Read gitonga Chiyambo 4 Bible Online

Chiyambo 4 - gitonga bible

Chiyambo 4

¹Ndipo Adamu wanguziŵa Eva muwoli wake, ndipo wanguzuwuka, ndi wangupapa Kaini, wakuti, “Ndaronde munthurumi ndi chovyo cha Ambuya.”

²Ndipo wanguwerezga, wangupapa mwana munyake Abelu. Abelu wenga wakuliska mberere, ndipo Kaini wenga mulimi wa munda.

³Ndipo kunguŵa pa nyengo yinyake Kaini wangutole ku Ambuya mpasku wa vipasi vya mu munda,

⁴ndi Abelu wangutole zakupapika zakudanga za mskambu wake ndi mafuta ghawo.

⁵Ndipo Ambuya angurumba Abelu ndi mpasku wake, kweni kaini ndi mpasku wake angumurumba cha. Viyo Kaini wangukara ukongwa, ndipo chisku chake chingubwanthuka.

⁶Ambuya anguti kwaku Kaini, “Chifukwa chine wakara, ndipo chabwanthukiyanji chisku chako?

⁷Asani uchita umampha, kumbi kuti ukalondelekanga cha? Ndipo asani ureka kuchita umampha, uheni ukhazga pa khomo; ukhumba iwe, kweni iwe uwutufuliye.”

⁸Kaini wanguti kwaku Abelu mhurwa wake, “Tiye ku munda.” Ndipo penipo ŵenga mu munda, Kaini wangusoke pa mhurwa wake Abelu, ndi wangumubaya.

⁹Sono Ambuya anguti kwaku Kaini, “We pani Abelu mhurwa wako?” Iyo wanguti, “Kuti ndiziŵa cha; kumbi ndine msungi wa mhurwa wangu?”

¹⁰Ndipo Ambuya anguti, “Nchine cho wachita? Mazu gha ndopa za mhurwa wako ghatindiliriya kutuwa ku nyata.

¹¹Ndipo sono we wakutembeka ku nyata, yo yajura mlomo wake kuronde ndopa za mhurwa wako kuturiya ku janja lako.

¹²Uchilima nyata, kuti yikawerezgangapo so cha kukupaska nthazi yake: ukaŵanga wakuthaŵathaŵa ndi wakuyingayinga pa charu chapasi.”

¹³Kaini wanguti ku Ambuya, “Kulangika nkhukuru kwakuruska mo ndingakunthiyapo.

¹⁴Awonani, mwandidikiska msana wale ku nyata; ndipo ndikabisikanga chisku; ndipo ndikaŵanga wakuthaŵathaŵa ndi wakiyingayinga pa charu chapasi, ndipo we yose wakundisaniya wakandibayanga.”

¹⁵Sono Ambuya anguti kwaku iyo, “Viyo cha! We yose yo wabayenge Kaini, thayu litolekiyenge paku yo kankhonde ndi kaŵi.” Ndipo Ambuya anguŵika chisimikizgu paku Kaini, vinu we yose wakumusaniya wangamubaya.

¹⁶Viyo Kaini wangutuwapo pa maso pa Ambuya, ndi wanguja mu charu cha Nodi, ku vuma kwa Edeni.

¹⁷Kaini wanguziŵa muwoli wake, ndi wanguzuwuka ndi wangupapa Enoke; ndipo wanguzenga msumba, ndi wangudana zina la msumba wo uli ndi zina la mwana wake Enoke.

¹⁸Kwaku Enoke kungupapika Irada; ndipo Irada wenga wiske waku Mehuyaele, ndi Mehuyaele wiske waku Metushaele, ndi Metushaele wiske waku Lameke.

¹⁹Ndipo Lameke wanguto ŵawoli ŵaŵi; zina la yumoza lenga Ada, ndi zina la munyake Zila.

²⁰Ada wangupapa Yabala; iyo wenga wiske waku wo ŵakuja mu mahema ndi ŵakuŵa ndi vyakuŵeta.

²¹Zina la mwana munyake lenga Yubala; iyo wenga wiske waku wose ŵakumba pangwi ndi kaligu.

²²Zila wangupapa Tubalakaini, wakusula vyakuchitiya vya mkuŵa ndi chisulo. Mzichi waku Tubalakaini wenga Nama.

²³Lameke wanguti ku ŵawoli ŵake: “Ada ndi Zila, vwani mazu ghangu, imwe mwawoli ŵaku Lameke, tegherezgani kwaku cho ndinena: Ndabaya munthu chifukwa chakundilasa, munyamata chifukwa chakundipuma.

²⁴Asani Kaini watayikiya thayu kankhonde ndi kaŵi, kwakuneneska Lameke ndi machumi ghankhonde ndi ghaŵi pachanya kankhonde ndi kaŵi (77).”

²⁵Ndipo Adamu wanguziŵa so muwoli wake, ndipo wangupapa mwana munthurumi ndi wangudana zina lake Sete, pakuti muwoli wake wanguti, “Chiuta wandipaska mwana munyake mu malo ghaku Abelu, pakuti Kaini wangumubaya.”

²⁶Kwaku Sete so kungupapika mwana munthurumi, ndipo wangudana zina lake Enoke. Pa nyengo yiya ŵanthu ŵangwamba kudana pa zina la Ambuya.