Read gitonga Chiyambo 3 Bible Online

Chiyambo 3 - gitonga bible

Chiyambo 3

¹Sono njoka yenga yakuchenje kwakuruska chamoyo chose chamu dondo cho Ambuya Chiuta wanguchita. Yinguti ku munthukazi, “Kumbi Chiuta wanguti, ‘Mungarghangapo cha vipasi vya muti we wose wamu munda wo’?”

²Ndipo munthukazi wanguti ku njoka yo, “Tingarghapo vipasi vya miti yamu munda;

³kweni Chiuta wanguti, ‘Kuti mungarghapo cha vipasi vya muti wo we mukati mu munda; chingana nkhuwukwaska, vinu mungafwa.’ ”

⁴Kweni njoka yo yinguti ku munthukazi, “Kuti mukafwanga cha.

⁵Pakuti Chiuta waziŵa kuti penipo murghengepo cho, maso ghinu ghakajurikanga, ndipo mukaŵanga uli ndi Chiuta, wakuziŵa umampha ndi uheni.”

⁶Viyo penipo munthukazi wanguwona kuti muti wo wenga wamampha kurgha, ndi so kuti wenga wamanyanda mu maso, ndi kuti muti wenga wakukhumbikwa kupaska zeru, wanguto chipasi ndi wangurgha; ndipo wangupaskako so murumi wake, ndipo wangurgha.

⁷Sono maso ghaku wo ŵaŵi ghangujurika, ndipo ŵanguziŵa kuti mbankhuli; ndipo ŵangusonerezgana mani gha mkuyu ndi ŵangujichitiya matheŵera.

⁸Ndipo ŵanguvwa muswayo wa Ambuya Chiuta wachenda mu munda pa msana wakuzizila; ndipo munthu yo ndi muwoli wake ŵangubisama ku chisku cha Ambuya Chiuta mukati mu miti yamu munda.

⁹Kweni Ambuya Chiuta wangudanirizga ku munthu yo, ndi wanguti kwaku iyo, “We pani?”

¹⁰Ndipo iyo wanguti, “Ndinguvwa muswayo winu mu munda, ndipo ndingopa chifukwa ndenga nkhuli; ndipo ndingubisama.”

¹¹Iyo wanguti, “Njani wangukunene kuti wenga nkhuli? Kumbi wargha vya muti wo ndingukuchenjezga kuti ungarghapo cha?”

¹²Munthu yo wanguti, “Munthukazi yo mungundipaska kuŵa nane, ndiyo wandipaska chipasi cha muti wo, ndipo ndargha.”

¹³Sono Ambuya Chiuta wanguti ku munthukazi, “Nchine ichi cho wachita?” Munthukazi wanguti, “Njoka yo yingundinyenga ndipo ndingurgha.”

¹⁴Ambuya Chiuta wanguti ku njoka: “Chifukwa wachita ichi, ndiwe wakutembeka kuruska vyakuŵeta vyose, ndi nyama zose zamu dondo; pamoyo pako ndipo wendiyenge, ndipo ukarghanga fuvu mazuŵa ghose gha umoyo wako.

¹⁵Ndikaŵikangapo umawongo pakati pako ndi munthukazi, ndi pakati pa mphapu yako ndi mphapu yake; iyo watemenge mutu wako, ndipo iwe utemenge chitende chake.”

¹⁶Ku Munthukazi wanguti: “Ndikandaniskanga ukongwa urwirwi wako pakuzuwuka, ukapapanga ŵana mu urwirwi; kweni utunthwiyenge murumi wako, ndipo iyo watufuliyenge iwe.”

¹⁷Ndipo kwaku Adamu wanguti: “Chifukwa wavwiya mazu gha muwoli wako, ndipo warghapo muti wo ndingukuchenjezga kuti, ‘Ungarghanga cha,’ njakutembeka nyata yo chifukwa chako; mu kutakataka ukarghanga vyake mazuŵa ghose gha umoyo wako;

¹⁸minga ndi visoyo vikakumezgiyanga, ndipo ukarghanga vya miti yamu dondo.

¹⁹Ukarghanga chiŵande, mu dukutira la chisku chako mpaka penipo uweriyenge ku nyata. Pakuti ungutoleka mwenimo; ndiwe fuvu, ndipo ukaweriyanga ku fuvu.”

²⁰Munthu yo wangudana zina la muwoli wake Eva, chifukwa wenga nyina wa ŵamoyo wose.

²¹Ndipo Ambuya Chiuta wanguchitiya Adamu ndi muwoli wake vivwalo vya vikumba, ndi wanguŵavwalika.

²²Sono Ambuya Chiuta wanguti, “Awona, munthu yo waŵa nge njumoza nafwe, kuziŵa umampha ndi uheni; ndipo sono, vinu wangatambaluwa janja lake ndi kutoko so vya muti wa umoyo ndi kurgha ndi kuja wamoyo muyaya.”

²³Chifukwa cho Ambuya Chiuta wangumutuzga mu munda wa Edene, kwachilima nyata kwaku yeniyo wangutolekako.

²⁴Wangumudikiskiya kubwalo munthu; ndipo ku vuma kwa munda wa Edene wanguŵikako ŵaKerubi,[2] ndi lipanga lakulipuka lo lang'anamukiyanga kose-kose, kuvikiriya nthowa yakuya ku muti wa umoyo.