midiani, Ishibaka, ndi Shuna.

³Jokishana wenga wiske waku Sheba ndi Nedana. Ŵana ŵanthurumi ŵaku Dedana ŵenga Ashurimi, Letushimi ndi Leumimi.

⁴Ŵana ŵaku Midiyani ŵenga Efa. Efero, Hanoke, Abida, ndi Eledaya. Ŵose yaŵa ŵenga ŵana ŵaku Ketura.

⁵Abrahamu wangupaska vyose vyo wenga navyo kwaku Yisaki.

⁶Kweni ku ŵana ŵavidandanu vyake wangupaska vya ulera, ndipo wachalipo wamoyo wanguŵatuzgako ku mwana wake Yisaki, wanguŵatuma kuchiri ku vuma ku charu cha kuvuma.

⁷Yagha ndi mazuŵa gha virimika vya umoyo waku Abrahamu, virimika machumi pe chumi pachanya machumi ghankhonde ndi ghaŵi ndi vinkhonde (175).

⁸Abrahamu wangututa kwakumariya ndi wangufwa pa ukhongwe wakufikapo, wenga khongwe ndi wa virimika vinandi, ndipo wangusazgika ku ŵanthu ŵake.

⁹Yisaki ndi Yishumaele ŵana ŵake ŵangumuŵika mu mphanji ya Makipela mu munda waku Efroni mwana waku Zoara muHiti, ku vuma kwa Mamre,

¹⁰munda weniwo Abrahamu wangugula ku ŵaHiti. Muwa ndimu ŵanguŵika Abrahamu, ndi Sara muwoli wake.

¹¹Pavuli pa nyifwa yaku Abrahamu, Chiuta wangutumbika Yisaki mwana wake, ndipo Yisaki wajanga mu Bere-lahai-roi.

¹²Izi ndi mphapu zaku Yishumaele, mwana waku Abrahamu, mweniyo Hagara muEgipiti, muŵanda waku Sara, wangupapiya Abrahamu,

¹³yagha ndi mazina gha ŵana ŵanthurumi ŵaku Yishumaele ŵakuzumbulika mu mundondomeko wa kawi kawo. Nebiyoti wa umwali waku Yishumaele, ndi Kedara, Adibele, Mibishama,

¹⁴Misima, Duma, Masa,

¹⁵Hadada, Tema, Jeturu, Nafishi, ndi Kedema.

¹⁶Yaŵa ndi ŵana ŵanthurumi ŵaku Yishumaele, ndipo yagha ndi mazina ghawo, kwakulingana ndi mizi yawo, ndi kwakulingana ndi maugoŵi ghawo, mafumu chumi ndi ghaŵi kwakuyana ndi mitundu yawo.

¹⁷(Ivi ndi virimika vya umoyo waku Yishumaele, machumi pe chumi pachanya machumi ghatatu ndi vinkhonde ndi viŵi (137); wangufwa ndipo wangusazgika ku ŵabali ŵake.)

¹⁸Ŵana ŵaku Yishumaele ŵanguja kwamba ku Havila kwachifika ku Shuru, yo wathyana ndi Egipiti kukulazga ku Asiriya wanguja kwa kuthyana ndi ŵanthu ŵake wose.

¹⁹Izi ndi mphapu zaku Yisaki, mwana waku Abrahamu:

²⁰Abrahamu wenga wiske waku Yisaki, ndipo Yisaki mu ura wenga wa virimika machumi ghanayi (40) po wangutole muwoli wake Rebeka, mwana munthukazi waku Betele muAramu yo waku Padani-aramu, mzichi waku Labani muAramu.

²¹Ndipo Yisaki wangurombe muwoli wake ku Ambuya, chifukwa wenga chumba; ndipo Ambuya angumupaska cho wanguromba, ndipo Rebeka muwoli wake wanguzuwuka.

²²Ŵana ŵangulimbana mu moyo mwake, ndipo iyo wanguti, “Asani ndimu kulili, ndiŵiyanji wamoyo?” Viyo wanguruta kwachifumba Ambuya.

²³Ndipo Ambuya ŵanguti kwaku iyo, “Mwe mitundu yiŵi mu chibali chako; Ndipo ŵanthu ŵaŵi wo ukapapanga ŵakagaukananga. Yumoza wakaŵanga wakulimba kwakuruska munyake: mura wakatataliyanga mumana.”

²⁴Penipo mazuŵa gha kuchiriya kwake ghangukwana, mwenga ŵana ŵamuwoli mu chibali chake.

²⁵Wakudanga wangusotopokamo wakuti jee, liŵavu lake uli nchirundu cha cheya; viyo wangumudana zina lake Esau.

²⁶Pavuli mhurwa wake wangusotopoka, ndipo janja lake linguko rundi laku Esau; chifukwa ichi zina lake lingudanika Yakobe. Yisaki wenga wa virimika machumi ghankhonde ndi limoza (60) pa nyengo yeniyo nyinawo wanguŵapapa.

²⁷Ŵanguti ŵakuwa ŵahurwa yaŵa, Esau wenga chiŵinda chakuziŵa kubaya nyama, munthu wamu dondo; kweni Yakobe wenga wakuzika phe, wajanga mu mahema.

²⁸Yisaki wangwanja Esau, chifukwa warghanga nyama zake; kweni Rebeka wangwanja Yakobe.

²⁹Nyengo yimoza penipo Yakobe wabikanga chipere; Esau wangusere wachituwa mu dondo, ndi wangulakatuka ndi nja.

³⁰Ndipo Esau wanguti kwaku Yakobe, “Ndipaskeko chipere chiyera ndirghepo, pakuti ndalakatuka!” (Chifukwa ichi zina lake wangudanika Edomu.[6])

³¹Yakobe wanguti, “Chakudanga undiguliski ura wako.”

³²Esau wanguti, “Nde pafupi kufwa, ura wendi nchitu uli kwangu?”

³³Yakobe wanguti, “Udange chandirapiya danga.” Viyo wangumurapiya ndi wanguguliska ura wake kwaku Yakobe.

³⁴Sono Yakobe wangupaska Esau chiŵande ndi chipere, wangurgha ndi wangumwa, ndipo wangusoka ndi wangusere ku nthowa. Viyo ndimu Esau wanguyeye ura wake.