Read gitonga Chiyambo 33 Bible Online

Chiyambo 33 - gitonga bible

Chiyambo 33

¹Ndipo Yakobe wanguyunuska maso ghake, ndi wangulereska ndi awonani, Esau wazanga, ndi ŵanthu machumi pe chumi ghanayi (400), pamoza nayo. Viyo wangugaŵa ŵana wo pakati paku Leya ndi Rakelo ndi ŵateŵeti ŵanthukazi wo ŵaŵi.

²Ndipo wanguŵika ŵateŵeti ŵanthukazi ndi ŵana ŵawo paurongo, pavuli pawo Leya ndiŵana ŵake, ndi Rakelo ndi Yakobe ku umari waku wose.

³Iyo mweneko wangwenda paurongo pawo, wanguŵerama pasi kankhonde ndi kawi, mpaka penipo wanguza pafupi ndi muku wake.

⁴Kweni Esau wanguchimbiya kwachikumana nayo, ndi wangumuvumbatiya, ndipo wangumuvumbatiya, ndipo wangukotamiya pa khosi lake ndi wangumufyofyontha, ndipo wanguliya.

⁵Ndipo penipo Esau wanguyunuska maso ghake wanguwona ŵanthukazi ndi ŵana, wanguti, “Mbayani yaŵa we nawo?” Yakobe wanguti, “Mbana ŵeniwo Chiuta wangundipaska ndi wezi ndamuŵanda wako.”

⁶Sono ŵateŵeti ŵanthukazi ŵangundere pafupi, iwo pamoza ndi ŵana ŵawo ndi ŵangukotama pasi;

⁷Leya nayo viyo pe ndi ŵana ŵake ŵangundere pafupi ndi wangukotama pasi; ndipo pa umari Yosefe ndi Rakelo ŵangundere pafupi, ndipo ŵangukotama pasi.

⁸Esau wanguti, “Ung'anamuwanji ndi mpingu wose wo ndakumana nawo?” Yakobe wangwamuka, “Kuti ndisaniye wezi pa maso gha mbuya wangu.”

⁹Kweni Esau wanguti, “Nde navyo vyakukwana, wamhurwa wangu ujisungiye wamweni vyo we navyo.”

¹⁰Yakobe wanguti, “Awa, nditukupempha, asani ndasaniya wezi mu maso ghako, iku londa chaulera chakutuliya mu janja langu; pakuti kwakuneneska pakuwona chisku chako kuchita nge ndiwona chisku chaku Chiuta, pa wezi waviyo iku wandironde.

¹¹Londa, nditukuŵeyere, chaulera chondaza nacho kwako, chifukwa Chiuta wandichitiya wezi, ndi chifukwa ndendi vyakukwana.” Viyo wangumuchichizga, ndi wanguvironda.

¹²Sono Esau wanguti, “Tiyeni tirutenge pa lwendo lidu, ndipo ndikadanjiyanga paurongo pako.”

¹³Kweni Yakobe wanguti kwaku iyo, “Mbuya wangu waziŵa kuti ŵana mbakutomboloka, ndipo so ng'ombe ndi miskambu yakonkheska vyose viphwelereka ndi ine; ndipo asani vyalutilizga kwenda kwazuŵa limoza, viŵetu vyose vikafwanga.

¹⁴Mbuya wadanjiyenge paurongo pa muŵanda wake, ndipo Ine ndikalongozganga wengu wengu kwakulingana ndi nthangara za ng'ombe zo ze paurongo pangu ndi kwakulingana ndi nthangara za ŵana, mpaka penipo ndamufika ku mbuya wangu mu Seiri.”

¹⁵Viyo Esau wanguti, “Ndikusiyiyi ŵanthu ŵanyake wo ŵendi ine.” Kweni iyo wanguti, “Nchine cho ndisauka? Ndisaniye wezi mu maso gha mbuya wangu.”

¹⁶Viyo zuŵa leniliya Esau ŵanguwere ku nthowa yake kuya ku Seiri.

¹⁷Kweni Yakobe wanguya ku Sukoto ndipo wangujizenge nyumba, ndipo wanguchita makhora gha ng'ombe zake; viyo zina la malo lingudanika Sukoto.

¹⁸Ndipo Yakobe wangufika umampha ku msumba wa Shekemu, weniwo wemu charu cha Kanani, pa lwendo lake kutuwa ku Padani-arami; wangugowa paurongo pa msumba wo.

¹⁹Ndipo ku ŵana ŵaku Hamoro wiske waku Shekemu, wangugulako kacharu pa mtengo wa ndrama machumi pe chumi (100) penipo wangujintha hema lake.

²⁰Penipo wanguzengapo jochero la sembe ndi wangudanapo kuti Ele-elohe-Yisraele.[16]