Read gitonga 1 ŴaKaronga 7 Bible Online

1 ŴaKaronga 7 - gitonga bible

1 ŴaKaronga 7

¹Solomoni wanguzenga nyumba yamwencho virimika chumi ndi vitatu, ndipo wangumara nyumba yose.

²Wanguzenga nyumba ya miti yakutuwa ku Lebanoni; utali wake wenga mikono machumi pe chumi (100), ndi usani wake mikono machumi ghankhonde (50), ndi utali wake mu wima yenga mikono machumi ghatatu (30).

³Ndipo yinguvunikirika ndi milanji pachanya pavipinda vyo vyenga pachanya pa mizati machumi ghanayi ndi yinkhonde (45), chumi ndi yinkhonde (15) mu mzeri we wose.

⁴Ghengapo mafuremu gha madangazi mu mizere yitatu, ndipo dangazi lalereskananga ndi dangazi linyake mumuzeri yitatu.

⁵Makhomo ghose ndi madangazi ghenga ndi mafuremu ghavisongo vyakuyana ndipo dangazi lalereskananga ndi dangazi mu mizeri yitatu.

⁶Ndipo wanguchita Chipinda chikuru cha Mizati; utali wake wenga mikono machumi ghankhonde (50), usani machumi ghatutu (30); penga so khumbi ku maso lenga ndi nchindamiru, ndi chivwinkhu paurongo paku vyo.

⁷Ndipo wanguzenga Chipinda chikuru cha Chitengo cha ufumo cho penga pakutauliya cheruzgu, cho chenga Chipinda cha Kweruzgiyamo, chinguchitika ndi milanji kutuwa pasi mpaka ku mapasu.

⁸Nyumba yaku iyo mwenecho mo wajanga, mu bwaro linyake ku msana kwa chipinda, yenga yakuzengeka ndi misili mweniyo pe. Solomoni wanguzenga so nyumba yakuyana ndi chipinda ichi wanguzenge mwanamunthukazi waku Farao yo wanguto kuŵa muwoli.

⁹Zose izi zinguchitika ndi mya ya mtengo, yakusemeka kwakuyana ndi mweso, yakuchekeka ndi vyakucheke ku msana ndi ku maso, kwamba pa chiŵanja kwachifika muzeri wakumariya wachimati, kwamba bu bwalo la nyumba ya Ambuya kwachifika ku bwalo likuru.

¹⁰Chiŵanja chenga cha mya ya mitengo yikuru, mya yikuru ukongwa, mya ya mikono yinkhonde ndi yitatu ndi mikono chimu.

¹¹Ndipo pachanya penga mya yikuru yakuzirwa yakudumulika kwakuyana ndi mweso ndi milanje.

¹²Bwalo likuru lenga ndi mizeri yatatu ya mya yakudumulika kuzunguliya kose, ndi mzeri wa miti yakupinjika ya milanji, bwalo la mukati la nyumba ya Ambuya nalo lenga navyo ivi, ndi khonde la nyumba nalo so viyo.

¹³Ndipo karonga Solomoni wangutuma kwachidana Hiramu kutuwa ku Turo.

¹⁴Uyu wenga mwana wa choko cha mu fuku laku Naftali, awiske ŵenga ŵamu Turo ŵa nchitu ya vya mkuŵa, wakuzazika zeru kuwamo ndi kuziŵa, pakupanga che chose cha nchitu ya mkuŵa. Wanguza ku karonga Solomoni, ndipo wangumchitiya nchitu yose iyi.

¹⁵Wanguchita mizati yiŵi ya mkuŵa. Mikono chumu pachanya nkhonde ndi yitatu (18) ndimu wenge msinkhu wa mzati umoza ndipo mweso wa chingwe kuzungurizga mzati wenga mikono chumi ndi yiŵi, (12) mzati wenga wa mphuwu, ndipo ukhomi wake wenga minwe yinayi, mzati wa chiŵi nawo so wenga viyo.

¹⁶Wanguchita so mitu yiŵi ya mkuŵa wakwenguwa kuyiŵika pachanya pa mizati, msinkhu wa mutu umoza wenga mikono yinkhonde, unyake wenga nawo mikondo yinkhonde.

¹⁷Ndipo wanguruka virepa viŵi ndi nkhata ya unyoro wa kuŵika pa mitu ya pachanya pa mizati; chirepa chimoza pa mutu uwu ndi chimoza pa mutu uwa.

¹⁸Kwakukozgana nako ndimu wanguchitiya ŵazobala, mu mizeri yiŵi kwakuzunguliya pachanya pa chirepa chimoza, kuvunikiriya mutu wo wenga pachanya pa mzati. Ndipo wanguchita kwakukozgana ndi mzati unyake wo.

¹⁹Sono mitu yo yenga pachanya pa nchindamiru za mukhonde yenga yakachitidu ka maluŵa gha lombo, mikono yinayi.

²⁰Mitu yenga pachanya pa nchindamiru zo ziŵi ndi pachanya pa chakuzingiliya cho chenga pamoza ndi chirepa, penga ŵazobala machumi pe chumi ghaŵi (200), mu mizeri yiŵi kwakuzunguliya, viyo so ndimu unguŵiya ndi mutu unyake.

²¹Wangumika nchindamiru pakuserere mu khonde la kasopi, wangumika nchindamiru kuchiri ku malaŵi wanguyidana zina Yakini wangumika nchindamiru kuchiri ku nkhonde wanguyidana zina Yakini wangumika nchindamiru kuchiri ku nkhonde wanguyidana zina Boazi.

²²Ndipo pachanya pa nchindamiru penga kachitidu ka maluŵa gha lombo. Viyo ndimu yingumariya nchitu ya nchindamiru.

²³Sono wanguchita nyanja yakwenguwa, yenga yakuzingiliya, mikono chumi kutuwa mu mlomo kuya mu mlomo unyake ndi mikono yinkhonde mu msinkhu, chingwe cha mikono machumi ghatatu (30) chingupima mwakuwe kwake.

²⁴Kusi ku mlomo wake kwenga nge ndi vyandi utali wa mikono machumi ghatatu, kwakuzunguliya nyanja kosekose, vyandi vyenga mu mizeri yiŵi, vinguyengurikiya pamoza nayo po yinguyengulika.

²⁵Yinguma pachanya pa ng'ombe chumi ndi ziŵi, (12) zitatu maso zingurata ku nkhonde, zitatu kuzambwe zitatu ku malaŵi ndipo zitatu zingurata maso ku vuma; nyanja yingunyekezgeka paku zo, ndipo zose kuchiri ku michira yawo kwenga mukati.

²⁶Ukhomi wake wenga uli mbusani wachikufi, ndipo mlomo wake unguchitika ulaka ndi mlomo wa chandi, ulaka ndi luŵa la lombo mwenga maji gha mweso wa mabafa vikwi viŵi.

²⁷Wanguchita so vyakumapo vya mkuŵa chumi, chakumapo chimoza chenga mikono yinayi mu utali mikono yinayi mu usani, ndi mikono yitatu mu msinkhu.

²⁸Aka ndiku kenga kazengedu ka vyakumapo, vyenga ndi vyakujariya, ndipo vyakujariya ivi vinguŵikika mu mafuremu.

²⁹Ndipo pa vyakujariya vyo vinguŵikika mu mafuremu penga zinkharamu ng'ombe, ndi makerubi. Pa mafuremu pachanya ndi pasi pa zinkharamu ndi ng'ombe, penga zinkhata zakusendemuka.

³⁰Ndipo so chakumpoa che chose chenga ndi mikombelo ya mkuŵa yinayi ndi mizumali yakusere mu mikombelo ya mkuŵa, ndipo visongo vinayi venga vyakukhozge chakusambiyamo. Vyakuvikiriya vinguyengulika, ndi zinkhata ku mphepeti kwaku che chose.

³¹Mlomo wake wenga mukati mu chisoti cha ufumu cho chingulutiyako pachanya mkono umoza, mlomo wake wenga wakuzingiliya, ulaka ndimo yichitikiya nchindamiru, mkono umoza ndi nusu kusere mukati. Pa mlomo wake penga vyakuzganga ndipo vyakujariya vyake vyenga vya nyondo zinayi za kuyana mosemose vyambura kuwulungikana.

³²Ndipo mikombelo yinayi yenga kusi ku vyakujariya, mitanda ya mikombelo yenga chinthu chimoza pe ndi vyakumapo; ndipo mkombelo mu wima wake wenga mkono umoza ndi nusu.

³³Mikimbelo yinguchitika kwa kukozgana ndi mikombelo ya gareta, muzumali yake ya pakati, mumphepete mwake, masipoko ghake ndi mahabu ghake, vyose vyenga vya kwengeka.

³⁴Penga vyakuvikiriya vinayi pavisongo vinayi vya chakumapo che chose, vyakuvikiriya ivi vyenga chinthu chimoza pe ndi vyakumapo.

³⁵Ndipo pachanya pa chakumapo penga chilamba chakuzingika cha msinkhu wa nusu wa mkono, sono pachanya pa chakumapo migolo yake ndi vyakujariya vyake vyenga chinthu chimoza pe ndi cheneko.

³⁶Ndipo pasi pa vyakujapo ndipa vyakujariya vyake, wangusemiyapo makerubi nkharamu, ndi miti ya kanchindu, kwakulingana ndi mkhanju waku chose, pamoza, ndi zinkhata kwakuzunguliya.

³⁷Mukachitiru aka ndimu wanguchitiya so ndi vyakumapo chumi, vyose vyenga vyakwengulika kwakukozgana vyakapimidu kamoza ndi vyakukozgana mu kaŵidu kake.

³⁸Ndipo wanguchita vyakusambiyamo vya mkuŵa; chakusmbiyamo che chose chenga ndi mabafa machumi ghanayi (40), bafa lose lenga mukono yinayi, ndipo pa chakumapo che chose chaku vyo chumi penga chakusambiyamo.

³⁹Wangumika vyakumapo, vinkhonde kuchiri ku malaŵi kwa nyumba yo ndi vinkhonde ku nkhonde kwa nyumba, ndipo wanguŵika nyanja ku chisongo chaku vuma kuchiri ku malaŵi kwa nyumba yo.

⁴⁰Hiramu wanguchita so viŵiya, zimbanu, ndi mabeseni. Viyo Hiramu wangufiska nchitu yose yo wanguchitiya karonga Solomoni yapa nyumba ya Ambuya.

⁴¹Mizati yiŵi, mbali ziŵi za mitu yo yenga pachanya pa mizati, ndi virepa viŵi vyakuvunikiliya mbali ziŵi za mitu zo zenga pachanya pa mizati;

⁴²ndi ŵazobala machumi pe chumi ghanayi (400) ŵanchitu ya virepa viŵi, mizere yiŵi ya ŵazobala pa chirepa chimoza, kuvunikiriya mbali ziŵi za pachanya pa mizati,

⁴³vyakumapo vyo chumi ndi vyakusambiyamo chumi vyakuŵa pachanya pa vyakumapo,

⁴⁴nyanja yimoza, ndi ng'ombe chumi ndi ziŵi (12) kusi kunyanja.

⁴⁵Sono viŵiya, zimbanu, ndi mabeseni, viyaŵi vyose ivi mu nyumba ya Ambuya, vyo Hiramu wangupangiya karonga Solomoni, vyenga vya mkuŵa wakugadima.

⁴⁶Mu dambo la Yordane ndimu karonga wavisongonoriyanga, mu dongo la pakati pa Sukoto ndi Zaretani.

⁴⁷Viyaŵi vyose ivi Solomoni wanguvijowo vyambura kupimika uzitu, chifukwa vyenge vinandi weniukongwa; uzitu wa mkuŵa kuti ungusanirika cha.

⁴⁸Viyo Solomoni wangunozge viyaŵi vyose vyo vyenga mu nyumba ya Ambuya, chiguŵa cha golide, gome la golide la chiŵande cha Kuŵapo.

⁴⁹Vikoleru nyali vya golide leneko, vinkhonde kuchiri ku malaŵi, ndi vinkhonde ku nkhonde, paurongo pa malo ghakupaturika gha mukati ukongwa; maluŵa zinyali, ndi zimbanu vyenga vya golide;

⁵⁰vyandi, visunda, mabeseni, mbali za vyachema, vyakupinguyapo moto, vya golide leneko, ndi mazinga gha golide gha visasa vya mukati ukongwa mwa nyumba, malo ghakupaturika ukongwa, ndi vya visasa vya nyumba ya pakati-kati pa kasopi.

⁵¹Viyo ndimu yingumariya nchitu yose yo karonga Solomoni wanguchita pa nyumba ya Ambuya. Ndipo wanguserezgamo vinthu vyose vyo Davidi awiske wangupatuliya mlimu waku Chiuta, siliva, golide, ndi viyaŵi, wanguvilonga mu malo ghakusungiyamo mauromba gha nyumba ya Ambuya.