Read gitonga 2 Samuele 23 Bible Online

2 Samuele 23 - gitonga bible

2 Samuele 23

¹Ndipo yagha ndi mazu ghaku mariya ghaku Davidi: Karongororedu kaku Davidi, mwana waku Jese, kakambidu ka munthu yo wangukwezgeka pachanya wakupakika waku Chiuta waku Yakobe, mwimbi wakunozga waku Yisraele:

²“Mzimu wa Ambuya urongorore mwangu, mazu ghake ghepa lilimi langu.

³Chiuta waku Yisraele wakamba, Jarawi laku Yisraele landinene: Po yumoza wausa pachanya pa ŵanthu kwakurunjika, kuwusa mukopa Chiuta,

⁴aŵaliya paku wo nge nkhucha kwa mlenji, nge nkhuŵala kwa dazi mu mlenji wambura mitambo, nge ndi vuwa yakutuzga chipozwa pasi.

⁵Inya kumbi nyumba yangu asi yituma viyo ndi Chiuta? Pakuti wapangana nane phanganu la muyaya lakurongosoleka mu vinthu vyose, ndi lakukho. Pakuti asi ŵachiyandaniskenge chovyo changu chose ndi khumbiro langu?

⁶Kweni ŵaheni wose ŵenge ndi minga yo yatayika; pakuti yingatoreka ndi janja cha;

⁷munthu wakuyikwaska watijirongosole chisulo ndi luti la mkondo; ndipo yitocheka ndi moto.”

⁸Yagha ndi mazina gha vinkhara vyo vyenga ndi Davidi; Yoshebashebete, mu Tahakemoni; wenga fumu ya ŵatatu; ndiyo wangurwa yija pa ŵanthu machumi pe chumi gha nkhonde ndi ghatatu (800) wo wangubaya pa nyengo yimoza.

⁹Wachiŵi kwaku iyo mukati mu vinkhara vitatu wenga Eleazara mwana waku Dodo, mwana waku Ahohi. Wenga ndi Davidi po ŵanguma pa maso pa ŵaFilisti wo ŵanguwungana kurwa nkhondo, ndipo ŵaYisraele ŵanyake ŵangutuwapo.

¹⁰Wangusoka wangukosore pasi ŵaFilisti mpaka po janja lake linguvuka, ndi kukaniliya ku lipanga, ndipo Ambuya anguchita upundi ukuru zuŵa liya, ŵanthu wanguwere vuli kwachizuwa vya ŵakufwa wati wamara iyo.

¹¹Pavuli paku iyo wenga Shama, mwana waku Age muHarari. ŴaFilisti ŵanguwungana pamoza pa Lehi, po penga kachigaŵa ka munda wakuzaza mankhamba; ndipo ŵanthu ŵanguthaŵa ku ŵaFilisti.

¹²Kweni iyo wanguma gwa mukati mu munda, wanguwuvikiriya, ndipo wangukoso ŵaFilisti, ndipo Ambuya anguchita upundi weni ukuru.

¹³Ndipo ŵatatu ŵa mafumu machumi ghatatu ŵangusika kuza kwaku Davidi pafupi pa nyengo yavuna ku mphanji yaku Adulama, po mpingu wa liŵanja la ŵaFilisti ŵangugugoŵa mu dambo la Refaimi.

¹⁴Davidi pa nyengo iyi wenga mulinga; ndipo linga la ŵaFilisti lenga pa Betelehemu.

¹⁵Ndipo mwakunweka mtima Davidi wanguti, “Owe mphanyi yumoza wangundipaska maji ghakumwa gho ghe mu chisima chaku Betelehemu, cho che pafupi pa likomo!”

¹⁶Ndipo vinkhara vitatu vingusere mukati mu ugoŵi wa ŵaFilisti, ndi kunegha maji mu chisima chaku Betelehemu cho chenga pa chipata, ŵangughapingiya kwaku Davidi. Kweni kuti wangumwa cha, wangughapunguliya pasi pa Ambuya.

¹⁷Wanguti, “Chindiŵiyi kutali, Ambuya, kuti ndichiti ichi. Kumbi ndimwengi ndopa za ŵanthu wo ŵanguruta pa kujipata maumoyo ghawo?” Pa chifukwa ichi kuti wangumwa cha. Ivi ndivyo vinguchitika ndi vinkhara vitatu viya.

¹⁸Sono Abishai mwana munyake ndi Yoabu, mwana waku Zeruya, wenga fumu paku ŵa machumi ghatatu. Ndipo iyo wangusoska mkondo wake pa ŵanthu machumi pe chumi ghatatu (300) wanguŵabaya, ndipo wanguŵa ndi lumbiri pade pa ŵatatu ŵa.

¹⁹Iyo wenga ndi ulemu ukuru mwaku ŵa machumi ghatatu, ndipo wanguŵa nduna yawo ya nkhondo; kweni kuti wanguyana ndi ŵatatu ŵa cha.

²⁰Ndipo Benaya mwana waku Yehoyada wenga chinkhara waku Kabzeli wakuchita nchitu zikhuru; wangubaya ŵanthu ŵaŵi ŵakukozgana ndi nkharamu ŵaku Moabu, wangusikiya so kwachibaya nkharamu mu zenje pa zuŵa lo wanguwiya nyankhuŵinda.

²¹Ndipo wangubaya muEgipiti, munthu wakuma kwakunozga. MuEgipiti wenga ndi mkondo mu janja lake; kweni Benaya wangumuziya ndi nthonga wangukwamphuwa mkondo mu janja la muEgipiti, ndi kumugwaza nawo mweneko.

²²Vinthu ivi ndivyo wanguchita Benaya mwana waku Yehoyada, ndipo wanguwa ndi lumbiri pade pa vinkhara viya vitatu.

²³Wanguŵa ndi ulemu mukati mwaku ŵa machumi ghatatu, kweni kuti wanguyana ndi ŵa ŵatatu cha. Ndipo Davidi wangumujarika pachanya pa ŵalonda ŵake.

²⁴Asahele mwana munyake ndi Yoabu wenga yumoza waku ŵa machumi ghatatu; Elhamani mwana waku Dodo waku Betelehemu.

²⁵Chama waku Harode, Elika waku Harode,

²⁶Haleze muPaliti, Ira mwana waku Ikese waku Tekoa,

²⁷Abiezere waku Anatote, Mebunaiyi muHushati,

²⁸Zalamoni muAhohite, Maharayi waku Netofa,

²⁹Helebi mwana waku Bana waku Natofa, Itai mwana waku Ribayi waku Gibea wa ŵina Benjamini,

³⁰Benaya waku Piratoni, Hidayi waku misinji yaku Gashi,

³¹Abialbono muArbatine, Azimavete waku Behurimi,

³²Aliyahaba waku Shalbono, ŵana ŵaku Yashenei, Jonafani,

³³Shama muHarari, Ahiamu mwana waku Shara muHarari,

³⁴Elifeleti mwana waku Ahasbayi waku Maka, Eliamu mwana waku Ahitofele waku Gilo,

³⁵Hezro waku Karmele. Parayi muArbite,

³⁶Igala mwana waku Natani waku Zoba, Bani muGada,

³⁷Zeleke muAmoni, Naharayi waku Beroto, wakupinga vidya vyaku Yoabu, mwana waku Zeruya,

³⁸Ira muItri, Garebe muItri,

³⁹Uriya muHiti: wose pamoza machumi ghatatu pachanya ŵankhonde ndi ŵaŵi (37).