Read gitonga 2 Samuele 22 Bible Online

2 Samuele 22 - gitonga bible

2 Samuele 22

¹Ndipo Davidi wangukamba ku Ambuya mazu gha sumu iyi pa zuŵa lo Ambuya angumupozomoske ku janja la ŵarwani ŵake wose, ndi ku janja laku Sauli.

²Wanguti, “Ambuya ndi jarawi langu, ndi linga langu, ndipo mpozomoski wangu,

³Chiuta wangu, jarawi langu, mwaku mweniyo ndidingang'a, nguru yangu, ndi mtaski wangu wa nthazi, linga langu ndi chakudingang'amo changu, mtaski wangu, imwe mutinditaska ku mbembe.

⁴Ndidana ku Ambuya, yo ngwakwenere kurumbika, ndipo ndataskika ku ŵarwani ŵangu.

⁵“Pakuti ghangundiwunda mayigha gha nyifwa, misinji ya phasulu yingundofya;

⁶mikoŵa ya muunda yingundizunguliya, misampha ya nyifwa yingundikwetere.

⁷“Musuzgu yangu ndingudana ku Ambuya; kwaku Chiuta wangu ndingudana. Kutuliya ku nyumba yake yakupaturika wanguvwa mazu ghangu, ndipo nkhuta yangu yinguvwika mu makutu ghake.

⁸“Sono chingusukunika ndi chinguyaghayika charu; viŵanja vya kuchanya vingutenthema, vingusukunika, chifukwa wangukaripa.

⁹Usi ungukwera kutuwa mu mphunu zake, ndipo moto waku pirizga kutuwa mu mlomo wake; maka ghamoto nagho ghangukore kutuwa mwake.

¹⁰Wangukotamiska machanya, wanguza pasi, mdima wa munkhorwe wenga pasi pa marundi ghake.

¹¹Wangukwera pa kerubi, ŵanguphururuka, ŵanguwoneka pa mapapa gha mphepo.

¹²Wanguchita munkhorwe wakumuzunguliya kuŵa chakuvwinka chake, mtambo wamunkhorwe, kuwunjikana kwa maji.

¹³Mukuŵala kwa paurongo pawo, maka ghamoto ghangukole.

¹⁴Ambuya angugunda kuchanya, ndipo ŵa pachanya limu angukamba mazu ghawo.

¹⁵Ndipo angutuma mivwi anguŵaparghang'a; ndi limphezi, ndi anguŵayingiska.

¹⁶Penipo misisi ya nyanja yinguwoneka, viŵanja vya charu vinguŵikika pakweru, pakuchenya kwa Ambuya, pa kututa kwa mvuchi wa mphunu zawo.

¹⁷“Angufika kutuwa kuchanya, angundito, angundizuwuwa mu ndimba ya maji ghanandi.

¹⁸Angundipozomoska ku murwani wangu wanthazi, kwaku wo ŵangunditikha, chifukwa kwangu ŵenga ŵanthazi ukongwa.

¹⁹Ŵangundiziya mu zuŵa la soka langu; kweni uja wangu wenga pa Ambuya.

²⁰Angunditore mukati mu malo ghasani, angundipozomoska chifukwa angukondwere mwaku ine.

²¹“Ambuya angunditumbika kwakuyana ndi urunji wangu. Kwakuyana ndi kutowa kwa manja ghangu angundipaska mphoto.

²²Pakuti ndasunga nthowa za Ambuya, ndi kuti ndachita uheni kutuwako kwaku Chiuta wangu cha.

²³Pakuti vyeruzgu vyake vyose vyenga paurongo pangu, ndipo ku vilangulu vyake kuti ndingupatukako cha.

²⁴Ndenga wambura kususkika paurongo pake, ndipo ndingujisunga ku kwananga.

²⁵Mu chifukwa ichi Ambuya andipaska mphoto kwakuyana ndi urunji wangu, kwakuyana ndi kuphotoka kwangu mu maso ghawo.

²⁶“Ku wachifundu mukajirongonga achifundu; ku munthu wambura kalema mukajirongonga ambura kalema;

²⁷ku wakutowa mtima mukajirongonga akutowa mtima, ndipo ku muchenjezi mukajirongonga akunyongoroka.

²⁸Imwe mukataskanga ŵanthu ŵakuyuyulika, kweni maso ghinu ghe pa ŵakujikuzga kuŵasiskiya pasi,

²⁹Inya imwe mwaŵa nyali yangu Ambuya, ndipo Chiuta wangu wangweruska mdima wangu.

³⁰Inya ndi imwe ndibwanganduwenge mpingu wa nkhondo, mwaku Chiuta wangu ndi ulukenge pachanya pa linga.

³¹Chiuta uyu nthowa yake njakufikapo phanganu la Ambuya la woneka kuti ndauneneska; nguru ndiyo kwaku wose wo ŵadingang'a mwaku iyo.

³²“Pakuti njani Chiuta, kweni Ambuya? Ndipo jarawi njani, kweni Chiuta widu?

³³Chiuta uyu nchakudingang'amo changu chakukho, ndipo wachitiska nthowa yangu kuŵa yakunyoroka.

³⁴Wachitiska marundi ghangu nge ndi marundi gha mphoyo yinthukazi, ndi kundijariska kwakukhozgeka mu malo gha pachanya.

³⁵Wasambizga manja ghangu kurwa, mwakuti manja ghangu ghaziŵe.

³⁶Imwe mwawa nguru ya kundivikiriya, ndipo chovyu chinu chandikuzga ukongwa.

³⁷Imwe michapu yangu munguyipaska malo ghasani pasi pangu, ndipo marundi ghangu kuti ghanguteremuka cha;

³⁸ndingulondo ŵarwani ŵangu ndinguŵabwanganduwa kuti ndinguwere vuli cha mpaka po ndinguŵamara.

³⁹Ndinguŵamara; ndinguŵagwaza, mwakuti ŵanguyuka so cha; ŵanguwa kusi ku marundi ghangu.

⁴⁰Chifukwa imwe mungundimanga mu chiunu ndi nthazi kurwiya nkhondo; ŵakundiyukiya, imwe mwaŵathereska pasi pangu.

⁴¹Imwe mwachita ŵarwani ŵangu kuti ŵandirazgi msana, wo ŵangunditinkha ndipo ndinguŵaparghang'a.

⁴²Ŵangulereska, kweni kwengavi wakutaska; ŵanguliriya ku Ambuya, kweni kuti anguŵamuka cha.

⁴³Ndinguŵapera nge ndi fuvu la pasi, ndinguŵaphwata ndipo ndi nguŵapuwa nge mbulambwi wamu ŵagurwi.[6]

⁴⁴“Imwe mungundipozomoska ku kulimbana ndi ŵanthu; imwe mungundisunga nge ndi mutu wa mutundu; ŵanthu wo ndengavi kuŵaziŵa ŵangunditeŵete.

⁴⁵Ŵalendo ŵangundiziya chakukwaŵa pasi; po ŵanguti ŵavwa vya paku ine, ŵangundivwiya.

⁴⁶Ŵalendo ŵangufota, ŵanguza ndi chitenthe ŵachituwa mu malo ghawo ghakubisamamo.

⁴⁷“Ambuya mbamoyo; litumbikike jarawi langu, ndipo wakwezgeke Chiuta wangu, jarawi la utaski wangu,

⁴⁸Chiuta yo wakunditayiya thayu ndi kusiskiya ŵanthu pasi pangu,

⁴⁹yo wangundituzga mu ŵarwani ŵangu; imwe mungundikwezge pachanya pa ŵakupindikana nane, imwe mungunditaska ku ŵanthu ŵa mbembe.

⁵⁰“Pa chifukwa ichi ndikamuwonganinga, Ambuya, mukati mu ŵamitundu, ndipo ndimbenge mathamando ku zina linu.

⁵¹Apaska upundi ukuru ku karonga wawo, ndi kurongo lisungu la kwanja ku wakupakika wawo; kwaku Davidi ndi ku mphapu yake muyaya.”