Read gitonga 1 ŴaKaronga 1 Bible Online

1 ŴaKaronga 1 - gitonga bible

1 ŴaKaronga 1

¹Sono karonga Davidi wangukota wenga ndi virimika vinandi ukongwa, ndipo chingana ŵangumuvwinkha ndi saru zinandi kuti wanguvwa chifundizi cha.

²Chifukwa ichi ŵaŵanda ŵake ŵanguti kwaku iyo, “Mwali wa mpupuka wapenjeke mbuya karonga awangu, kuti waŵe wakuphwere karonga ndi kuŵa mlezi wake, waŵe wakura pa chifuŵa chinu, alinga kuti mbuya ndi karonga wangu wafundiskike.”

³Viyo ŵangupenjapenja mwali wakutowa mu charu chose chaku Yisraele, ndipo ŵangusaniya Abishagi muChunami, ndipo ŵangumtole ku karonga.

⁴Mwali yo wenga wakutowa weniukongwa, ndipo wanguŵa mlezi wa karonga ndi wangumuteŵete, kweni karonga wengavi kuziŵirizgana nayo.

⁵Sono Adoniya mwana waku Hagiti wangujitumphuska yija wanguti, “Ine ndikaŵanga karonga,” ndipo wangujirongosole magareta ndi wakukwere pakavalo, ndi ŵanthu machumi ghankhonde ŵakuchimbiya ku urongo kwake.

⁶Awiske ŵengavi kumukaraliska chingana ndi nyengo yimoza ndi mazu ghakuti, “Chifukwa nchine cho wachitiya viyo ndi viyo?” Iyo nayo so wenga munthu wakunozga; ndipo pakuwa kwake wanguja pa mutu paku Absalomu.

⁷Wangukambirana ndi Yoabu mwana waku Zeruya ndi Abiatara mzukuru; ndipo ŵangurondo Adoniya ndi ŵangumovya.

⁸Kweni Zadoki mzukuru, ndi Benaya mwana waku Yehoyada, ndi Natani mchimi, ndi Shimei, ndi Rei ndi vinkhara vya nthazi vyaku Davidi kuti ŵenga pamoza ndi Adoniya cha.

⁹Adoniya wangusaska sembe ya mberere, ng'ombe, ndi vyamafuta pafupi ndi Mwa wa Njoka, wo wepafupi ndi Enrogeli, ndipo wangudaniyako ŵana ŵanyake wose, ŵana ŵa karonga ndi ŵanangwa wose ŵamu ufumu waYuda,

¹⁰kweni kuti wangudana Natani mchimi pamwenga Benaya pamwenga vinkhara pamwenga Solomoni mbali wake cha.

¹¹Sono Natani wanguti kwaku Betesheba, nyina waku Solomoni, “Kumbi ulivi kuvwa kuti Adoniya mwana waku Hagiti waŵa karonga ndi kuti Davidi mbuyafwe walivi kuchiziŵa ichi?

¹²Viyo sono zanga, ndikupange fundu, alinga kuti utaske umoyo waku wamweni ndi umoyo wa mwana wako Solomoni.

¹³Ukasere kwambura kuswera ku karonga Davidi, ukamunene kuti, ‘Kumbi kuti ndimwe cha, mbuyangu karonga, mungurapa ku muŵanda munthukazi winu, munguti, Solomoni mwana wangu wawusenge pavuli pangu, ndipo wakajanga pa chitengo changu? Na chifukwa nchine cho Adoniya waŵiya karonga?’

¹⁴Sono po iwe weche kurongoro ndi karonga, ine ndamsere pavuli pako ndazamkhozga mazu ghako.”

¹⁵Viyo Betesheba wanguruta ku karonga mu chipinda chake (nyengu iyi karonga wangukota ukongwa, ndipo Abishagi mu Chunami wateŵetiyanga karonga).

¹⁶Betesheba wangukotamiska mutu wake pasi wangumlambiya, ndipo karonga wanguti, “Nchine cho unweka?”

¹⁷Wanguti kwaku iyo “Mbuyangu, mungurapiya muŵanda munthukazi winu pa Ambuya Chiuta winu, mungati, ‘Solomoni mwana wako wakawusanga pavuli pangu, ndipo wakajanga pa chitengo changu.’

¹⁸Kweni sono, awonani, Adoniya ndiyo karonga, chingana imwe karonga wangu, mureka kuziŵa ichi.

¹⁹Wapereka sembe ya ng'ombe, vyakututuŵa, ndi mberere zinandi ukongwa, ndipo wadana ŵana wose ŵa karonga, Abiyatara mzukuru ndi Yoabu mura wa nkhondo; kweni muŵanda winu Solomoni walivi kumudana.

²⁰Ndipo sono, mbuyangu karonga, maso gha ŵaYisraele wose ghalereska pinu, kuti maŵanene njani yo wakajanga pa chitengo cha mbuyangukaronga pavuli pake.

²¹Vinu kukaŵanga, watakuti wala pasi mbuyangu karonga pamoza ndi awiske, ine ndi mwana wangu Solomoni tikakambikanga kuti te ŵachiguŵisku.”

²²Po wenga weche kurongoro ndi karonga, Natani mchimi wangusere.

²³Ndipo ŵangunene karonga, “Ehe Natani mchimi uyu.” Ndipo wanguti waza paurongo pa karonga wangkotama, chisku chake pasi.

²⁴Ndipo Natani wanguti, “Mbuyangu wakawusanga pavuli pangu ndipo wakajanga pa chitengo changu?

²⁵Chifukwa wasika msana wale wapereka sembe yang'ombe, vyakututuŵa, ndi mberere zinandi ukongwa, ndipo wadana ŵana wose ŵa karonga, Yoabu mura wankhondo ndi Abiatara mzukuru; ndipo ehe, ŵaturgha ndi kumwa paijrongo pake, ndipo ŵatiti, ‘Waive wa umoyo utali karonga Adoniya!’

²⁶Kweni ine ndamuŵanda winu, ndi Zadoki mzukuru, ndi Benaya mwana waku Yehoyada, ndi muŵanda winu Solomoni, walivi kutidana.

²⁷Kumbi ichi chachitika ndi mbuyangu karonga ndipo mulivi kuŵanene ŵaŵanda ŵinu yo wakajanga pa chitengo cha mbuyangu karonga pavuli pake?”

²⁸Sono karonga Davidi wangwamuka, “Mudaniyeni kuno Betesheba.” Viyo wanguza pamaso ndipo wangma paurongo pake.

²⁹Ndipo karonga wangurapa, wanguti, “Mo ajaliya amoyo Ambuya, ŵeniwo awombo mzimu wangu ku masuzgu ghose,

³⁰nge ndimo ndingurapiya kwako pa Ambuya, Chiuta waku Yisraele kuti, ‘Solomoni mwana wako wakawusanga pavuli pangu, ndipo wakajanga pa chitengo changu mu malo ghangu’; sono naku ndimu ndichitiyenge.”

³¹Viyo Betesheba wangukotamiya chisku chake pasi, ndi wangulambiya karonga, wanguti, “Kuchitike kuti mbuyangu karonga Davidi waŵe wamoyo muyaya.”

³²Karonga Davidi wanguti, “Ndidaniyeni Zadoki mzukuru, Natani mchimi, ndi Benaya mwana waku Yehoyada ŵazi kuno.” Viyo ŵanguza paurongo pa karonga.

³³Ndipo karonga wanguti kwakuwo, “Jitoliyeni pamoza namwe ŵaŵanda ŵa mbuyamwe, ndipo mumukwezge Solomoni mwana wangu pa nyulu yangu, ndipo mumutole ku Gihoni;

³⁴ndipo Zadoki mzukuru ndi Natani mchimi ŵamupake mafuta kuŵa karonga wa Yisraele kwenikuwa; ndipo mukuŵi mbata, ndi munene kuti, ‘Waŵe waumoyo utali karonga Solomoni!’

³⁵Pavuli pake mukazanga kuvuli kwake, ndipo wazamja pachitengo changu; chifukwa watakuŵanga karonga mu malo ghangu: ndipo ine ndamusankha kuŵa mweruzgi waku Yisraele ndi Yuda.”

³⁶Ndipo Benaya mwana waku Yehoyada wangwamika karonga, “Ameni! Kuŵedi kuti Ambuya, Chiuta wa mbuyangu karonga, wakamba viyo

³⁷Mwenimo Ambuya ajariya ndi mbuyangu karonga, viyo so ndimu ajaliya ndi Solomoni, ndipo akuzge chitengo chake kwakuruska chitengo cha mbuyangu karonga Davidi.”

³⁸Viyo Zadoki mzukuru, Natani mchimi, ndi Benaya mwana waku Yehoyada, ndi ŵina Chereti ndi ŵaPeleti ŵangusika ndi ŵangukwezga Solomoni pa nyulu ya Karonga Davidi, ŵanguza nayo ku Gihoni.

³⁹Kwenikuwa Zadoki mzukuru yo wanguto sengwe la mafuta muhema, wangupaka Solomoni. Pavuli ŵangukuŵa mbata, ndipo ŵanthu wose ŵanguti, “Waŵe wa umoyo utali karonga Solomoni!”

⁴⁰Ndipo ŵanthu wose ŵangumurondo kuvuli, ŵambanga ŵafyolilo, ŵakamburanga ndi kukondwa kukuru, mwakuti pa chifukwa cha kaphomezi kawo charu chingusweka pakati.

⁴¹Adoniya ndi ŵakudanika wose wo ŵenga nayo pamoza ŵanguvwa ichi ŵachimara kurgha. Ndipo penipo Yoabu wanguvwa chizozu cha mbata, wanguti, “Kumbi chimtimbaheka cho che mu msumba ching'anamuwanje?”

⁴²Weche kurongoro iyo, awonani, Jonafani mwana waku Abiatara mzukuru yo wanguza; ndipo Adoniya wanguti, “Sere, pakuti ndiwe iwe munthu wakwenere ndipo waza ndi mazu ghamampha.” Jonafani wangwamuka Adoniya,

⁴³“Awa, pakuti mbuyafwe karonga Davidi wamuchita Solomoni kuŵa karonga;

⁴⁴ndipo karonga watuma pamoza nayo Zadoki mzukuru, Natani mchimi, ndi Benaya mwana waku Yehoyada, ndi ŵina Chereti ndi ŵaPeleti; ndipo ŵamugaliska pa nyulu ya karonga.

⁴⁵Ndipo Zadoki mzukuru ndi Natani mchimi wamupaka mafuta pa Gihoni kuwa karonga; ndipo ŵakwere kutuwa kuwa ŵakukambura ndi kukondwa, chifukwa cho mwe chimtimbaheka mu msumba. Ichi ndichu chiwawa mwavwa.

⁴⁶Solomoni waja pa chitengo cha ukaronga.

⁴⁷Ndipo so ŵaŵanda ŵa karonga ŵanguza kuzachirumba mbuyafwe karonga Davidi, kuti, ‘Chiuta wako wachite zina laku Solomoni kuŵa lambiri yakuruska yinu, ndipo wakuzge chitengo chake chiruske chitengo chinu.’ Ndipo karonga wangukotama mutu wake pa chita.

⁴⁸Ndipo karonga wangukamba so wakuti, ‘Atumbikike Ambuya, Chiuta waku Yisraele, yo wapaska yumoza wa mbeu yangu kuja pachitengo changu zuŵa lino maso ghangu ghachiwona ichi.’ ”

⁴⁹Viyo ŵakudanika wose ŵaku Adoniya ŵangumbwambwanthiya ndipo wangusoka we yose wanguruta nthowa yaku yija.

⁵⁰Ndipo Adoniya wangopa Solomoni; ndipo wangusoka, wanguruta, wanguko masengwe gha chakusopiyapo.

⁵¹Ndipo wangumunene Solomoni, “Ehe, Adoniya watopa karonga Solomoni, pakuti, awonani, wako masengwe gha chiguŵa cha sembe watiti, ‘Karonga Solomoni wadange chandirapiya kuti, Kuti wakabayanga muŵanda wake ndi lipanga cha.’ ” Ndipo Solomoni wanguti,

⁵²“Asani wakajirongonga kuti ndi munthu wakwenere, kuti sisi lake nanga ndi moza likawanga pasi cha; kweni asani utimbanizi wasanirika mŵaku iyo, wakafwanga.”

⁵³Viyo Solomoni wangutuma, ndipo ŵanguza nayo kutuwa ku chiguŵa. Ndipo wanguza ndi wangulambiya karonga Solomoni; ndipo Solomoni wanguti kwaku iyo, “Rutanga ku nyumba yako.”