Read gitonga 2 Samuele 9 Bible Online

2 Samuele 9 - gitonga bible

2 Samuele 9

¹Ndipo Davidi wanguti, “Kumbi kweche so munyake yo wajako wa nyumba yaku Sauli, kuti ndi muchitiye lisungu chifukwa chaku Jonafani?”

²Sono wengako mteŵeti wa nyumba yaku Sauli yo zina lake lenga Ziba, ndipo ŵangumudaniya kwaku Davidi, karonga wangumufumba, “Ndiwe Ziba kumbi?” Iyo wanguti, “Mteŵeti winu ndine.”

³Karonga wanguti, “Kumbi kweche so munyake yo wajako wa nyumba yaku Sauli kuti ndimurongo lisungu laku Chiuta?” Ziba wanguti, “Walipo mwana waku Jonafani; ngwakupunduka marundi.”

⁴Karonga wangunena nayo, “Wepani?” Ziba wanguti, “We mu nyumba yaku Makiri mwana waku Amiele pa Lodebara.”

⁵Karonga Davidi wangutuma ndipo wanguza nayo kutuwa ku nyumba yaku Makiri mwana waku Amiele, pa Lodebara.

⁶Ndipo Mefiboshete mwana waku Jonafani, mwana waku Sauli wanguza kwaku Davidi, ndipo wanguwa pamaso pake kumulambiya. Ndipo Davidi wanguti, “Mefiboshete!” Iyo wangwamuka, “Awonani, ndamteŵeti winu.”

⁷Davidi wangunena nayo, “Ungopanga; pakuti ndikurongonge lisungu pa chifukwa cha ausu Jonafani, ndipo nkhakuwezgiyanga charu chose chaku Sauli ausu; ndipo ukarghanga pa gome langu mazuŵa ghose.”

⁸Ndipo iyo wangumulambiya, wanguti, “Nkhanthu uli ndamuŵanda winu, kuti mulereske pa garu wakufwa nge ndine?”

⁹Sono karonga wangudana Ziba, munyamata waku Sauli wangunena nayo, “Chose cho chenga chaku Sauli ndi chaku nyumba yake, chose ndapereka ku mwana wa mbuyako.

¹⁰Viyo iwe ndi ŵana ŵako ndi ŵateŵeti ŵako mukamulimiyanga munda, ndipo muzenge navyo vipasi, mwakuti mwana wa mbuyako waŵenge ndi chiŵande chakurgha; kweni Mefiboshete mwana wa mbuyako wakarghanga pa gome langu mazuŵa ghose.” Ziba wenga ndi ŵana ŵanthurumi chumi ndi ŵankhonde, ndi ŵateŵeti machumi ghaŵi.

¹¹Sono Ziba wangunena ndi karonga, “Kwakuyana ndi vyose vyo mbuyangu karonga walanguliya mteŵeti wake, ndimo mteŵeti winu wakachitiyanga.” Viyo Mefiboshete wangurgha pa gome laku Davidi, nge njumoza wa ŵana ŵa karonga.

¹²Mefiboshete wenga ndi mwana muhurwa, yo zina lake lenga Mika; ndipo wose wo ŵenga mu nyumba yaku Ziba ŵanguŵa ŵateŵeti ŵaku Mefiboshete.

¹³Mefiboshete wanguja mu Yerusalemu; ndipo mazuŵa ghose warghanga pa gome la karonga; kweni wenga wakupunduka marundi ghose.