Read gitonga 2 Samuele 6 Bible Online

2 Samuele 6 - gitonga bible

2 Samuele 6

¹Davidi wanguwunganiska so ŵanthu wose ŵakusankhika mu ŵaYisraele vikwi machumi ghatatu (30,000).

²Wangusoka ndi wose ŵakuŵa pamoza nayo kutuwa ku Bale-yuda, kwachito kuwa Bokosi la Ambuya lo lidanika zina la Ambuya ŵa maŵanja ŵakuja pa maKerubi.

³Ndipo ŵangupinga Bokosi laku Chiuta pa gareta lifya, ŵangulituzga mu nyumba yaku Abnadabu yo yenga pa mtunthu; sono Uza ndi Ahio ŵana ŵanthurumi ŵaku Abinadabu, ndiwo ŵendeskanga gareta lifya.

⁴Lakuŵa ndi Bokosi laku Chiuta, Ahio ndiyo wendanga paurongo pa Bokosi.

⁵Ndipo Davidi ndi nyumba yose yaku Yisraele ŵangukondwere pa maso pa Ambuya ndi nthazi yawo yose, ndi zisumu, ndi ŵakaligu, ndi ŵapangwi ndi ng'oma, ndi visokotu, ndi vijewere.

⁶Ndipo po ŵanguti ŵafika pa mbuli waku Nakoni, Uza wangutambasuriya janja lake pa Bokosi laku Chiuta wanguliko, pakuti ng'ombe zinguguŵa.

⁷Ndipo Ambuya angukalipa ndi Uza; Chiuta wangumukoso penipa chifukwa wangusoske janja lake pa Bokosi la Ambuya; ndipo wangufwiya musina mu Bokosi laku Chiuta.

⁸Davidi wangukwiya pakuti Ambuya angukwiya ndi Uza; ndipo malo gha ghakudanika Perezuza,[2] mpaka zuŵa linu.

⁹Davidi wangopa Ambuya zuŵa liya; wanguti, “Lizenge uli kwangu Bokosi la Ambuya?”

¹⁰Viyo Davidi kuti wangukhumba cha kutole Bokosi la Ambuya mu muzi wake; kweni Davidi wangulitore ku nyumba yaku Obededemu mu Giti.

¹¹Ndipo Bokosi la Ambuya linguja mu nyumba yaku Obededomu mu Giti myezi yitatu; ndipo Ambuya angutumbika Obededomu ndi nyumba yake yose.

¹²Ndipo kungukambika kwaku Davidi karonga kuti, “Ambuya atumbika nyumba yaku Obededomu, ndi vyose vyo wenavyo, chifukwa cha Bokosi laku Chiuta.” Sono Davidi wanguruta kwachito Bokosi laku Chiuta ku nyumba yaku Obededomu wanguza nalo mu muzi wake ndi kukondwere;

¹³ndipo wakupinga Bokosi wanguti wendapo michapu yinkhonde ndi umoza, wanguchita sembe ya ng'ombe ndi kakututuŵa.

¹⁴Sono Davidi wanguvina paurongo pa Ambuya ndi nthazi yake yose; ndipo wangujichinyiya efodo wa bafuta.

¹⁵Viyo Davidi ndi khamu lose la nyumba yaku Yisraele wangukwezga Bokosi la Ambuya ndi kukambura, ndi kayowozi wambata.

¹⁶Ndipo pakufika ndi Bokosi la Ambuya mu msumba waku Davidi, Mikala mwana munthukazi waku Sauli wangulereska kubwalo pa dangazi; ndi wanguwona karonga Davidi kuwuluka ndi kuvina paurongo pa Ambuya, wangumunyoza mu mtima wake.

¹⁷Ndipo ŵanguserezga Bokosi la Ambuya mukati, ndi kuliŵika pa malo ghake, mu hema lo Davidi wangulizenga; Davidi wangupereka mipasku ya kocha ndi mipasku ya chimangu paurongo pa Ambuya.

¹⁸Penipo Davidi wangumara kupereka mipasku yakocha ndi mipasku ya chimangu wanguŵatumbika ŵanthu mu zina la Ambuya ŵamaŵanja.

¹⁹Ndipo wangugaŵiya ŵanthu wose, khamu lose laku Yisraele, ŵanthurumi ndi ŵanthukazi, kwaku yose burunga la chiŵande thuŵi la nyama, ndi burunga la mphereska za kunika. Pavuli wose ŵanguruta, munthu yose ku nyumba yake.

²⁰Davidi wanguwe kwazitumbika ŵamu nyumba yake. Mikala mwana munthukazi waku Sauli wangutuwa ku kumana ndi Davidi, wanguti, “A! Nako nkhukuzgika ko karonga wa ŵaYisraele wajikuzga nako msana wale kujizuwa mweneko pa maso pa ŵasungwana ŵa ŵateŵeti ŵake, nge njumoza wa ŵanthu ŵazereza kujizuwa iyo mweneko kwambura soni!”

²¹Sono Davidi wanguti kwaku Mikala, “Penga pa maso pa Ambuya, yo wangundisankha pachanya pa ausu, pachanya pa nyumba yake yose, kundimika nge ndi mwana wa karonga pa ŵaYisraele, khamu la Ambuya, ndipo ndikondwenge paurongo pa Ambuya.

²²Ndikaŵanga wakuyuyulika ukongwa kuruska so yapa, nkhaŵanga wakuyuyulika mu maso ghako; kweni mu ŵasungwana yaŵa wakamba, mwaku iwo ndikakuzgikanga.”

²³Ndipo Mikala mwana waku Sauli wengavi kupapa mwana mpaka ku zuŵa la nyifwa yake.