Read gitonga 2 Samuele 12 Bible Online

2 Samuele 12 - gitonga bible

2 Samuele 12

¹Ndipo Ambuya angutuma Natani kwaku Davidi. Wanguza, ndipo wangunena nayo, “Mu msumba wakuti mwenga ŵanthu ŵaŵi, yumoza musambasi munyake mukavu.

²Uyu musambasi wenga ndi vyakuŵeta vinandi;

³mukavu wengavi kanthu kweni kamwana kamberere kanthukazi kamoza, ko wangugula, wangukalera, kangukuwa pamoza nayo ndi pamoza ndi ŵana ŵake; kangurgha vyakurgha vyake, ndi kumwiya mu nkhombo yake, kagonanga pa chifuŵa chake, ndipo kwaku iyo kanguŵa nge ndi mwana munthukazi.

⁴Sono ku musambasi yuwa kunguza mlendo, ndipo kuti wangunkhumba cha kutopo kamoza ka viŵeto vyake kunozge mlendo yo wangumufikiya, kweni wanguto kamberere kamukavu yuwa, kunozge munthu yo wanguza kwake.”

⁵Ndipo wangukwiya ukongwa pa munthu yuwa; ndipo wangunena ndi Natani, “Mo aliri amoyo Ambuya, munthu wakuchita ichi ngwakwenere nyifwa;

⁶ndipo wakawerezgiyangapo pa kamberere ka kanayi, chifukwa wachita chinthu ichi, ndipo chifukwa chakuti wengavi lisungu.”

⁷Natani wanguti kwaku Davidi, “Munthu yo ndimwe. Viyo atiti Ambuya, Chiuta waku Yisraele, ‘Ndingukupaka karonga pa ŵaYisraele, ndipo ndingukutaska ku janja laku Sauli;

⁸ndingukupaska nyumba ya ambuyako, ndi ŵawoli ŵa mbuyako mu chifuŵa chako, ndingukupaska nyumba yaku Yisraele ndi yaku Yuda; ndipo asani ivi vyenga vimana, mphanyi ndatinge ndikusazgiyengepo vinyake.

⁹Chifukwa nchine wayeya mazu gha Ambuya, kuchita cho nchiheni mu maso ghawo? Wakoso Uriya muHiti ndi lipanga, wamubaya ndi lipanga la ŵaAmoni, ndipo wato muwoli wake kuŵa muwoli wako.

¹⁰Sono pa chifukwa ichi lipanga kuti lituwengepo cha pa nyumba yako, chifukwa wayeya ine, ndipo watomuwoli waku Uriya muHiti kuŵa muwoli wako.’

¹¹Viyo atiti Ambuya, ‘Ehe, nkhakuyuskiyanga uheni kutuliya mu nyumba yaku wamweni, nkhatonga ŵawoli ŵako iwe uchilereska, ndiŵapaskenge ku mwanasi wako, ndipo wakalakwanga nawo pa mtandasanya.

¹²Iwe unguchitiya ichi ku ubende; kweni ine ndichichitiyenge pa maso gha ŵaYisraele wose, pa mtandasanya.’ ”

¹³Davidi wangunena ndi Natani, “Ndalakwiya Ambuya.” Ndipo Natani wanguti, “Ambuya atuzgapo uheni wako; kuti ukafwanga cha.

¹⁴Kweni ndipuuli pakuti chinthu ichi wayeya nacho ukongwa Ambuya, mwana yo wapapika kwako wakafwanga.”

¹⁵Pavuli paku ichi Natani wanguwere ku nyumba yake. Ndipo Ambuya angulanga mwana yo muwoli waku Uriya wangupapiya Davidi, wangutama.

¹⁶Viyo Davidi wanguŵeyere Chiuta chifukwa cha mwana; wangufunga kurgha, wangusere ndipo wangugona pasi pa waka usiku wose.

¹⁷Ndipo ŵara ŵamu nyumba yake ŵanguma pafupi nayo, kumuyuska; kweni kuti wanguzomera cha, nanga nkhurgha nawo pamoza.

¹⁸Pa zuŵa la chinkhonde ndi chiŵi mwana wangufwa; ndipo ŵateŵeti ŵaku Davidi ŵanguŵa ndi mantha kumunene kuti mwana wafwa; pakuti ŵatinge, “Awonani po mwana wenga wamoyo, tingurongoro nayo, ndipo kuti wangutivwa cha; na tikambengi uli kuti mwana wafwa? Asi wajichitiyenge kanthu kaheni wajipwetekenge.”

¹⁹Kweni po Davidi wanguwona kuti ŵateŵeti ŵake ŵatokotezgana pamoza, Davidi wanguziŵa kuti mwana wafwa ndipo wanguti ku ŵateŵeti ŵake, “Kumbi mwana wafwa?” Iwo ŵanguti, “Wafwa.”

²⁰Penipo Davidi wanguyuka pasi po wangugona, wangusamba, wangujipaka mafuta, ndipo wangusintha vivwalo vyake; ndipo wanguruta mu nyumba ya Ambuya, wangusopa; pavuli wanguwere ku nyumba yake, ndipo wanguti wafumba kurgha ŵangumujarikiya, wangurgha.

²¹Ŵateŵeti ŵake ŵangunena nayo, “Nchine chinthu ichi mwachita? Mungufunga kurgha munguliriya mwana po wenga weche ndi umoyo; sono po wafwa, muyuka muturgha.”

²²Iyo wanguti, “Mwana weche wamoyo ndingufunga kurgha ndinguliya, chifukwa ndinguti, ‘Njani waziŵa panyake Ambuya andichitiyenge lisungu, kuti mwana waŵenge wamoyo?’

²³Kweni sono wafwa; ndifungiyengenji kurgha? Kumbi ndikamuwezganga so? Ine ndirutenge kwaku iyo, kweni iyo kuti wawerenge so kunu kwangu cha.”

²⁴Pavuli Davidi wangusangaruska muwoli wake, Betesheba, wanguruta kwaku iyo, ndi kugona nayo; wangupapa mwana munthurumi, wangumudana zina Solomoni. Ndipo Ambuya angumwanja,

²⁵angutuma uthenga mwaku Natani mchimi; viyo wangudana zina lake Yedidiya,[3] wakwanjiwa wa Ambuya.

²⁶Ndipo Yoabu wangurwana ndi Raba mwina Amoni, wanguronda msumba wa ufumu.

²⁷Sono Yoabu wangutuma mathenga kwaku Davidi, wakuti, “Ndarwana nayo Raba; ndipo chakuruska nchakuti, ndaronda msumba wa maji.

²⁸Viyo sono, wunganiskani pamoza khamu lose laku japo ndipo mugoŵe kuthyana ndi msumba mu uronde; vinu nditakuti ndaronda ine ungadanika ndi zina langu.”

²⁹Davidi wanguwunganiska pamoza khamu lose, wanguruta ku Raba, wangurwana nawo ndipo wanguwuronda.

³⁰Ndipo wanguto chifuku cha karonga wawo ku mutu wake; cho uzitu wake wenga talente[4] la golide, mukati mwake mwenga mwa wakuzirwa; ndipo chinguŵikika pa mutu waku Davidi. Ndipo wangutuzgamo muskowo unandi ukongwa mu msumba wo,

³¹wangutuzgamo ŵanthu wo ŵengamo, wanguŵaŵika pa nchitu za kucheka mathabwa, zakukumba pasi ndi visulo, zakutema ndi zimbavi zachisulo ndipo wanguŵapaska nchitu za kuwumba ncherwa. Viyo ndimo wanguchitiya mu mizi yose ya Amoni. Sono Davidi ndi khamu lose ŵanguwere ku Yerusalemu.