Read gitonga 1 ŴaKaronga 14 Bible Online

1 ŴaKaronga 14 - gitonga bible

1 ŴaKaronga 14

¹Pa nyengo yiya Abija mwana waku Yeroboamu wangutama.

²Ndipo Yeroboamu wanguti ku muwoli wake, “Soka, ndi ujibise, kuti kureke kuziŵikwa kuti we muwoli waku Yeroboamu, uruti ku Shilo; ehe, Ahija mchimi we kwenikuwa, mweniyo wangukamba gha paku ine kuti ndikaŵanga karonga wa ŵanthu yaŵa.

³Upingi viŵande chumi, makeki, ndi barasuma wa uchi, ndipo ruta kwaku mweniyo, wamkukunene chenicho chikaŵiyanga mwana.”

⁴Muwoli waku Yeroboamu wangusoka, wanguruta ku Shilo, wanguza ku nyumba yaku Ahija. Nyengo iyi Ahija kuti wanguziŵa kulereska cha, pakuti maso ghake ghanguchita ndandi chifukwa cha ukhongwe.

⁵Ndipo Ambuya anguti kwaku Ahija, “Ehe, muwoli waku Yeroboamu watuza kuzachifumba iwe gha pa mwana wake, pakuti ngwakutama. Uzichimunene mwakuti ndi mwakuti.” Wanguti waza wangujisanduska kuŵa munthukazi munyake.

⁶Kweni penipo Ahija wanguvwa mdinu wa marundi ghake, wachiza pa khomo, wanguti, “Sere, muwoli Yeroboamu, chifukwa chine utijisanduska kuŵa munyake? Chifukwa ndalangulika makani ghazitu paku iwe.

⁷Rutanga, kamunene Yeroboamu, ‘Viyo atiti Ambuya, Chiuta waku Yisraele, “Chifukwa ndingukukwezga iwe kukuto pakati pa ŵanthu, ndipo ndingukuŵika kuŵa murongozgi wa ŵanthu ŵangu ŵaYisraele,

⁸ndinguparuwa ufumu ku nyumba yaku Davidi kuwupaska kwaku iwe; kweni kuti waŵa nge ndi mteŵeti wangu Davidi cha, mweniyo wangusunga malangulu ghangu, ndipo wangundirondo ndi mtima wake wose, kuchita urunji pe mu maso ghangu nyengo yose.

⁹Kweni iwe wachita mphurupuru kuruska wose wo ŵengako paurongo pako ndipo wajipangiya ŵachiuta ŵamwenga, ndi ŵangoza ŵakusongono, kundisosomole ku chikwiya, ndipo wanditaya kuvuli kwako,

¹⁰viyo ehe, ndikatolenga uheni pa nyumba yaku Yeroboamu, ndipo ndikadumuwangako kwaku Yeroboamu munthurumi yose, wose muŵanda ndi mwanangwa mu Yisraele, ndipo ndikamariyanga limu nyumba yaku Yeroboamu, ulaka ndimo munthu watoche ulongo mpaka penipo wamara.

¹¹We yose yo ngwaku Yeroboamu yo wafwiya mu msumba ŵagaru ŵakarghanga; ndipo yo wafwiya pakweru viyuni vya mude vikarghanga, chifukwa Ambuya ndiwo akamba ichi.” ’

¹²Viyo soka, rutanga ku nyumba yako. Marundi ghako ghachisere mu msumba, mwana wakafwanga.

¹³Ndipo ŵaYisraele wose ŵakamutenjenga, ndi kumuŵika, pakuti ndiyo pe waku Yeroboamu yo wakazanga ku muwunda, chifukwa mwaku iyo mukusanirika kanthu kakukondweska Ambuya, Chiuta waku Yisraele, mu nyumba yaku Yeroboamu.

¹⁴Kweni Ambuya akajiyuskiyanga karonga paku Yisraele, mweniyo wakadumuwangako nyumba yaku Yeroboamu le.

¹⁵Ndipo kwanda sono Ambuya akakosonga Yisraele, ulaka ndimo dete lisukuniskikiya mu maji ndi kuzuwa Yisraele kumutuzga mu charu chamampha ichi chenicho angupaska ku auskeu, ndi kuŵaparghaniya kusirgha kwa Efrate, chifukwa ŵapanga Asherimu[6] wawo, kusosomole Ambuya ku ukari.

¹⁶Ndipo akajowonga Yisraele chifukwa cha mphurupuru zaku Yeroboamu zo wangulakwa, ndi kulakwiska nazo Yisraele.”

¹⁷Sono muwoli waku Yeroboamu wangusoka wanguruta, wanguza ku Tirza. Ndipo wachiza pa mphanjizgu za pa khomo la nyumba, mwana wangufwa.

¹⁸Ndipo ŵaYisraele wose ŵangumuŵika ndi ŵangumutenje, kwakulingana ndi mazu gha Ambuya, gho angukamba ku mteŵeti wawo Ahija muchimi yo.

¹⁹Sono nchitu zose zaku Yeroboamu, mwenimo wangurwiya nkhondo ndimo wanguwusiya, ehe, vikulembeka mu Buku la Mikoka ya ŵaKaronga ŵaku Yisraele.

²⁰Ndipo nyengo yo Yeroboamu wanguwusiya yenga virimika machumi ghaŵi ndi viŵi (22), ndipo wangugona pamoza ndi awiske, sono Nadabu mwana wake wanguwusa mu malo ghake.

²¹Sono Rehoboamu mwana waku Solomoni wanguwusa mwaku Yuda. Rehoboamu wenga wavirimika machumi ghanayi ndi chimoza (41) wachamba kuwusa, ndipo wanguwusa virimika chumi pachanya vinkhonde ndi viŵi (17) mu Yerusalemu, msumba wo Ambuya angusankha mukati mwa mitundu yose yaku Yisraele, kuŵika zina lawo mwenimuwa. Zina la anyina lenga Nama mwina Amoni.

²²Ndipo ŵaYuda wanguchita cho chenga uheni mu maso gha Ambuya, ndipo anguŵayuskiya kusanji ndi mauheni ghawo, kuruska mauheni ghose gho auskeu wanguchita.

²³Chifukwa ŵangujizenge malo gha mitunthu, ndi viguŵa, ndi Asherimu pa ka mtunthu kose ndi musina mu muti wose uŵisi;

²⁴ndipo mwenga so ŵanthurumi ŵakusopa ŵareŵi mu charu. Wanguchita kwakulingana ndi ukazuzi wose wamitundu yo Ambuya angudikiska paurongo pa ŵaYisraele.

²⁵Mu chirimika cha chinkhonde cha karonga Rehoboamu, Shishaki karonga wa Egipiti wanguza kumikana ndi Yerusalemu;

²⁶wanguto ndikuruta ndi usambasi wa nyumba ya Ambuya ndi usambasi wa nyumba ya karonga, wanguruta navyo vyose. Wanguruta so ndi nguru zose za golide zo wangupanga Solomoni;

²⁷ndipo karonga Rehoboamu wangupanga nguru zamkuŵa mu malo ghaku zo, ndipo wanguziŵika mu manja gha ŵara ŵa ŵaronda, wo ŵasunganga khomo la nyumba ya karonga.

²⁸Ndipo po pose karonga warutiyanga mu nyumba ya Ambuya, ŵaronda ŵanguzinyamuwa ndi ŵanguziwezge ku nyumba ya uronda.

²⁹Sono nchitu zose zaku Rehoboamu, ndi vyose vyo wanguchita, asi vikulembeka mu Buku la Mikoka ya ŵaKaronga ŵaku Yuda?

³⁰Ndipo penga nkhondo pakati paku Rehoboamu ndi Yeroboamu kwakukiyakiya.

³¹Ndipo Rehoboamu wangugona pamoza ndi awiske, wanguŵikika pamoza ndi awiske mu msumba waku Davidi. Zina la anyina lenga Nama wa ŵa Amoni. Ndipo Abiyamu mwana wake wanguwusa mu malo ghake.