Read gitonga Chiyambo 6 Bible Online

Chiyambo 6 - gitonga bible

Chiyambo 6

¹Penipo ŵanthu ŵangwamba kwandana pa charu, ndipo ŵangupapa ŵana ŵanthukazi,

²ŵana ŵanthurumi ŵaku Chiuta ŵanguwona ŵana ŵanthukazi ŵa ŵanthu kuti ŵenga ŵakutowa ndipo ŵangujitole ŵawoli ŵeniwo ŵangusankha.

³Sono Ambuya anguti, “Mzimu wanguti kuti ukajanga mu munthu cha muyaya, pakuti iyo ndi nyama; mazuŵa ghake ghakaŵanga virimika machumi pe chumi, pachanya machumi ghaŵi (120).”

⁴ŴaNefilimi ŵenga mu charu mu mazuŵa ghenigha, ndiso pavuli penipo ŵana ŵaku Chiuta ŵangusere mu ŵana ŵanthukazi ŵa ŵanthu, ndi ŵangupapa ŵana. Yaŵa ŵenga ŵanthu virimbi wo ŵenga ŵamwaka, ŵanthu ŵambiri.

⁵Ambuya anguwona kuti utimbanizi wa munthu wenga ukuru mu charu ndiso mateskedu ghose gha maghanaghano gha mu mtima ghenga ghaheni pe nyengo zose.

⁶Ndipo Ambuya ŵenga ndi chitima kuti anguchita munthu mu charu, ndipo chinguŵakalariska mu mtima wawo.

⁷Viyo Ambuya anguti, “Ndisisitenge munthu yo ndalenga kumutuzga mu charu, munthu ndi nyama ndi vyakukwaŵa ndi viyuni vya mude, chifukwa nde wachitima kuti ndinguvichita.”

⁸Kweni Nowa wangusaniya wezi mu maso gha Ambuya.

⁹Izi ndi mphapu zaku Nowa. Nowa wenga munthu murunji, wambura kalema mu mgonezi wake; Nowa wangwenda ndi Chiuta.

¹⁰Ndipo Nowa wenga ndi ŵana ŵanthurumi ŵatatu, Shemu, Hamu, ndi Yafete.

¹¹Sono charu chinguwo mu maso ghaku Chiuta, ndi charu chinguzaza ndi ukari.

¹²Ndipo Chiuta wanguwona charu kuti chenga chakuwo; pakuti ŵamoyo wose ŵanguwozga nthowa zawo pa charu.

¹³Ndipo Chiuta wanguti kwaku Nowa, “Ndighanaghana kumara vyamoyo vyose; pakuti charu chazaza ndi ukari chifukwa chawo; ndikaŵanaganga pamoza ndi charu.

¹⁴Ujichitiye ngaraŵa ya miti, uchitemo vipinda mu ngaraŵa, ndipo uyimate mukati ndi kubwalo ndi phula.

¹⁵Kuyichita, uyichitenge viyo; Utali wa ngaraŵa mikono machumi pe chumi ghatatu (300), usani wake mikono machumi ghankhonde (5) ndi msinkhu wake mikono machumi ghatatu (30).

¹⁶Uchite mutenje wa ngaraŵa yo, uwumalizge mkono umoza pachanya; ndipo uŵike khomo la ngaraŵa ku mbeyeka yake; uyichite kuŵa ndi chipinda chapasi, ndi chapakati, ndi chapachanya.

¹⁷Pakuti ndikatoliyanga zandi wa maji pa charu kunanga nyama chakurengeka chose chamoyo mu charu cha pasi; chinthu chose chapa charu chapasi chikafwanga.

¹⁸Kweni nkhachitanga phanganu langu ndi iwe. Ukaserenga mu chombo ndi ŵana ŵako, muwoli wako, ndi ŵawoli ŵa ŵana ŵako.

¹⁹Mu vyakurengeka vyose vyamoyo utore mu chombo viŵi chinthurumi ndi chinthukazi vya mtunda we wose kuvisunga vyamoyo.

²⁰Tore viŵi kutuwa ku mtundu wose wa viyuni, viŵi kutuwa ku mtundu wose wa vinyama, ndi viŵi kutuwa ku mtundu wose wa vyakukwa wa pasi kuvisunga vyamoyo.

²¹Jitore mtundu wose wa vyakurgha ndi vironge. Ivi vikaŵanga vyakurgha vyako ndi vinyama vyose ndi viyuni.”

²²Nowa wanguchita ichi; wanguchita che chose cho Chiuta wangumulangulya.