Read gitonga Chiyambo 31 Bible Online

Chiyambo 31 - gitonga bible

Chiyambo 31

¹Ndipo Yakobe wanguvwa kuti ŵana ŵaku Labani ŵakambanga kuti, “Yakobe wato vyose vyo vyenga vya auskefwe; ndi kutuwa ku vya auskefwe ndimo wawone uromba wose.”

²Ndipo Yakobe wanguwona kuti Labani kuti wamuphwerenga uli ndi kali cha.

³Sono Ambuya anguti kwaku Yakobe, “Uwere ku charu cha ausu ndi ku ŵabali ŵako ndipo ine ndikaŵanga nawe.”

⁴Viyo Yakobe wangutuma kwachidana Rakelo ndi Leya ku munda kweniko kwenga viŵetu vyake,

⁵ndipo wanguti kwaku wo, “Ndiwona kuti auskemwe kuti ŵatindiphwere uli ndi kali cha. Kweni Chiuta wa ada waŵa nane pamoza.

⁶Muziŵa kuti ndatataliya auskemwe ndi nthazi zangu zose:

⁷ndipuuli auskemwe ŵandizgelera ndi ŵasintha mphoto yangu nyengo chumi, kweni Chiuta wengavi kuzomera kuti wandikomweske.

⁸Asani iyo wangukamba kuti, ‘Zamaŵanga ndizu zikaŵanga mphoto yako’, mbwenu viŵetu vyose vingupapa za maŵanga; ndipo asani wanguti, ‘Za mudyeka zikaŵanga mphoto yako’, mbwenu viŵetu vyose vingupapa za mudyeka,

⁹Viyo ndimu Chiuta wakwamphuliya ng'ombe za auskemwe, ndi wapaska ine.

¹⁰Mu nyengo ya kuzuwuka kwa Viŵetu ndinguyunuska maso ghangu ndi ndinguwona mu loto langu kuti mbuzi zinthukazi zo zachilipukanga pa viŵetu zenga za mudyeka, za maŵanga ndi za kuvurumutiya.

¹¹Sono mungelo waku Chiuta wanguti kwaku ine mu loto, ‘Yakobe,’ ndipo ndinguti, ‘Nde pano!’

¹²Ndi wanguti, ‘Yunuska maso ghako ndi wona mbuzi zose zenizo zichilipuka pa viŵetu vyo za mudyeka, zamaŵanga, ndi zakuvurumutiya; pakuti ndawona vyose vyenivyo Labani wachita kwaku iwe.

¹³Ndine Chiuta wa Betele, penipa ungutukutizga chiguŵa ndi mafuta ndi unguchita rapu kwangu. Sono usoke, urutenge utuwemo mu charu ichi; ndipo uwere ku charu cha kawi kako.’ ”

¹⁴Sono Rakelo ndi Leya ŵangumwamuka, “Kumbi mwe chigaŵa nanga nchimoza pamwenga chihara chakutijaliyako ifwe mu nyumba ya auskefwe?

¹⁵Kuti watitiwona nge te ŵalendo cha? Pakuti wakutiguliska ifwe ndipo wasakazanga ndrama za chimaru cha paku ifwe.

¹⁶Usambasi wose weniwo Chiuta wakukwamphuwa ku auskefwe ngwidu ndi ngwa ŵana ŵidu so; viyo sono, chenicho chose wakamba Chiuta kwaku iwe, chitanga.”

¹⁷Viyo Yakobe wangusoka, ndipo wangujalika ŵana ŵake ndi ŵawoli ŵake pa ŵagamila;

¹⁸ndipo wangukhwema ng'ombe zake zose, viŵetu vyake vyose vyo wangusakata, ng'ombe zo wenga nazo zo wangusakata mu Padani-aramu, warutanga ku charu cha Kanani ku awiske Yisaki.

¹⁹Labani wanguruta kwachisenga mberere zake, ndipo Rakelo wanguba ŵachiuta ŵamu nyumba ya awiske.

²⁰Ndipo Yakobe wangumugwentha Labani pakuti wengavi kumunene kuti wakathaŵanga.

²¹Wanguthaŵa pamoza ndi vyose vyenivyo wenga navyo, wangusoka, ndi wangwambuka Afrate, ndipo wangulazga chisku chake ku charu cha mapiri cha Gileada.

²²Panipo ŵangumunene Labani pa zuŵa la chitatu kuti Yakobe wakuthaŵa,

²³wanguto ŵabali ŵake pamoza nayo ndi wangumundondoloska kwa mazuŵa ghankhonde ndi ghaŵi wanguŵandika pafupi kuvuli kwake ku charu cha mapiri ghaku Gileada.

²⁴Kweni Chiuta wanguza kwaku Labani mu Aramu yo mu loto ndi usiku, ndi wanguti kwaku iyo, “Chenje ungakamba cha mazu nanga ngamoza kwaku Yakobe, nanga ngamampha pamwenga ghaheni.”

²⁵Ndipo Labani wangumusaniya Yakobe. Sono Yakobe wangujintha hema lake mu charu cha mapiri, ndipo Labani ndi ŵabali ŵake ŵangugoŵa mu charu cha mapiri chaku Gileada.

²⁶Ndipo Labani wanguti kwaku Yakobe, “Nchine cho wachita, pakuti wandizgelera ndi wathaŵa ndi ŵana ŵangu ulaka ndi mikoli yaku nkhondo?

²⁷Chifukwa chine ukuthaŵa kwakubisama, ndikundizgelera, ndi wengavi kundinene, mphanyi ndingukutuma ndi chimwemwe ndi ngoma, zisumu, kaligu ndi bangwe?

²⁸Ndipo chifukwa nchine wengavi kundizomerezga kulaliskana ndi kufyofyontha ŵana ŵangu ŵanthurumi ndi ŵanthukazi? Awona ukuchita kwa kupusa.

²⁹Nkhwangu kwaku ine kukuchitiya chiheni; kweni Chiuta wa ausu waŵereŵeta nane usiku waruta, kuti, ‘Chenje ungakamba kwaku Yakobe kamampha pamwenga kaheni cha.’

³⁰Ndipo sono iwe wathaŵa chifukwa ungunweka ukongwa nyumba ya ausu, kweni chifukwa chine ukuba ŵachiuta ŵangu?”

³¹Yakobe wangwamuka Labani, “Chifukwa ndingopa, pakuti ndingughanaghana kuti undikwamphuwenge ŵana ŵako kwanthazi.

³²We yose yo umusaniyenge ndi ŵachiuta ŵako kuti wakajanga wamoyo cha. Paurongo pa ŵabali ŵako, rongo paku vyo nde navyo keniko nkhako, ndipo uto keniko.” Sono Yakobe wengavi kuziŵa kuti Rakelo ndiyo wanguba ŵachiuta wo.

³³Viyo Labani wangusere mu hema laku Yakobe, ndi mu hema laku Leya, ndi mu hema la ŵaŵanda ŵanthukazi ŵaŵi, kweni kuti wangusaniya ŵachiuta ŵake cha. Ndipo wangutuwa mu hema laku Leya ndi wangusere mu hema laku Rakelo.

³⁴Sono Rakelo wanguto ŵachiuta wo ndi wanguŵaŵika mu chakukwelapo cha gamila, ndipo wangujapo pachanya paku wo. Labani wangutoskatoska mu hema lose, kweni kuti wanguŵabowozga cha.

³⁵Ndipo wanguti ku awiske, “Mbuya wangakalipa cha po ndatondeka kuma paurongo pako, pakuti vyo viŵiya tanthukazi vye paku ine.” Viyo wangupenja-penja, kweni kuti wanguŵasaniya cha ŵachiuta ŵamu nyumba yiya.

³⁶Sono Yakobe wangukalipa, ndi wanguchenya Labani, Yakobe wanguti kwaku Labani, “Cho ndalakwa nchine? Mphurupuru yangu njine? Pakuti wandindondoloska ndi ukari?

³⁷Chngana watoska mose muvinthu vyangu wasaniyamo kane kavinthu vya nyumba yako? Ukaŵike yapa paurongo pa ŵabali ŵako, alinga ŵeruzge pakati paku ifwe taŵaŵi.

³⁸Virimika ivi miskambu yako.

³⁹Yo yinguparurika ndi vikoko ndengavi kuza nayo kwaku iwe; ndingulipiyapo ine ndamweni; unguti ndilipiye po kutuwa mu janja langu, manyi zingubika ndi msana pamwenga yingubika ndi usiku.

⁴⁰Viyo ndimo, ndinguŵiya; chifundizi chingundipweteka ndi msana, kuzizira kungundipweteka ndi usiku, ndipo tulo twangu tungukamuka mu maso ghangu.

⁴¹Virimika ivi machumi ghaŵi vyo ndajanga mu nyumba yako; ndingukutataliya virimika chumi ndi vinayi (14) chifukwa cha ŵana ŵako, ndipo virimika vinkhonde ndi chimoza chifukwa cha viŵetu vyako, ndipo nyengo chumi ungusintha-sintha mphoto yangu.

⁴²Asani Chiuta wa ada, Chiuta waku Abrahamu ndi Chiuta waku Yisaki, wengavi kuŵa kuchiri kwangu, kwakuneneska sono mphanyi wandidika kwambura ndi kanthu mu manja. Chiuta wanguwona suzgu yangu ndi kutakataka kwa manja ghangu, ndipo wakuchenya iwe usiku waruta.”

⁴³Sono Labani wangwamuka ndi wanguti kwaku Yakobe, “Ŵana ŵanthukazi yaŵa mbangu, ŵana wo mbana ŵangu, viŵetu ndi viŵetu vyangu, ndipo vyose vyenivyo uwona vyangu. Kweni cho ndingachita nchine msana wale ku ŵana ŵanthukazi yaŵa, pamwenga ku ŵana ŵawo ŵeniwo ŵapapa?

⁴⁴Zanga sono tiye tichite phanganu iwe ndi ine; ndipo liŵe ukaboni pakati pako ndi ine.”

⁴⁵Viyo Yakobe wanguto mwa, ndi wanguwumika uli nchichiri.

⁴⁶Ndipo Yakobe wanguti ku ŵabali ŵake, “Unjikani mya.” Ndipo ŵanguto mya ŵanguwunjika ndundu; ndipo wangurgha pa pafupi ndi ndundu.

⁴⁷Labani wangudanapo kuti Yegara-sahaduta,[14] kweni Yakobe wangudanapo kuti Galede.

⁴⁸Labani wanguti, “Ndundu iyi mbukaboni pakati pako ndi ine, msana wale.” Chifukwa cho wangudanapo kuti Galede,

⁴⁹ndi chiguŵa wanguti ndi Mizipa chifukwa wanguti “Ambuya akhazge pakati pako ndi ine, kuti tikaŵanga pamoza cha yumoza ndi munyake.

⁵⁰Asani wamusuzga ŵana ŵangu, pamwenga wamutoliyapo ŵanthukazi ŵanyake pa ŵana ŵangu, chingana palivi munthu pamoza nafwe, kumbuka, Chiuta ndi kaboni pakati pako ndi ine.”

⁵¹Labani wanguti kwaku Yakobe, “Wona ndundu iyi ndi chiguŵa, vyeni vyo ndamika pakati pako ndi ine.

⁵²Ndundu iyi mbukaboni, chiguŵa nacho mbukaboni, kuti ndazamujumpha ndundu iyi cha kuza kwaku iwe, ndipo iwe nawe kuti ukajumphanga ndundu iyi cha ndi chiguŵa ichi kuza kwangu ndi urwani.

⁵³Chiuta waku Abrahamu ndi Chiuta waku Nahoro, Chiuta wa auskeu, weruzge pakati pidu.” Viyo Yakobe wangurapiya pa Chopu cha wiske Yisaki,

⁵⁴ndipo Yakobe wangupereka mpasku pa phiri lo ndi wangudana ŵabali ŵake kurgha chiŵande; ndipo ŵangurgha chiŵande ndipo ŵangucherezga usiku wose pa phiri lo.

⁵⁵Ndi mlenji-lenji Labani wangusoka, ndiwangufyofyontha ŵazuku ŵake ndi ŵana ŵake ŵanthukazi ndi wanguŵatumbika; pavuli wanguruta wanguwere kwake.