Read gitonga 2 Samuele 2 Bible Online

2 Samuele 2 - gitonga bible

2 Samuele 2

¹Pavuli paku ichi Davidi wangufumbiya ku Ambuya, “Kumbi ndingakweriyako kwe kose mu misumba yaku Yuda?” Ambuya angunena nayo, “Rutanga.” Davidi wanguti, “Ndikwere ku muzi nuwu?” Ambuya anguti, “Ku Hebroni.”

²Viyo Davidi wanguruta kuwa ndi ŵawoli ŵake wose ŵaŵi, Ahinoama waku Yezerele ndi Abigaili choko chaku Nabala waku Karmele.

³Ndipo Davidi wanguruta ndi ŵanthu ŵake wo ŵenga nayo, yose ndi mbumba yake; ndipo ŵajanga mu mizi yaku Hebroni.

⁴Ŵanguza ŵanthu ŵaku Yuda, ndipo kwenikuwa ŵangupaka Davidi karonga pa nyumba yaku Yuda. Wanguti ŵamunene Davidi, “Mbanthu ŵaku Yabeshe-Gileada wo ŵanguŵika Sauli,”

⁵Davidi wangutuma methenga ku ŵanthu ŵaku Yabeshe-Gileada, wanguti, “Mutumbikike ndi Ambuya, chifukwa mungurongo muvwiyu uwu kwaku Sauli mbuyamwe, mungumuŵika!

⁶Ambuya amulongoni chanju ndi chigomekezgu! Ndipo ine ndimuchitiyeninge umampha chifukwa mwachita chinthu ichi,

⁷Mu chifukwa ichi manja ghinu ghakhozgeke, muŵe vinkhara; pakuti mbuyamwe Sauli wakufwa, ndipo nyumba yaku Yuda yapakaine kuŵa karonga wawo.”

⁸Abnere, mwana waku Nere, nduna ya nkhondo yaku Sauli wanguto Ishiboshete mwana waku Sauli, wangwambukiya nayo ku Mahanaimi.

⁹Ndipo wangumuŵika karonga pa Gileada pa ŵaAshuru ndi Yezerele ndi Efraimu ndi Benjamini ndi Yisraele yose.

¹⁰Ishiboshete, mwana waku Sauli, wenga ndi virimika machumi ghanayi (40) wachamba kuwusa ŵaYisraele, ndipo wanguwusa virimika viŵi. Kweni nyumba yaku Yuda yingurondo Davidi.

¹¹Nyengo yo Davidi wanguŵiya karonga pa nyumba yaku Yisraele mu Hebroni yenga virimika vinkhonde ndi viŵi ndi mwezi yinkhonde ndi umoza.

¹²Abnere mwana waku Nere, ndi ŵateŵeti ŵaku Ishiboshete mwana waku Sauli, wangutuwa mu Mahanaimi kuruta ku Gibeoni.

¹³Ndipo Yozbu mwana waku Zeruya ndi ŵateŵeti ŵaku Davidi, ŵangutuwa, ŵangukumana nawo pa chiziŵi cha Gibeoni; ŵanguja pasi, ŵanyake kusirgha limoza la chiziŵi, ŵanyake kusirgha linyake.

¹⁴Sono Abnere wangunena ndi Yoabu wanguti, “Zomera kuti ŵanyamata ŵasoke pakati pidu ŵaseŵenge.” Yoabu wanguti, “Ŵasoke.”

¹⁵Ŵangusoka ŵangwambukiyana ŵakuŵerengeka, chumi ndi ŵaŵi ŵa kwaku Benjamini ndi Ishiboshete mwana waku Sauli, ndi chumi ndi ŵaŵi ŵanyamata ŵaku Davidi.

¹⁶Ndipo ŵangukorana uyu ndi munyake ku mutu, uyu wanguwewepuwa lipanga ndi kugwaza nalo mu mbaghara za munyake; sono wose ŵanguwa pasi ŵangufwa mu chifukwa ichi malo gha ghangudanika Helkate-hazurimi cho ching'anamuwa munda wa malipanga gha uyi gho ghe pa Gibeoni.

¹⁷Ndipo nkhondo yingofya ukongwa zuŵa liya; ndipo Abnere ndi ŵaYisraele ŵangupumika pa maso pa ŵanyamata ŵaku Davidi.

¹⁸Ŵana ŵatatu ŵaku Zeruya ŵenga penipa, Yozbu, Abishai ndi Asahele. Kweni Asahele wenga mpusu kuchimbiya nge ndi mphoyo ya mu dondo.

¹⁹Ndipo Asahele wangurondo Abnere, ndipo pakuruta kuti wangupatukiya ku marghi pamwenga ku maze cha.

²⁰Abnere pakung'anamukiya kuvuli kwake wanguti, “Kumbi ndiwe Asakele?” Iyo wangwamuka, “Ndine.”

²¹Abnere wanguti, “Patukiya ku janja lako la marghe pamwenga la maze, kopo yumoza wa ŵanyamata wo, ndi uto vyakuskoŵa vyake.” Kweni Asahele kuti wanguzomera kupatuka kureka ku mulondo cha.

²²Abnere wanguwerezgapo, “Patuka reka kundilondo; ndikupumiyengenji kukuwiska pasi? Ndiyinuskenge uli chisku changu pa kulereska Yozbu mwana munyake?”

²³Mweni Asahele wangukana mbwenu kupatuka; viyo Abnere wangumugwaza pa moyo ndi songo ya mkondo wake; mwakuti mkondo ungutuliya ku msana wake, ndipo wanguwa ndi wangufwiya penipa. Ndipo wose wo ŵangufika pa malo po Asahele wangufwiya, ŵanguma chisisi.

²⁴Kweni Yoabu ndi Abishai ŵangulondo Abnere; ndipo pa kusere kwa dazi ŵangufika ku mthunthu wa Ama, wo we paurongo pa Gia pa nthowa yaku bozwa la Gibeoni.

²⁵Ndipo ŵaBenjamini ŵanguwungana pamoza pavuli paku Abnere, ndipo ŵanguŵa liŵanja limoza, ndipo ŵanguma pa chanya pa mthunthu.

²⁶Sono Abnere wangudana Yoabu wanguti, “Kumbi lipanga likarghanga muyaya? Kumbi kuti uziŵa cha kuti umari ukaŵanga wakuŵaŵa ndipo mpaka zuŵanji uneniyenge ŵanthu ŵako kuti ŵareke kulondo ŵabali ŵawo?”

²⁷Yoabu wanguti, “Chiuta wamoyo asani wengavi kurongoro, kwakuneneska mphanyi ŵanthu ŵatinge ŵarekenge kulondo ŵabali ŵawo mawa ndi mlenji.”

²⁸Viyo Yoabu wangumba mbata ndipo ŵanthu wose ŵangureka, ndi kuti ŵangulondo ŵaYisraele so cha nanga nkhurwana so.

²⁹Ndipo Abnere ndi ŵanthu ŵake Wangwenda usiku wose uwa kuporota mu Araba; ŵangwambuka Yordane, ŵangwenda msana wose ŵangufika ku Mahanaimi.

³⁰Yoabu wanguwe kukulondo Abnere; ndipo wanguti wawunganiska khamu lose, ŵanyamata ŵaku Davidi ŵangusoŵapu chumi pachanya ŵankhonde ndi ŵanayi pade paku Asahele.

³¹Kweni ŵateŵeti ŵaku Davidi ŵangubaya ŵanthu ŵaku Benjamini. Machumi pe chumi ghatatu pachanya machumi gha nkhonde ndi limoza (360) ŵanthu ŵaku Abnere.

³²Ndipo ŵangunyamuwa Asahele, ŵangumuŵika mu muunda wa awiske, wo wenga pa Betelehemu. Ndipo Yoabu ndi ŵanthu ŵake ŵangwenda usiku wose, ndipo kunguŵachiya pa Hebroni.