Read gitonga 2 Samuele 8 Bible Online

2 Samuele 8 - gitonga bible

2 Samuele 8

¹Pavuli paku ichi Davidi wangupunda ŵaFilisti ndi kuŵathereska, ndipo Davidi wanguronda Metegama ku janja la ŵaFilisti.

²Wangupunda ŵamoabu, ndipo wanguŵapima ndi chingwi wanguŵagoneka pasi; wangupima mizere yiŵi kuti ŵabayike, ndipo muzere utali umoza kuŵasiya ŵamoyo. ŴaMoabu ŵanguŵa ŵaŵanda kwaku Davidi ŵangupereka mthulu.

³Davidi wangupunda so Hadadezere mwana waku Rehobo, karonga waku Zoba, wachiruta kwachiwerezgamo mazaza ghake pa msinji wa Efrate.

⁴Ndipo Davidi wangukwamphuwa ŵanthu ŵa pakavalo, chikwi ndi machumi pe chumi ghankhonde ndi ghaŵi (1,700) ndi ŵankhondo ŵakwenda pasi vikwi machumi ghaŵi (20,000); ndipo Davidi wangufyo ŵakavalo wose ŵamagareta, kweni wangusiyapo ŵakwenere pa magareta machumu pe chumi (100).

⁵Wanguti ŵaza ŵaSiriya ŵaku Damasko kuzachovya Hadadezere karonga waku Zoba, Davidi wangubaya ŵaSiriya vikwi machumi ghaŵi pachanya viŵi (22,000).

⁶Sono Davidi wanguŵika malinga mu Aramu waku Damasko viyo ŵaSiriya ŵanguŵa ŵaŵanda ŵaku Davidi ŵangupereka mthulu. Ambuya angupaska upundi kwaku Davidi kose ko wangurazga.

⁷Davidi wanguronda zinguru za golide zo ŵangupinga ŵanyamata ŵaku Hadadezere, wanguza nazo ku Yerusalemu.

⁸Kutuwa ku Beta ndi ku Berotai, misumba yaku Hadadezere, karonga Davidi wangutoko mkuŵa unandi.

⁹Penipo Toi karonga waku Hamati wanguti wavwa kuti Davidi wathereska nkhondo yose waku Hadadezere,

¹⁰Tio wangutuma mwana wake Yoramu ku karonga Davidi kwachimtauzga ndi kumtumbika chifukwa wangurwana ndi Hadadezere ndi wangumupunda; pakuti nyengo zinandi Hadadezere wanguŵa pa nkhondo ndi Toi. Ndipo Yoramu wangupinga viyaŵi vya siliva, vya golide, vya mkuŵa;

¹¹ivi navyo karonga Davidi wanguvipatuliya ku Ambuya pamoza ndi siliva ndi golide vyo wangupatuwa vyakutuwa mu mitundu yose yo wanguthereska,

¹²vya ŵaEdomu, ŵaMoabu, ŵaAmoni, ŵaFilisti, Amaleke ndi kutuliya mu vyakuskoŵa vyaku Hadadesere mwana waku Rehobo, karonga waku Zoba.

¹³Ndipo Davidi wangujitore zina, Wanguti wawe, wangubaya ŵaEdomu vikwi chumi ndi vinkhonde ndi vitatu (18,000) mu dambo la Mehe.

¹⁴Ndipo wanguzenga malinga mu Edomu, ghanguzungulizga Edomu yose, ndipo wose ŵaEdomu ŵanguŵa ŵaŵanda ŵaku Davidi. Ambuya angumupaska upundi Davidi kose ko wangwenda.

¹⁵Viyo Davidi wanguwusa paku Yisraele yose; wangweruzga ndi kuchitiya urunji khamu lake lose;

¹⁶Yoabu mwana waku Zeruya wanguŵa wapachanya pa ŵankhondo; Yehoshafati mwana waku Ahiludu wenga mlembi wa makani;

¹⁷Zadoki mwana waku Ahitubu ndi Ahimeleke mwana waku Abiatara ŵenga ŵazukuru; Seraya wenga mlembi mura;

¹⁸Benaya mwana waku Yehoyada wenga wapachanya pa ŵaKerete ndi ŵaPelete, ndipo ŵana ŵaku Davidi ŵenga ŵazukuru.