Read gitonga 2 Samuele 7 Bible Online

2 Samuele 7 - gitonga bible

2 Samuele 7

¹Sono karonga wanguti waja mu nyumba yake, Ambuya anguti amupumuzga ku ŵarwani ŵake wose ŵakumuzingirizga,

²karonga wangunena ndi Natani mchimi, “Awona sono ine ndija mu nyumba ya miti ya milanji kweni Bokosi la Ambuya lija mu hema.”

³Natani wanguti, “Rutani chitani chose cho che mu mtima winu; pakuti Ambuya ŵe pamoza namwe.”

⁴Mu usiku wuwa mazu gha Ambuya ghanguza kwaku Natani,

⁵“Ruta kamunene mteŵeti wangu Davidi, ‘Viyo atiti Ambuya: Kumbi undizengiyenge ine nyumba yakujamo?

⁶Kuti ndaja mu nyumba cha kutuliya pa zuŵa lo ndingukwezge ŵaYisraele kutuwa mu Egipiti mpaka zuŵa linu, kweni ndaŵa wakwendendeka mu hema nge nchakujamo changu.

⁷Mu malo ghose mo ndenda ndi khamu lose laku Yisraele, kumbi ndikukambapo nanga nkhuŵeruzgi ŵaku Yisraele, wo ndinguŵalanguliya kuliska khamu langu Yisraele, kuti, “Mwarekiyanji kundimangiya nyumba ya miti ya milanji?” ’

⁸Mu chifukwa ichi ukambenge ndi mteŵeti wangu Davidi, ‘Viyo atiti Ambuya ŵa maŵanja, ndingukuto ku uliska, ku kulondo mberere, mwakuti uŵi mwana wa karonga pa khamu langu Yisraele;

⁹ndipo ndaŵa nawe kose ko unguruta, ndi kudumuwa ŵarwani ŵako wose paurongo pako; ndipo ndikuchitenge kuti zina lako liŵe likuru nge ndi zina la ŵanthu ŵakuvwika ŵacharu cha pasi.

¹⁰Ndipo ndi sankhenge malo gha khamu langu Yisraele, ndiwapandenge, mwakuti ŵajijaliye mu malo ghawo ndi ghawo, kuti ŵakasukuniskikanga so cha, ndipo nanga mbanthu ŵankhaza kuti ŵaŵasuzgenge so cha nge ndi kali,

¹¹kutuliya pa nyengo yo ndingumikiya ŵeruzgi pa khamu langu Yisraele; ndipo ndikupumuzgeninga ku ŵarwani ŵinu wose. Ndipo so Ambuya asimikizgiya iwe kuti Ambuya akakuchitiyanga nyumba.

¹²Po ghatakuti ghawara mazuŵa ghako uchigona pasi pamoza ndi ausu, nkhasoskanga mphapu yako pavuli pako, yo wakatuliyanga muliŵavu lako, ndipo ndikakhozganga ufumu wake.

¹³Wakazengiyanga nyumba zina langu ndipo ndikakhozganga chitengo cha ufumu wake muyaya.

¹⁴Ndikaŵanga wiske, iyo wakaŵanga mwana wangu, asani walakwa, ndimulangenge ndi nthonga ya ŵanthu ndi malikwechu gha ŵana ŵa ŵanthu;

¹⁵kweni kuti ndituzgengeko kwaku iyo chanju changu cha nge ndimo ndinguchituzgiyako kwaku Sauli mweniyo ndingumutuzgapo pa maso ghako.

¹⁶Ndipo myumba yako ndi ufumu wako vikajaririyanga kwauneneska pa maso ghangu muyaya; chitengo chako chikakuzgikanga muyaya.’ ”

¹⁷Kwakuyana ndi mazu ghose yagha, ndi kwakuyana ndi chiwona chose, ichi Natani wangumukonkhome Davidi.

¹⁸Sono karonga Davidi wangusere mukati ndi kuja pa maso pa Ambuya, wanguti, “Ndine yani ine, A, Ambuya Chiuta, ndipo nyumba yangu nkhanthu uli, kuti mwandifikiska ine pano?

¹⁹Kweni ndipuuli yaka kenga kanthu kamana mu maso ghinu, A, Ambuya Chiuta; mwarongoro so ndi nyumba ya mteŵeti winu kwa nyengo yitali yo yikazanga, ndipo mwandirongo migonezi ya mukucha. A, Ambuya Chiuta.

²⁰Ndipo kajako so nkhane ko Davidi wangarongoro kwinu? Pakuti imwe muziŵa ndi mteŵeti winu, A, Ambuya Chiuta!

²¹Chifukwa cha panganu linu, ndipo kwakulingana ndi mtima waku imwe mwija, mwachita vinthu vyose vikuru ivi kuti ndamteŵeti winu ndiviziŵi.

²²Mu chifukwa ichi ndimwe ŵakuru, A, Ambuya Chiuta; pakuti kulivi wakuyana namwe, ndipo kulivi Chiuta pade paku imwe kwakulingana ndi vyo tavwa ndi makutu ghidu.

²³Ndi mtundu nuwu unyake pa charu chapasi wo uyana ndi khamu linu Yisraele, ŵeniwo Chiuta wanguruta kwachiŵawombo kuti ŵaŵe wanthu ŵake, kujichitiya mweneko zinandi kuŵachitiya vinthu vikuru ndi vyakofya pa kudikiskiya kubwalo mutundu ndi ŵachiuta ŵake paurongo pa ŵanthu ŵake?

²⁴Ndipo imwe mukujimiskiya imwe mwaŵeni khamu linu Yisraele kuŵa ŵanthu ŵinu muyaya; ndipo imwe, A, Ambuya mukuŵa Chiuta wawo.

²⁵Ndipo sono Ambuya Chiuta, khozgani muyaya mazu gho mwakamba ghapa mteŵeti winu ndi ghapa nyumba yake, ndipo chitani nge ndimo mwakambiya;

²⁶ndipo zina linu likakuzgikanga muyaya, kuti, Ambuya wa maŵanja ndi Chiuta pachanya pa ŵaYisraele, ndipo myumba ya mteŵeti winu Davidi yikakuzgikanga pa maso pinu.

²⁷Pakuti imwe, O, Ambuya ŵa maŵanja Chiuta waku Yisraele, mwachita uvumbuzi uwu kwaku ndamteŵeti winu, mwakuti, ‘Ndikuzengiyeni nyumba,’ ndicho chifukwa chake ndamteŵeti winu ndasaniya chinganga kuromba rombo ili kwaku imwe.

²⁸Viyo sono, O, Ambuya Chiuta, imwe ndimwe Chiuta, mazu ghinu mbuneneska, mwapangana phanganu lamampha ili kwaku ndamteŵeti winu,

²⁹viyo sono mphanyi chamukondweskani kutumbika nyumba ya mteŵeti winu, mwakuti yijaririye pa maso pinu muyaya; chifukwa imwe, O, Ambuya Chiuta mwakamba, ndipo ndi chitumbiku chinu yikatumbikikanga nyumba ya mteŵeti winu muyaya.”