Read gitonga Chiyambo 42 Bible Online

Chiyambo 42 - gitonga bible

Chiyambo 42

¹Penipo Yakobe wanguvwa kuti mwenga trigu mu Egipiti, wanguti ku ŵana ŵake ŵanthurumi, “Chifukwa chine mulereskana ŵaka ku maso?”

²Ndipo wanguti, “Ehe, ndavwa kuti mwe trigu mu Egipiti; rutani, sikiyaniko mukatiguliyeko trigu, alinga kuti tiŵe ŵamoyo, kufwa cha.”

³Viyo ŵana ŵanyake ŵaku Yosefe chumi ŵanguruta kwachigula trigu mu Egipiti.

⁴Kweni Yakobe kuti wangutuma Benjamini mhurwa waku Yosefe cha, pamoza ndi ŵana ŵanyake, pakuti wangopa vinu chirwani chingamuwiya.

⁵Viyo ŵana ŵaku Yisraele ŵanguza kuzachigula mukati mwa ŵanthu ŵanyake ŵeniwo ŵanguzako, pakuti chilala chenga mu charu cha Kanani.

⁶Sono Yosefe wenga mweruzgi mura pa charu chiya; iyo ndiyo waguliskanga trigu ku ŵanthu wose ŵa charu chiya. Ndipo ŵana ŵanyake ŵaku Yosefe wanguza, ndipo ŵangukotama mitu yawo paurongo pake ndi visku vyawo pasi zgoli.

⁷Yosefe wanguŵawona ŵabali ŵake, ndipo wanguŵaziŵa, ndi wanguŵalonde nge mbalendo ndi wangukamba nawo kwankhaza, wanguti, “Mutuwa pani?” Iwo ŵanguti, “Tituwa ku charu cha Kanani, kuzachigula vyakurgha.”

⁸Viyo ndimu Yosefe wanguŵaziŵiya ŵana ŵanyake, kweni iwo kuti ŵangumuziŵa cha.

⁹Ndipo Yosefe wangukumbuka maloto ghake ghenigho wangulota gha paku iwo; ndipo wanguti kwakuwo, “Imwe mwe skoli, mwaziya kuzachisaniya unthomboro wa charu ichi.”

¹⁰Iwo ŵanguti kwaku iyo, “Awa ambuya, kweni ŵateŵeti ŵinu ŵaziya kugula vyakurgha.

¹¹Tose te ŵana ŵamunthu yumoza, te ŵanthu ŵakongolekwa, ŵateŵeti ŵako kuti ndi skoli cha.”

¹²Ŵanguti kwaku wo, “Awa, mbunthomboro wa charu ichi wo mwaziya kuzachiwona.”

¹³Ndipo iwo ŵanguti, “Ifwe, taŵateŵeti ŵinu, te ŵana chumi ndi ŵaŵi, ŵana ŵanthurumi ŵa munthu yumoza mu charu cha Kanani; ndipo, ehe, mumana wakumaliya msana wale wendi auskefwe, ndipo yumoza wakufwa.”

¹⁴Kweni Yosefe wanguti kwaku iwo, “Penipo ndakambiya ndimo palili, imwe mwe skoli.

¹⁵Pakuti chenichi mwesekenge, mo ulili umoyo waku Farao kuti mukatuwangapo pano cha mpaka penipo mwana munyinu wakumariya waza pano.

¹⁶Tumanipo yumoza waku imwe, ndiyu wakazi ndi mwana munyinu, penipo imwe mwe mu ukaidi, alinga kuti mazu ghinu gheseke vinu mwe uneneska mwaku imwe; asani po cha, mo ulili umoyo waku Farao mwe skoli.”

¹⁷Ndipo wose pamoza ŵanguŵaŵika mu ukaidi; kwa mazuŵa ghatatu.

¹⁸Pa zuŵa la chitatu Yosefe wanguti kwaku wo, “Chitani viyo ndipo mukaŵanga ŵamoyo, pakuti nditopa Chiuta:

¹⁹asani mwe ŵanthu ŵakongolekwa, zomerani kuti mwana munyinu yumoza waje mu kumangika kwinu, ndipo mwa ŵanyake mose murutenge mupinge trigu chifukwa cha chilala cha pa nyumba zinu,

²⁰ndipo mukazi ndi mwana munyinu wakumaliya kuno kwangu po ndipo mazu ghinu ghazamusandika ndipo kuti mukafwanga cha.” Ndipo ŵanguchitadi viyo.

²¹Penipo ŵangunenerana yumoza ndi munyake, “Tinguwona suzgu ya mzimu wake, penipo wangutiŵeyere kweni kuti tinguphwere cha; pa chifukwa chiya suzgu iyi yaza paku ifwe.”

²²Ndipo Rubene wangwamuka kuti, “Kumbi ndengavi kukuneniyani ine kuti mungananga pa mhurwa yo cha? Kweni mungukana kundivwa. Viyo sono patuza chilangu cha ndopa zake.”

²³Ŵengavi kuziŵa kuti Yosefe wanguziŵa vyo wakambanga, chifukwa penga mutoliki pakati pawo.

²⁴Pavuli wangutuwako kwawo ndi wanguliya; ndipo wanguwere kwaku wo ndi kukamba nawo. Ndipo wangutoko Simeoni kwaku wo ndi kumumanga pa maso pawo.

²⁵Ndipo Yosefe wangulangula kuti ghazazike ndi trigu mathumba ghawo, ndi kuwerezgiyamo ndrama zaku we yose mu mathumba ghawo, ndipo so kuŵapaska kamba wa ulendo. Ichi wanguŵachitiya.

²⁶Sono ŵangubapizga mbunda zawo ndi trigu, ŵangusoka.

²⁷Ndipo penipo yumoza waku wo wangubanuwa thumba lake kuti wapaski mbunda yake gaga pa malo pakula wanguwona ndrama zake mu mlomo wa thumba lake;

²⁸ndipo wanguti ku ŵana ŵanyake, “Ndrama zangu saŵikikamo so, eyizi mu mlomo wa thumba langu!” Pakuvwa viyo mitima yawo yingutenthema, ndipo ŵangung'anamukirana ndi kutenthema ŵakuti, “Nchine ichi chenicho Chiuta wachita kwaku ifwe?”

²⁹Ŵanguti ŵaza ku uskeu Yakobe mu charu cha Kanani, ŵangumunene vyose vyenivyo vinguŵawiya, ŵanguti,

³⁰“Yo munthu, mbuya wa charu chiya, wangukamba nafwe kwa nkhaza, ndipo wangutitundula kuti te skoli za charu chiya.

³¹Kweni tingumunene, ‘Te ŵanthu ŵakongolekwa, kuti te skoli cha;

³²te chumi ndi ŵaŵi pa wana widu, ŵana ŵa uskefwe yumoza; yumoza wakufwa, ndipo mumana wakumariya msana wale wendi auskefwe mu charu cha Kanani.’

³³Sono yo munthu, mweneko wa charu cho, wanguti kwaku ifwe, ‘Paku ichi ndikaziŵanga kuti mwe ŵanthu ŵakongolekwa, mundisiriyi yumoza mwana munyinu ndipo rutani ndi trigu chifukwa cha chilala cha nyumba zinu, ndipo sereni ku nthowa.

³⁴Mukazi nayo kuno kwangu mwana munyinu wakumariya; po ndipo ndikaziŵanga kuti mwe skoli cha kweni ŵanthu ŵakongolekwa, ndipo ndazakumuwezgiyani mwana munyinu, ndipo mukachitanga malonda mu charu ichi.’ ”

³⁵Ŵachikhutuwa mathumba ghawo, awonani, chitu cha ndrama cha munthu we yose chenga mu thumba lake; ndipo penipo iwo ndi uskeu ŵanguwona vitu vya ndrama zawo, ŵanguzizwa.

³⁶Ndipo Yakobe uskeu wanguti kwaku wo, “Mwandipaska chitima pa ŵana ŵangu: Yosefe wakufwa, ndipo Simeoni wafwa, ndipo sono munkhumba kuto Benjamini; vyose ivi vyaza pangu.”

³⁷Sono Rubene wanguti ku awiske, “Mubaye ŵana ŵanthurumi ŵangu ŵaŵi, asani ndireka kwachimuwezge kwinu; mumuŵike mu manja ghangu, ndipo ine ndazakumuwezge kwinu.”

³⁸Kweni iyo wanguti, “Mwana wangu kuti mukarutanga nayo cha, pakuti muku wake wakufwa, ndipo wakujapo iyo pe. Asani urwani unga muwiya pa ulendo weniwo mukaŵanga nawo, mukatoliyanga sisi langu lanyivu ku muunda ndi chitima.”