Read gitonga Chiyambo 9 Bible Online

Chiyambo 9 - gitonga bible

Chiyambo 9

¹Ndipo Chiuta wangutumbika Nowa ndi ŵana ŵake ŵanthurumi ndipo wanguti kwaku iwo, “Papanane ndi mwandane ndi muzaze charu.

²Ndipo chofyu chinu ndi kupofya kwinu vikaŵanga pa nyama yose yapa charu ndi pa chiyuni chose cha mude, pa chinthu chose cho chikwaŵa pa charu ndi somba zose zamu nyanja vyakupaskika mu janja linu.

³Chinthu chose chakwenda cho nchamoyo chikaŵanga kurgha kwinu; nge ndimo ndingukupaskiyani mbeu ziŵisi, nditukupaskani vyose.

⁴Chimoza pe kuti mukargbanga nyama ndi umoyo wake cha, wo ndi ndopa zake.

⁵Ndopa za umoyo winu, kwakuneneska ndikakhumbanga kuzifumbiliya; ku chinyama chose ndizifumbiliyenge ndi ku munthu; ku mbali wa munthu we yose ndikakhumbanga umoyo wa munthu.

⁶We yose wakudira ndopa za munthu, ndopa zake nazo zidikenge ndi munthu munyake; pakuti Chiuta wangulenga munthu mu chikozgu chake.

⁷Ndipo imwe mupapane ndi mwandane, tapatane mu charu ndi mwandane mwenimo.”

⁸Sono Chiuta wanguti kwaku Nowa ndi ku ŵana ŵake ŵanthurumi pamoza nayo,

⁹“Ehe, ndimika phanganu langu ndi imwe ndi mphapu zinu za pavuli pinu,

¹⁰ndi vyamoyo vyose vyo vye pamoza namwe, viyuni, viŵeto, ndi nyama yose yamu charu pamoza namwe, zose zo zingutuliya mu ngaraŵa.

¹¹Ndimika phanganu langu ndi imwe, kuti kukachitilanga so cha kuti nyama zose zimare ndi maji gha zandi, ndipo kuti wakaŵangako zandi so cha, wakunanga charu chapasi.”

¹²Ndipo Chiuta wanguti, “Ichi nchisimikizgu cha phanganu wo ndichita pakati paku ine ndi imwe ndi vyose vyamoyo pamoza namwe, mu mgonezi wose wa mukucha.

¹³Ndimiha chiŵingavuwa changu mu mtambo, ndipo chikaŵanga chisimikizgu cha phanganu lo pakati paku ine ndi charu chapasi.

¹⁴Asani nditole mitambo pachanya pa charu ndipo chiŵingavuwa chiwoneka mu mitambo,

¹⁵ndikakumbukanga phanganu langu lo le pakati paku ine ndi imwe ndi nyama zose zamoyo; ndipo maji kuti ghakawerengapo cha kusanduka zandi kwachinanga nyama zose.

¹⁶Panipo chiŵingavuwa chemu mitambo, ndichilereskenge ndi nkhakumbukanga phanganu la muyaya pakati paku Chiuta ndi vyose vyo vye pa charu.”

¹⁷Chiuta wanguti kwaku Nowa, “Ichi nchisimikozgu cho cha phanganu lo ndamika pakati paku ine ndi imwe ndi nyama zose zo ze pa charu.”

¹⁸Ŵana ŵanthurumi ŵaku Nowa wo ŵangutuwa mu ngaraŵa ŵenga Shemu, Hamu, ndi Yafete. Hamu wenga wiske waku Kanani.

¹⁹Yaŵa ŵatatu ŵenga ŵana ŵanthurumi ŵaku Nowa, Ndipo kutuliya mwaku yaŵa charu chose chapasi chinguŵa ndi ŵanthu.

²⁰Nowa wenga mlimi makudanga wa nyata. Wangupanda munda wa mphereska,

²¹ndipo wangumwa vinyo, ndi wanguloŵe, ndipo wangula nkhuli mu hema.

²²Ndipo Hamu, wiske waku Kanani wanguwona nkhuli ya awiske, ndi wangunene ŵana ŵanyake ŵaŵi kubwalo.

²³Sono Shemu ndi Yafete ŵanguto chivwinkhu ŵanguchiŵika pa maphewa ghawo ghose, ndipo ŵangwenda chitunu-tunu ndi ŵanguvwinkha nkhuli ya uskeu cha.

²⁴Penipo wanguyuka ku vinyo wake ndi wanguziŵa chenicho mwana wake mumana ukongwa wanguchita kwaku iyo, wanguti,

²⁵“Watembeke Kanani muŵanda wa ŵaŵanda wakaŵanga iyo ku ŵana ŵanyake.”

²⁶Wangukamba so, “Watumbikike Shemu ndi Ambuya Chiuta wangu; ndipo Kanani waŵe muŵanda wake.

²⁷Chiuta watandazge Yafete, ndipo waje mu mahema ghaku Shemu; ndipo Kanani waŵe muŵanda wake.”

²⁸Pavuli pa zandi Nowa wanguŵa wa virimika machumi pe chumi ghatatu pachanya machumi ghankhonde (350).

²⁹Mazuŵa ghose ghaku Nowa ghenga virimika machumi pe chumi ghankhonde ndi ghanayi pachanya machumi ghankhonde (950); ndipo wangufwa.