Read gitonga 1 ŴaKaronga 11 Bible Online

1 ŴaKaronga 11 - gitonga bible

1 ŴaKaronga 11

¹Sono karonga Solomoni wangwanja ŵanthukazi ŵachilendo: mwana munthukazi waku Farao ndi ŵaMoabu, ŵaAmoni, ŵaEdomu, ŵaSidoni, ndi ŵanthukazi ŵa ŵaHiti,

²kutuwa ku mitundu yeniyo Ambuya anguti ku khamu la Yisraele, “Kuti mukaserenga mukutorana nawo cha, chingana ndiwo ndi imwe, chifukwa kwakuneneska ŵakanyongolenga mtima winu ku kurondo ŵachiuta ŵawo,” Solomoni wangujibatika kwaku yaŵa mu chanju.

³Wenga ndi ŵawoli machumi pe chumi ghankhonde pachanya ghaŵi (700), ŵana ŵa mafumu, ndi machumi pe chumi ghatatu (300); mabwezi ghanthukazi.

⁴Chifukwa penipo Solomoni wangukota ŵawoli ŵake ŵangupuruskiya mtima wake kukurondo ŵachiuta ŵamwenga; ndipo mtima wake kuti wenga wakuneneska kwakufikapo cha ku Ambuya Chiuta wake, nge ndi mo wenge mtima waku Davidi awiske.

⁵Chifukwa Solomoni wangurondo Ashitaroti chiuta munthukazi wa ŵaSidoni, ndi Milikomu[3] ukazuzi wa ŵina Amoni.

⁶Viyo Solomoni wanguchita cho chenga chiheni mu maso gha Ambuya, kuti wangurondo Ambuya kwakufikapo cha, ulaka ndimo wanguchitiya Davidi awiske.

⁷Solomoni wanguzenge Kemoshi[4] ukazuzi waku Moabu malo gha pachanya, ndi Moleki[5] ukazuzi wa ŵina Amoni pa phiri kuvuma kwa Yerusalemu.

⁸Ndipo wanguchitiya kwakukozgana ku ŵawoli ŵake wose ŵachilendo, ŵeniwo ŵangocha vyakusunkhizga ndi ŵanguchitiya sembe ŵachiuta ŵawo.

⁹Ndipo Ambuya angumukwiyiya Solomoni chifukwa mtima wake ungutuwako ku Ambuya, Chiuta waku Yisraele, yo wangumuwoneke kwakaŵi,

¹⁰ndipo wangumulanguliya pa chinthu ichi, kuti wangarutanga kurondo ŵachiuta ŵamwenga cha; kweni kuti wangukoleze cho Ambuya angulangula cha.

¹¹Chifukwa cho Ambuya anguti kwaku Solomoni, “Pakuti ili laŵa khumbo lako ndipo ulivi kusunga phanganu langu ndi marangu ghangu ghenigho ndakulanguliya, kwakuneneska ndikaparuwanga ufumu wo kwaku iwe ndipo ndikawupaskanga ku muŵanda wako.

¹²Kweni chifukwa chaku Davidi ausu kuti ndi kachichitanga mu mazuŵa ghako cha, kweni ndikawuparuwanga kutuwa mu janja la mwana wako.

¹³Ndipuuli kuti ndikaparuwanga ufumu wose cha; kweni ndikapaskanga fuku limoza ku mwana wako, chifukwa chaku Davidi mteŵeti wangu ndi chifukwa cha Yerusalemu yo ndasankha.”

¹⁴Ndipo Ambuya anguyuska wakupindikana ndi Solomoni, Hadadi mu Edomu, wenga wa nyumba ya ufumu mu Edomu.

¹⁵Chifukwa penipo Davidi wenga mu Edomu, Yoabu wakulangula ŵankhondo wanguruta kwachiŵika, ŵakubayika wangubaya munthurumi yose

¹⁶(chifukwa Yoabu ndi ŵaYisraele ŵanguja muwa myezi nkhonde ndi umoza, mpaka penipo wangudumuwa munthurumi yose mu Edomu).

¹⁷Kweni Hadadi wanguthaŵiya ku Egipiti, pamoza ndi ŵanyake ŵa ŵaEdomu ŵaŵanda ŵa awiske. Hadadi wenga mwana mumanavi.

¹⁸Ŵangusoka ku Midiyani ŵanguza ku Parani, ndipo ŵangutoko ŵanthurumi ku Parani ŵanguza nawo ku Egipiti, kwaku Farao karonga wa Egipiti yo wangumupaska nyumba, ndipo wangumupaska kuronde kurgha ndi wangumpaska charu.

¹⁹Ndipo Hadadi wangusaniya wezi ukuru mu maso ghaku Farao viyo kuti wangumpaska mlamu wake kutorana nayo, mhurwa waku Tafenesi fumukazi.

²⁰Ndipo mhurwa waku Tafenesi wangumpapiya Genubati mwana wake munthurumi, mweniyo Tafenesi wangulumuliya mu nyumba yaku Farao; Genubati wenga mu nyumba yaku Farao pamoza ndi ŵana ŵanthurumi ŵaku Farao.

²¹Kweni penipo Hadadi wanguvwa mu Egipiti kuti Davidi wangura pamoza ndi awiske ndi kuti Yoabu murongozgi wa ŵankhondo wakufwa, Hadadi wangunena ndi Farao, “Ndizomerezgeni ndirutenge ku charu changu.”

²²Kweni Farao wanguti kwaku iyo, “Nchine cho chakusoŵa kwaku ine chakuti ukhumba kuruta ku charu chako?” Hadadi wanguti, “Ndizomerezgeni waka kuruta.”

²³Chiuta wanguyuska so Rezoni mwana waku Eliada, nge ngwakupindikana kwaku iyo, yo wanguthaŵa ku mbuyake Hadadezeri karonga waku Zeba.

²⁴Ndipo wanguwunjika ŵanthurumi ŵapamoza nayo, ndipo wanguŵa murongozgi wa umba wachivwamba, ndipo ŵanguruta ku Damasko ŵanguja kwenikuwa ndipo ŵangumuvwarika ukaronga mu Damasko.

²⁵Wenga wakupindikana wa ŵaYisraele mu mazuŵa ghose ghaku Solomoni, wachitanga vya mbanda nge ndimo wachitiyanga Hadadi; kweni wangutinkha Yisraele, wanguwusa mu Siriya.

²⁶Yeroboamu mwana waku Nebati, mu Efraimu waku Zereda, muŵanda waku Solomoni, yo zina la nyina lenga Zeruya, choko, nayo so wangusoske janja lake pa karonga.

²⁷Chifukwa cho wangusoske janja lake kumikana ndi karonga chenga ichi. Solomoni wanguzenga Milo ndipo wangujara linga po pangubwanganduka mu msumba waku Davidi awiske.

²⁸Yeroboamu wenga munthu wavinjeru, ndipo penipo Solomoni wanguwona kuti munyamata uyu wenga wakutakataka ukongwa wangumupaska mtufu wakutufuliya ŵanchitu ŵakuchichizgika ŵa nyumba yaku Yosefe.

²⁹Ndipo pa nyengo yiya, penipo Yeroboamu wangutuwa mu Yerusalemu, mchimi Ahija waku Shilo wangumusaniya pa nthowa sono Ahija wangujivwarika chivwaro chifya; ndipo yaŵa ŵaŵi ŵenga ŵija kulisuwa.

³⁰Ahija wanguto chivwaro chifya cho wanguvwara ndipo wanguchiparuwa milembeza chumi ndi yiŵi.

³¹Ndipo wanguti kwaku Yeroboamu, “Jitole milembeza chumi; pakuti Ambuya, Chiuta waku Yisraele, watiti, ‘Ehe nde pafupi kuparuwa ufumu ku janja laku Solomoni, ndipo ndipaskenge iwe mafuku chumi

³²(kweni iyo wakaŵanga ndi fuku limoza, chifukwa chaku Davidi ndi chifukwa cha Yerusalemu, msumba weniwo ndikusankha mu mafuku ghose ghaku Yisraele),

³³chifukwa chakuti wandijowo ine, wasopa Ashetaroto munthukazi wa ŵaSidoni, Kemoshi chiuta wa ŵaMoabu, ndi Milkomu chiuta wa ŵaAmoni, ndipo walivi kwenda mu nthowa zangu, kuchita chenicho nchakurunjika mu maso ghangu, kusunga marangu ghangu ndi vyeruzgu vyangu, nge ndimo wanguchitiya Davidi awiske.

³⁴Ndipuuli kuti ndikatonga wose cha ufumu ku janja lake; kweni ndikamuchitanga kuŵa wakuwusa mazuŵa ghose gha umoyo wake; chifukwa chaku Davidi muŵanda wangu yo ndingutondo, mweniyo wangusunga malangulu ghangu ndi marangu ghangu.

³⁵Kweni ndikatuzgangako ufumu ku janja la mwana wake, ndipo ndikakupaskanga iwe, mafuku chumi.

³⁶Kweni ku mwana wake ndikapaskanga fuku limoza alinga kuti Davidi muŵanda wangu waŵe ndi limbuni paurongo pangu mu Yerusalemu, msumba wo ndikusankha kuŵikamo zina langu.

³⁷Ndipo ndikatonga iwe, ukawusanga paku wose wo mzimu wako ukakhumbanga, ndipo ukaŵanga karonga paku Yisraele.

³⁸Ndipo asani ukavwiyanga vyose vyo nditukulanguliya, ndipo ukendanga mu nthowa zangu, kuchita chenicho nchakurunjika mu maso ghangu pakusunga marangu ghangu ndi malangulo ghangu, ulaka ndimo wanguchitiya Davidi muŵanda wangu, ndikaŵanga nawe, ndipo ndikuzengiyenge nyumba yeneko, nge ndimo ndinguzenge nyumba yeneko, nge ndimo ndinguzenge Davidi, ndipo ndikupaskenge Yisraele.

³⁹Ndipo chifukwa chaku ichi ndikasuzganga ŵakupapika mwaku Davidi, kweni kuti nyengo yose cha.’ ”

⁴⁰Pa chifukwa ichi Solomoni wangupenja kubaya Yeroboamu, kweni Yeroboamu wangusoka wanguthaŵiya ku Egipiti, kwaku Shishaki karonga wa Egipiti, ndipo wanguja mu Egipiti mpaka nyifwa yaku Solomoni.

⁴¹Sono nchitu zose zaku Solomoni, ndi vyose vyo wanguchita, ndi zeru zake asi vikulembeka mu buku la nchitu zaku Solomoni?

⁴²Nyengo yo Solomoni wanguusiya mu Yerusalemu pa ŵaYisraele yenga virimika machumi ghanayi (40).

⁴³Ndipo Solomoni wangugona pamoza ndi awiske, wanguŵikika mu msumba waku Davidi awiske; ndipo Rehoboamu mwana wake wanguwusa mu malo ghake.