Read gitonga Chiyambo 32 Bible Online

Chiyambo 32 - gitonga bible

Chiyambo 32

¹Yakobe wanguruta ku nthowa jake ndipo ŵangelo ŵaku Chiuta ŵangukumana nayo;

²ndipo penipo Yakobe wanguŵawona wanguti, “Ili ndi liŵanja la nkhondo laku Chiuta!” Viyo wangudana zina la malo gha Mahanaimu.

³Ndipo Yakobe wangutuma mathenga ku urongo kwake kuya kwaku Esau muku wake mu charu cha Seiri, charu cha Edimu,

⁴wanguŵanene kuti, “Viyo ndimu mukakambiye ku mbuya wangu Esau: ‘Muŵanda wako Yokobe watiti, Ndaja nyengo yitali ndi Labani ndipo ndajako mpaka sono;

⁵ndipo ndendi ng'ombe, mbunda, mberere, ŵateŵeti ŵanthurumi, ndi ŵateŵeti ŵanthukazi; ndipo ndatumiya kukunene mbuya wangu, alinga kuti ndisaniye wezi mu maso ghako.’ ”

⁶Ndipo mathenga ghanguwere kwaku Yakobe, ghanguti, “Tingufika ku muku wako Esau, ndipo watuza kuzachikumana nawe, ndi ŵanthu machumi pe chumi ghanayi pamoza nayo.”

⁷Sono Yakobe wangutenthema ukongwa ndi wangusuzgika; ndipo wangugaŵa ŵanthu ŵeniwo ŵengo nayo, ndi mberere ndi ng'ombe, ndi ŵagamila mu mipingu yiŵi,

⁸wangughanaghana kuti, “Asani Esau waza ku mpingu umoza ndi kubaya, mpingu wo unyake uthaŵenge.”

⁹Ndipo Yakobe wanguti, “Mwa Chiuta wa ada Abrahamu ndi Chiuta wa ada Yisaki, Ambuya, mwaŵenimwe mungukamba nane kuti, ‘Uwere ku charu chako, ndiku ŵabali ŵako, ndipo nkhakuchitiyanga umampha,’

¹⁰kuti chitindenere cha chingana nchakumaliya cha vifundu vinu ndi ukongolekwa winu wose weniwo mwalongo ku muŵanda winu, pakuti ndi nthonga yangu pe ndingwambuka Yordane uyu; kweni sono ndaŵa maliŵanja ghaŵi.

¹¹Ndipo zomsokeni, nditukupemphani, ku janja la muku wangu, ku janja laku Esau, pakuti nditumopa vinu wangaza ndi kutibaya tose ŵanyinawo ŵa ŵana ndi ŵana.

¹²Kweni imwe mungukamba, ‘Ndikakuchitiyanga umampha, ndi kuchita mphapu yako kuŵa nge ndi mchenga wapa nyanja, wo kuti ungaŵerengeka cha chifukwa cha unandi.’ ”

¹³Viyo wangugona penipa usiku wuwa, ndipo wangutopo paku vyo wenga navyo, chalara cha muku wake, Esau,

¹⁴mbuzi zinthukazi machumi pe chumi ghaŵi (200), ndi mbuzi zinthurumi machumi ghaŵi (20), mberere zinthukazi machumi pe chumi ghaŵi (200), ndi mberere zinthurumi machumi ghaŵi (20),

¹⁵ŵagamila ŵakonkheska machumi ghatatu (30), ndi twana tawo, ng'ombe zinthukazi machumi ghanayi (40), ndi nkhuzi chumi, mbunda zinthukazi machumi ghaŵi (20), ndi nkhunda zinthurumi chumi limoza.

¹⁶Ivi wangupereka mu manja gha ŵateŵeti ŵake, mskambu, ndi mskambu paku wija, ndipo wanguti ku ŵateŵeti ŵake, “Danjiyani paurongo pangu, ndipo muŵikepo mukhanju pakati pa mskambu ndi mskambu.”

¹⁷Wanguchinyiya ŵa panthazi ukongwa, “Asani Esau muku wangu wakumana namwe, ndipo watukufumbani, ‘Mwe ŵakuyani? Mutiya pani? Ndipo vyakuyani vyo mwalongozga?’

¹⁸Po ndipo imwe mwamukuti, ‘Vya muŵanda winu Yakobe, vyatumika ku mbuya wangu Esau; ndipo nayo we kuvuli kwidu.’ ”

¹⁹Wanguchinyiya kwakukozgana ŵachiŵi ndi ŵachitiatu ndi wose wo ŵangulondo miskambu, “Mwamukamba chakukozgana kwaku Esau asani mwakumana nayo,

²⁰ndi mwamukamba kuti, ‘Kweni iyo muŵanda winu Yakobe watuza kuvuli kwidu.’ ” Pakuti wangughanaghana, “Ndimugowozgi mtima ndi vyaulera vyo vitimudanjiriya, ndipo ndiwonenge chisku chake; akhumba wakandilondiyanga.”

²¹Viyo vyaulera vingumudanjiriya paurongo pake; ndipo iyo mweneko wangugoŵa mu ugoŵi wuwa.

²²Mu usiku wenuwuwa wanguyuka ndi wanguto ŵawoli ŵake ŵaŵi, ŵateŵeti ŵanthukazi ŵake ŵaŵi, ndi ŵana ŵake chumi pachanya yumoza ndi wangwambuka pa dowoko la Yaboko.

²³Wanguŵato ndi wanguŵatuma kusirgha kwa msinji wo, ndipo wanguchita kwakukozgana ndi vinthu vyo wenga navyo.

²⁴Ndipo Yakobe wangujowoleka pakuyija; ndipo munthu wangukoana kulimbana nayo mpaka ku matanda kucha.

²⁵Po yuwa munthu wanguwona kuti walivi kumupunda Yakobe, wanguko mu udibwa wa chigha chake, ndipo chigha chaku Yakobe chingugweduka mu malunga po walimbananga nayo.

²⁶Sono wanguti, “Ndireke ndirutenge pakuti kutucha.” Kweni Yakobe wanguti, “Kuti ndikakutayanga cha mpaka penipo wanditumbika.”

²⁷Ndipo wanguti kwaku iyo, “Zina lako ndiwe yani?” Ndipo wanguti, “Yakobe.”

²⁸Sono iyo wanguti, “Zina lako kuti likadanikanga so Yakobe cha kweni Yisraele[15] pakuti walimbana ndi Chiuta ndi ŵanthu so, ndipo wapunda.”

²⁹Sono Yakobe wangumufumba, “Undinene, nditukupempha, zina lako.” Kweni iyo wanguti, “Chifukwa chine ufumba zina langu?” Ndipo penipa wangumutumbika.

³⁰Viyo Yakobe wangudana zina la malo gha Penuele, wanguti, “Chifukwa ndawonana ndi Chiuta maso ndi maso, kweni umoyo wangu wasungika wamoyo.”

³¹Lumwi lingutuliya pa liŵavu lake wachidumuwa pa Penuele, waganthiyanga chifukwa cha chigha chake.

³²Chifukwa chenichi kufikiya msana wale ŵaYisraele kuti ŵaturgha cha msipe wo wamu chiskunkhu wapa udibwa wa chigha, chifukwa wanguko mu udibwa wa chigha chaku Yakobe mu msipe wo wa chiskunkhu.